ಹೂವು-ದ್ರಾಕ್ಷಿ ಬೆಳೆಗಾರರು ಸೇರಿದಂತೆ ಎಲ್ಲಾ ರೈತರ ನೆರವಿಗೆ ಧಾವಿಸಿದ ರಾಜ್ಯ ಸರ್ಕಾರ

ಬೆಂಗಳೂರು: ಲಾಕ್ ಡೌನ್ ಹಿನ್ನೆಲೆಯಲ್ಲಿ ರೈತರಿಗೆ ತಾವು ಬೆಳೆದ ಬೆಳೆಗಳನ್ನು ಮಾರುಕಟ್ಟೆಗೆ ತಂದು ಮಾರಾಟ ಮಾಡಲು ಸಾಧ್ಯವಾಗುತ್ತಿಲ್ಲ, ದ್ರಾಕ್ಷಿ ಬೆಳೆಗಾರರು ಸಹ ಈ ಸಮಸ್ಯೆಯಿಂದ ಹೊರತಾಗಿಲ್ಲ, ಹೀಗಾಗಿ ದ್ರಾಕ್ಷಿಯನ್ನು ವೈನರಿಗೆ ಹಾಗೂ ಡಿಸ್ಟಿಲರಿಗೆ ಕಳುಹಿಸಲಾಗುತ್ತಿದೆ ಎಂದು ಡಿಸಿಎಂ ಅಶ್ವತ್ಥ ನಾರಾಯಣ ತಿಳಿಸಿದ್ದಾರೆ. 

ಅಗತ್ಯವಸ್ತುಗಳ ಸುಲಭವಾಗಿ ಜನರಿಗೆ ಸಿಗಬೇಕು, ಅಗತ್ಯ ವಸ್ತುಗಳ ದರ ಏರಿಕೆ ಮಾಡದಂತೆ, ಹಾಗೂ ಯಾವುದೇ ಸಮಸ್ಯೆ ಇದ್ದರೂ ಅದನ್ನ ಬಗೆಹರಿಸುವ ನಿಟ್ಟಿನಲ್ಲಿ  ಐವರು ಸಚಿವರಿ ನಡೆಸಿದ ಸಭೆಯ ನಂತರ ಪ್ರತಿಕ್ರಿಯೆ ನೀಡಿದ ಉಪಮುಖ್ಯಮಂತ್ರಿ ಡಾ. ಅಶ್ವತ್ಥ್ ನಾರಾಯಣ್‌, “ಸಚಿವರೆಲ್ಲ ಉತ್ತಮ ಕೆಲಸ ಮಾಡುತ್ತಿದ್ದಾರೆ. ಎಸ್‌ಟಿ ಸೋಮಶೇಖರ್ ಎಪಿಎಂಸಿಗೆ ಭೇಟಿ ಕೊಟ್ಟು ಎಲ್ಲವನ್ನೂ ಪರಿಶೀಲಿಸಿದ್ದಾರೆ. ಅಗತ್ಯ ಕ್ರಮ ತೆಗೆದುಕೊಂಡಿದ್ದಾರೆ. ಕೆಲವೆಡೆ ಮಾರುಕಟ್ಟೆ ಸ್ಥಳಾಂತರ ಕೂಡ ಮಾಡಿದ್ದಾರೆ. ಇನ್ನೂ ಹೆಚ್ಚಿನ ಗಮನ ಹರಿಸಿ ಕೆಲಸ ಮಾಡುತ್ತಿದ್ದಾರೆ,” ಎಂದರು.

ಬೆಂಗಳೂರು ಸುತ್ತಮುತ್ತ 12 ಮಾರುಕಟ್ಟೆ ಪ್ರಾರಂಭಿಸಲು ಮುಂದಾಗಿದ್ದಾರೆ. ಮಾರ್ಗಸೂಚಿಯಂತೆ ಭೂಮಿಯನ್ನ ಪಡೆಯಲು ತೀರ್ಮಾನಿಸಿದ್ದಾರೆ. ಕೆಲವು ಅಗತ್ಯ ಕಂಪೆನಿಗಳು ಕೆಲಸ ಪ್ರಾರಂಭಿಸಿಲ್ಲ. ಆಹಾರ ಘಟಕಗಳ ಕಂಪೆನಿಗೆ ಅಗತ್ಯ ಪರವಾನಿಗೆ, ಪಾಸ್ ನೀಡಿ ಆರಂಭಿಸಲು ತೀರ್ಮಾನಿಸಲಾಗಿದೆ. ಎಣ್ಣೆ, ಗೋದಿ, ಅಕ್ಕಿ ಎಲ್ಲ ಲಭ್ಯವಿದೆ. ಆದಾಗ್ಯೂ ಹೆಚ್ಚಿನ
ಪೂರೈಕೆಗೆ ತೀರ್ಮಾನಿಸಲಾಗಿದೆ. ದರ ಏರಿಕೆ ಮಾಡಿ ಸಂದರ್ಭದ ಲಾಭ ಪಡೆಯಲು ಹೊರಟವರು ಮೇಲೆ ಕ್ರಮ ತೆಗೆದುಕೊಳ್ಳಲಾಗುತ್ತಿದೆ ಎಂದು ವಿವರಿಸಿದರು.

