ಮೇಕೆದಾಟು ಯೋಜನೆಯನ್ನು ಸರ್ಕಾರ 4 ವರ್ಷಗಳಲ್ಲಿ ಮುಗಿಸಬೇಕು: ನೀರಾವರಿ ತಜ್ಞ ರಾಜಾ ರಾವ್

ಬೆಂಗಳೂರು: ಸಮರೋಪಾದಿಯಲ್ಲಿ ಮೇಕೆದಾಟು ಯೋಜನೆಯನ್ನು ರಾಜ್ಯ ಸರ್ಕಾರ ಕೈಗೊಂಡು ಮುಂದಿನ ನಾಲ್ಕು ವರ್ಷಗಳಲ್ಲಿ ಪೂರ್ತಿಗೊಳಿಸಬೇಕು ಎಂದು ನೀರಾವರಿ ತಜ್ಞ ಹಾಗೂ ಸಣ್ಣ ನೀರಾವರಿ ಇಲಾಖೆಯ ಮಾಜಿ ಕಾರ್ಯದರ್ಶಿ ಕ್ಯಾಪ್ಟನ್ ಎಸ್ ರಾಜಾ ರಾವ್ ಒತ್ತಾಯಿಸಿದ್ದಾರೆ.

ಎಂಜಿನಿಯರ್ ಗಳ ಸಂಸ್ಥೆ ಆಯೋಜಿಸಿದ್ದ ಬೆಂಗಳೂರು ನಗರಕ್ಕೆ ನೀರಿನ ಪೂರೈಕೆ ಯೋಜನೆ ಚರ್ಚೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಮೇಕೆದಾಟು ಯೋಜನೆಗೆ ಇತ್ತೀಚೆಗೆ ಕೇಂದ್ರ ಜಲ ಆಯೋಗ ನೀಡಿರುವ ಪ್ರಾಥಮಿಕ ಅನುಮೋದನೆ ಕುರಿತು ಪ್ರಸ್ತಾಪಿಸಿದರು. ಮೇಕೆದಾಟು ಯೋಜನೆ ಕೇವಲ ವಿದ್ಯುತ್ ನೀಡುವುದು ಮಾತ್ರವಲ್ಲದೆ ಬೆಂಗಳೂರು ನಗರಕ್ಕೆ ಕುಡಿಯುವ ನೀರಿನ ಮೂಲ ಕೂಡ ಆಗಿದೆ. ಟರ್ಮಿನಲ್ ಜಲಾಶಯ ರೀತಿಯಲ್ಲಿಯೂ ಕೆಲಸ ಮಾಡಲಿದೆ ಎಂದರು.

ಕೇಂದ್ರ ಜಲ ಆಯೋಗದಿಂದ ಅನುಮತಿ ದೊರೆತರೆ ಸಾಲದು. ಪರಿಸರ ಇಲಾಖೆ, ಪರಿಸರ ಮತ್ತು ಅರಣ್ಯ ಸಚಿವಾಲಯಗಳಿಂದ ಸಹ ಅನುಮತಿ ದೊರೆಯಬೇಕು. 5 ಸಾವಿರದ 173 ಹೆಕ್ಟೇರ್ ಪ್ರದೇಶದಲ್ಲಿ 5 ಸಾವಿರ ಹೆಕ್ಟೇರ್ ಅರಣ್ಯ ಪ್ರದೇಶವನ್ನೇ ಒಳಗೊಂಡಿದೆ.

ವನ್ಯಮೃಗಗಳನ್ನು ಒಳಗೊಂಡಿರುವುದರಿಂದ ಅನುಮತಿ ದೊರೆಯುವುದು ಕಷ್ಟವಾಗುತ್ತದೆ. ತಮಿಳುನಾಡು ಮತ್ತು ಆಂಧ್ರ ಪ್ರದೇಶಗಳಿಗೆ ಹೋಲಿಸಿದರೆ ಕರ್ನಾಟಕದ ಸಾರ್ವಜನಿಕ ಸಂಬಂಧ ವ್ಯವಸ್ಥೆ ಅಸಮರ್ಪಕವಾಗಿದೆ ಎಂದರು.