ಸೌಂದರ್ಯ

ಇತರರನ್ನು ತನ್ನತ್ತ ಸೆಳೆಯುವ ಮುಖದಲ್ಲಿನ ಕಳೆ
= ಇದು ದೇಹದ ಯಾವ ಭಾಗದಲ್ಲಿದೆ ಎಂಬುದನ್ನು ನಿರ್ದಿಷ್ಟವಾಗಿ ಹೇಳಲಾಗದು
= ಅವರವರ ದೃಷ್ಟಿಗೆ ತಕ್ಕಂತೆ ಬದಲಾಗುವಂಥದ್ದು
= ಬ್ಯೂಟಿ ಪಾರ್ಲರ್‌ಗಳ ಹುಟ್ಟಿಗೆ ಕಾರಣವಾದ ಅಂಶ
    ಅಲಂಕಾರದಿಂದ ಹೆಚ್ಚಿಸಿಕೊಳ್ಳಬಹುದೆಂದೇ ಎಲ್ಲರೂ ನಂಬಿರುವ ಇದಕ್ಕೆ ಮಾತ್ರ 'ಅಲಂ' (ಸಾಕು) ಎನ್ನುವುದಿಲ್ಲ
= ಹೆಣ್ಣನ್ನು ಸೌಂದರ್ಯದ ಗಣಿ ಎನ್ನುತ್ತಾರೆ. ಗಂಡನನ್ನು ಗಣಿಧಣಿ ಎನ್ನಬಹುದು
= ಸೌಂದರ್ಯದ ಗಣಿ ಅಗೆದರೆ ಸಿಗುವುದು ಧೂಳೇ (ಪೌಡರ್)
= ಸೌಂದರ್ಯವನ್ನು ಹೆಣ್ಣಿಗೆ ಕೊಟ್ಟ ದೇವರು ಬುದ್ಧಿಯನ್ನು ಮಾತ್ರ ಗಂಡಿಗೇ ಇಟ್ಟುಬಿಟ್ಟ
= ಗಂಡಸರು ಮರುಳಾಗುವ 'ಮರುಳು'ಗಾಡಿನ ಓಯಸಿಸ್
= ಮನ್ಮಥನ ಮನೋ ಮಥನದ ಕಡಗೋಲು
= ಇತ್ತ ದರಿ, ಅತ್ತ ಸುಂದರಿ ಎನ್ನುವಂತೆ ಮಾಡುವ ಅಂಶ
= ಮದುವೆ ಎಂಬ ಅಪಾಯಕಾರಿ ತಗ್ಗಿಗೆ ಜಾರಿ ಬೀಳಲು ಕಾರಣವಾಗುವ ಜಾರುಕ
= ಜಗತ್ತಿನ ಅತ್ಯಂತ ದೊಡ್ಡ ಮೂಢನಂಬಿಕೆಯೆಂದರೆ ಇದನ್ನು ಬಣ್ಣ ಹಚ್ಚಿ ಹೆಚ್ಚಿಸಿಕೊಳ್ಳಬಹುದು ಎಂಬುದು
= ಇದು ದೇಹದ ಹೊರಗಡೆಯಿದೆ ಎಂದುಕೊಂಡರೆ ಇದಕ್ಕೆ ವೃದ್ಧಾಪ್ಯವಿದೆ
    ಬಾಹ್ಯ ಸೌಂದರ್ಯದಷ್ಟೇ ಒಳಗಿನ ಸೌಂದರ್ಯ ಕೂಡ ಮುಖ್ಯ. ಹಾಗಾಗಿಯೇ ಉತ್ತಮ ಚೆಡ್ಡಿಯನ್ನೇ ಧರಿಸಬೇಕು


-ವಿಶ್ವನಾಥ ಸುಂಕಸಾಳ
vishwasunkasal@yahoo.com