ಆಹಾರ ಇಲಾಖೆ ಈಗಾಗಲೆ ಶೇ. 87ರಷ್ಟು ಆಹಾರವನ್ನು ಹಂಚಿಕೆ ಮಾಡಿದೆ. ಎಪಿಎಲ್‌ ಕಾರ್ಡ್‌ನವರಿಗೂ ಆಹಾರ ಹಂಚಿಕೆ ಮಾಡಲಾಗುತ್ತದೆ. ಬಿಪಿಎಲ್ ಕಾರ್ಡ್‌ಗೆ ಅರ್ಜಿ ಸಲ್ಲಿಸಿದ ಎಲ್ಲರಿಗೂ ಆಹಾರ ನೀಡಲು ತೀರ್ಮಾನಿಸಲಾಗಿದೆ. ಎಸ್‌ಡಿಆರ್‌ಎಫ್‌ನಿಂದಲೂ ರೇಷನ್ ಕೊಡಲು ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಮಾಹಿತಿ ನೀಡಿದರು.

ಕೃಷಿ ಇಲಾಖೆಯಲ್ಲಿ ಗೊಬ್ಬರ, ಬೀಜ ಸೇರಿದಂತೆ ಎಲ್ಲ ಅಗತ್ಯ ವಸ್ತುಗಳ ಪೂರೈಕೆಗೆ ಕ್ರಮ ವಹಿಸಲಾಗಿದೆ. ಈ ಹಿಂದೆ ಪೂರೈಕೆ ಮಾಡಿದ್ದ ಬಿತ್ತನೆ ಬೀಜದ ಹಣ 83 ಕೋಟಿ ಬ್ಯಾಲೆನ್ಸ್ ಇರುವುದನ್ನು ಪಾವತಿಸಲಾಗಿದೆ. ಇಲಾಖೆಗೆ ಹೊಸದಾಗಿ 80 ಕೋಟಿ ನೀಡಲು ತೀರ್ಮಾನಿಸಲಾಗಿದೆ. ತೋಟಗಾರಿಕೆ ಇಲಾಖೆಯಲ್ಲಿ ಪ್ರತಿನಿತ್ಯ 5.5 ಸಾವಿರ ಟನ್ ವಹಿವಾಟು
ಆಗುತ್ತಿದೆ. ಮೊದಲು ಒಂದುವರೆ ಸಾವಿರ ಟನ್ ಮಾತ್ರ ವಹಿವಾಟು ಆಗುತ್ತಿತ್ತು ಎಂದರು.

ಸಚಿವ ನಾರಾಯಣಗೌಡ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಟೊಮೆಟೋವನ್ನು ಸಂಸ್ಕರಣಾ ಘಟಕಕ್ಕೆ ಕಳುಹಿಸಲಾಗುತ್ತಿದೆ. ನಿತ್ಯ ಸಾವಿರ ಟನ್ ಹೋಗುತ್ತಿದೆ. ದ್ರಾಕ್ಷಿಯನ್ನು ವೈನರಿಗೆ ಹಾಗೂ ಡಿಸ್ಟಿಲರಿಗೆ ಕಳುಹಿಸಲಾಗುತ್ತಿದೆ. ಕೃಷಿ, ತೋಟಗಾರಿಕೆ ಉತ್ಪನ್ನಗಳು ಯಾವುದೇ ಅಡೆ ತಡೆ ಇಲ್ಲದೆ ಸಾಗಾಟ ಆಗಬೇಕು. ಹೊರ ರಾಜ್ಯಗಳಿಗೂ ಸರಬರಾಜು
ಆಗಬೇಕು. ಆ ನಿಟ್ಟಿನಲ್ಲಿ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಹೇಳಿದರು.

