ಬಡವ

    ಬಲ್ಲಿದನ ಸುಖಕ್ಕೆ ತನ್ನ ಸುಖ ಅರ್ಪಿಸುವವ
    ಇವನ ಒಡಲು ಯಾವತ್ತೂ ಡವ ಡವ
    ಕಿಸೆ ಖಾಲಿ ಹಾಗಾಗಿ ಮುಖ ಜೋಲಿ
    ಬಂದ ಕೋಪವನ್ನೆಲ್ಲ ನುಂಗಿ ನುಂಗಿಯೇ ಈತನ ಹೊಟ್ಟೆ ತುಂಬುತ್ತದೆ
    ಬವಣೆಯ ಸಮಾನಾರ್ಥಕ
    ಒಪ್ಪೊತ್ತಿಗೆ ಊಟವಿಲ್ಲದಿದ್ದರೂ ಅರಸೊತ್ತಿಗೆಯ ಕನಸು ಕಾಣುವವ
    ಹಸಿವಿಗೆ ಈತನೇ ತುತ್ತು, ಈತನ ತುತ್ತಿಗೆ ಮಾತ್ರ ಯಾವತ್ತೂ ಕುತ್ತು
    ಈತನ ಬಡತನ ಒಂದಿಷ್ಟು ಜನರ ಸಿರಿತನಕ್ಕೆ ಕಾರಣ
    ಈತ ಕುಚೇಲ, ವಸ್ತ್ರವಷ್ಟೇ ಅಲ್ಲ, ಚೀಲಕ್ಕೂ ಸಾವಿರ ತೂತು
    ಹಣವಿಲ್ಲದಿದ್ದರೇನು, ಈತ ಮನಸ್ಸಿನ ಕಣಕಣದಲ್ಲೂ ಶ್ರೀಮಂತನೇ
    ಈತನ ಕೋಪ ದವಡೆಗೆ ಮೂಲ, ಆಕ್ರೋಶ ಹಲ್ಲಿಗೇ ಮೂಲ
    ಗಂಜಿ ಉಂಡರೂ ನಂಜು ಬೀರದವ
    ಗುಡಿಸಲಿನಲ್ಲಿದ್ದರೇನು ಮಾಡಿದ ಅಡಿಗೆಯನು ಮನದುಂಬಿ ಬಡಿಸುವನು
    ದರ ಏರಿಕೆಯ ಕತ್ತರಿಗೆಲ್ಲ ತತ್ತರಿಸುವವ ಈತನೇ
    ಹೊಟ್ಟೆಯಲ್ಲಿ ಯಾವತ್ತೂ ಹಸಿವೆಯ ಬಡವಾಗ್ನಿಯುಳ್ಳವ

ವಿಶ್ವನಾಥ ಸುಂಕಸಾಳ