ಒಂದೆರಡು ದಿನಗಳಲ್ಲಿ ಖಾತೆ ಹಂಚಿಕೆ ಅಂತಿಮ- ಕೆ. ಸಿ. ವೇಣುಗೋಪಾಲ್

ಬೆಂಗಳೂರು :ಜೆಡಿಎಸ್  ಕಾಂಗ್ರೆಸ್ ಮೈತ್ರಿಸರ್ಕಾರದ  ಖಾತೆ ಹಂಚಿಕೆ ಪ್ರಕ್ರಿಯೆಯನ್ನು ಒಂದೆರಡು ದಿನಗಳೊಳಗೆ ಅಂತಿಮಗೊಳಿಸಲಾಗುವುದು ಎಂದು ರಾಜ್ಯ ಕಾಂಗ್ರೆಸ್ ಉಸ್ತುವಾರಿ ಕೆ. ಸಿ. ವೇಣುಗೋಪಾಲ್ ತಿಳಿಸಿದ್ದಾರೆ.

 ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ ವಿದೇಶ ಪ್ರವಾಸಕ್ಕೂ, ಸಂಪುಟ ರಚನೆ ಅಂತಿಮಕ್ಕೂ ಸಂಬಂಧವಿಲ್ಲ , ಖಾತೆ ಹಂಚಿಕೆ  ಅಂತಿಮಗೊಳಿಸಿದ್ದರೂ  ಚರ್ಚೆ ಮುಂದುವರೆದಿದೆ. ಇನ್ನೂ ಒಂದೆರಡು ದಿನಗಳಲ್ಲಿ ಎಲ್ಲಾ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಲಾಗುವುದು ಎಂದಿದ್ದಾರೆ.

ರಾಹುಲ್  ಇಲ್ಲ ಎಂದು ವಿಳಂಬ ಮಾಡುವುದಿಲ್ಲ. ಪೋನ್ ನಲ್ಲಿಯೇ ಅವರು ಸಂಪರ್ಕಕ್ಕೆ ಸಿಗಲಿದ್ದು, ಅಂತಿಮ ಪಟ್ಟಿಯ ಬಗ್ಗೆ ರಾಜ್ಯನಾಯಕರ ಜೊತೆ ಚರ್ಚಿಸಿ  , ಕಾಂಗ್ರೆಸ್ ಮುಖ್ಯಸ್ಥರಿಂದ  ಒಪ್ಪಿಗೆ ಪಡೆಯಲಾಗುವುದು , ನಾಳೆಯೂ ಸಹ ಚರ್ಚೆ ನಡೆಯಲಿದೆ ಎಂದು ಅವರು ಸುದ್ದಿಸಂಸ್ಥೆಯೊಂದಕ್ಕೆ ತಿಳಿಸಿದ್ದಾರೆ.

 ಖಾತೆ ಹಂಚಿಕೆ ಕುರಿತಂತೆ ಜೆಡಿಎಸ್ ನೊಂದಿಗಿನ ಭಿನ್ನಾಭಿಪ್ರಾಯ ಕುರಿತು ಮಾತನಾಡಿದ ಅವರು,  ಮೈತ್ರಿ ಸರ್ಕಾರದಲ್ಲಿ ಕೆಲ  ಭಿನ್ನಾಭಿಪ್ರಾಯಗಳಿರುತ್ತವೆ. ಪರಸ್ಪರ ಕೂತು ಚರ್ಚಿಸಿ, ಕೂಡಲೇ  ಅದನ್ನು ಬಗೆಹರಿಸಲಾಗುವುದು ಎಂದು ಹೇಳಿದ್ದಾರೆ.