ರೇಷ್ಮೆ ಉತ್ಪಾದನಾ ಘಟಕ ಕಾರ್ಯ ನಿರ್ವಹಿಸುತ್ತಿಲ್ಲ. ಆದಾಗ್ಯೂ ರೇಷ್ಮೆ ಮಾರಾಟಕ್ಕೆ ತೊಂದರೆ ಆಗದಂತೆ ಇಲಾಖೆ ನೋಡಿಕೊಂಡಿದೆ. ರೈತರಿಗೆ, ಗ್ರಾಹಕರಿಗೆ ಯಾವುದೇ ರೀತಿ ತೊಂದರೆ ಆಗದಂತೆ ಕ್ರಮ ತೆಗೆದುಕೊಂಡಿದ್ದೇವೆ. ಹಾಪ್‌ಕಾಮ್ಸ್ ಅಂಗಡಿ ತೆರೆಯಲು ನಿರ್ಬಂಧ ಇತ್ತು. ಹೀಗಾಗಿ ಇದಕ್ಕೆ ಇರುವ ನಿರ್ಬಂಧ ತೆರವುಗೊಳಿಸುವ ನಿರ್ಧಾರ
ಮಾಡಲಾಗಿದೆ. ತಾತ್ಕಾಲಿಕವಾಗಿ ಈ ಸಮಸ್ಯೆ ಬಗೆಹರಿಸಲು 320 ವಾಹನಗಳನ್ನು ತರಕಾರಿ, ಹಣ್ಣು ಮಾರಾಟಕ್ಕೆ ಬಳಸಿಕೊಳ್ಳಲು ತೀರ್ಮಾನಿಸಲಾಗಿದೆ ಎಂದು ತಿಳಿಸಿದರು.

ಸಪ್ಲೈ ಚೈನ್ ವಿಚಾರವಾಗಿ ಡಿಸಿಎಂ ಅಶ್ವತ್ಥನಾರಾಯಣ, ಸಚಿವರಾದ ನಾರಾಯಣಗೌಡ, ಗೋಪಾಲಯ್ಯ, ಬಿಸಿ ಪಾಟಿಲ್, ಎಸ್‌ಟಿ ಸೋಮಶೇಖರ್ ಅವರಿಗೆ ಸಿಎಂ ಜವಾಬ್ದಾರಿ ವಹಿಸಿದ್ದಾರೆ. ಎಲ್ಲರು ಸೇರಿ ಈ ಕಾರ್ಯ ಮಾಡುತ್ತೇವೆ ಎಂದು ಅವರು ಭರವಸೆ ನೀಡಿದರು.

ಹೂವಿನ ಬೆಳೆಗಾರರ ವಿಚಾರದಲ್ಲಿ ಸಂಪೂರ್ಣ ಮಾಹಿತಿ ಪಡೆದು, ಎಲ್ಲೆಲ್ಲಿ ನಷ್ಟವಾಗಿದೆ ಎಂದು ವರದಿ ಪಡೆದು, ಮುಂದೆ ಪರಿಹಾರ ಕೊಡುವ ನಿಟ್ಟಿನಲ್ಲಿ ತೀರ್ಮಾನಿಸಲಾಗಿದೆ. ಹಣ್ಣುಗಳನ್ನ ಸ್ಟೋರ್ ಮಾಡಿ ಮುಂದೆ ಬಳಕೆ ಮಾಡಲು ಕೋಲ್ಡ್ ಸ್ಟೋರೇಜ್‌ನಲ್ಲಿ ಇಡುವ ಬಗ್ಗೆಯೂ ಚಿಂತನೆ ನಡೆಸಲಾಗಿದೆ. ಪ್ರತಿಪಕ್ಷಗಳ ಆರೋಪದಲ್ಲಿ ಹುರುಳಿಲ್ಲ, ಎಲ್ಲ ಕಾರ್ಮಿಕರ ಪಟ್ಟಿ ಮಾಡಿ ರೇಷನ್ ವಿತರಣೆ ಮಾಡಲಾಗುತ್ತಿದೆ. ಬಿಬಿಎಂಪಿ ಮೂಲಕ ಆಯಾ ವಾರ್ಡ್‌ಗಳಲ್ಲೂ ವಿತರಣೆ ಮಾಡಲಾಗುತ್ತಿದೆ. ಈಗಲೂ ಲಾಕ್‌ಡೌನ್‌ಲ್ಲಿ ಇದ್ದೇವೆ. ಏಪ್ರಿಲ್‌ 20ರ ನಂತರ ಕೋವಿಡ್ 19 ಸಮಸ್ಯೆ ಇಲ್ಲದ ಕಡೆ ಸ್ವಲ್ಪ ಸಡಿಲಿಕೆ ಮಾಡುತ್ತೇವೆ ಎಂದರು.

ಅಶ್ವತ್ಥ್‌ ನಾರಾಯಣ್‌ ಅವರು ಆಹಾರ ಉತ್ಪನ್ನಗಳ ಪೂರೈಕೆ ವ್ಯವಸ್ಥೆ ಸುಧಾರಣೆ ಕುರಿತ ಸಚಿವರ ಗುಂಪಿನ ನೇತೃತ್ವದ ವಹಿಸಿದ್ದು ಎಸ್‌ಟಿ ಸೋಮಶೇಖರ್‌, ಗೋಪಾಲಯ್ಯ, ನಾರಾಯಣ ಗೌಡ, ಬಿಸಿ ಪಾಟೀಲ್ ಸೇರಿದಂತೆ ಅಧಿಕಾರಿಗಳು ಸಭೆಯಲ್ಲಿ ಹಾಜರಿದ್ದರು.