ರಾಜ್ಯ ರಾಜಕೀಯ ಸ್ಫೋಟ

ಇದುವರೆಗೂ ಪತ್ರಿಕಾ ಹೇಳಿಕೆಗಳು, ಅಲ್ಲಿ- ಇಲ್ಲಿನ ಭಾಷಣಗಳಿಗೇ ಸೀಮಿತವಾಗಿದ್ದ ರಾಜ್ಯದ ಬಿಜೆಪಿ-ಕೆಜೆಸಿ ನಡುವಣ ರಾಜಕೀಯದಲ್ಲಿ ಬುಧವಾರ ಸ್ಪಷ್ಟವಾದ ಬೆಳವಣಿಗೆಗಳನ್ನು ನಿರೀಕ್ಷಿಸುವುದಕ್ಕೆ ಈಗ ಅವಕಾಶವಾಗಿದೆ.
ಸಚಿವೆ ಶೋಭಾ ಕರಂದ್ಲಾಜೆ ಹಾಗೂ ಸಚಿವ ಸಿ.ಎಂ. ಉದಾಸಿ ಅವರು ಮಂತ್ರಿ ಸ್ಥಾನಕ್ಕೆ ರಾಜಿನಾಮೆ ಕೊಡುವ ನಿರ್ಧಾರವನ್ನು ಬಹಿರಂಗವಾಗಿಯೇ ಪ್ರಕಟಿಸಿದ್ದಾಗಿದೆ. ಕಳೆದ ಸಚಿವ ಸಂಪುಟದ ಸಭೆಗೆ ಶೋಭಾ ಕರಂದ್ಲಾಜೆ ಬರಲಿಲ್ಲ. ಸಭೆಯಲ್ಲಿ ಪಾಲುಗೊಂಡ ಸಿ.ಎಂ. ಉದಾಸಿ ಅವರು ಅದೇ ತಮ್ಮ ಪಾಲಿನ ಕಟ್ಟಕಡೆಯ ಮಂತ್ರಿಮಂಡಲದ ಸಭೆ ಎಂದು ಹೇಳಿ ಸಂಗಾತಿಗಳಿಗೆ ವಿದಾಯ ಹೇಳಿದರು.
ಯಡಿಯೂರಪ್ಪ ಬೆಂಬಲಿಗ ಶಾಸಕರು ಅವರ ಶಾಸಕ ಸ್ಥಾನಕ್ಕೂ ರಾಜಿನಾಮೆ ನೀಡಿ ಬಿಜೆಪಿಯನ್ನು ತೊರೆಯುವ ಸಂಭವವೂ ಇದೆ.
 ಎಷ್ಟು ಜನ ಶಾಸಕರು ಈ ರಾಜಿನಾಮೆಯ ಅಂದೋಲನದಲ್ಲಿ ಪಾಲುಗೊಳ್ಳುತ್ತಾರೆ ಎನ್ನುವುದು ಮುಖ್ಯ. ಬಹಿರಂಗವಾಗಿ ರಾಜಿನಾಮೆ ಪತ್ರಗಳನ್ನು ನೀಡಿದರೆ ಜಗದೀಶ ಶೆಟ್ಟರ್ ನೇತೃತ್ವದ ಬಿಜೆಪಿ ಸರ್ಕಾರ ಬಹುಮತವನ್ನು ಕಳೆದುಕೊಳ್ಳುವ ಸ್ಥಿತಿಯನ್ನು ಮುಟ್ಟುವ ಸಂಭವವೂ ಇದೆ.
ಆ ಹಂತದಲ್ಲೇ ರಾಜಕೀಯ ಪಕ್ಷಗಳ, ನಾಯಕರ ನಿಜವಾದ ಬಣ್ಣ ಪ್ರಕಟವಾಗುವುದು. ಈಗಾಗಲೇ ರಾಜ್ಯದ ಆಡಳಿತ ವ್ಯವಸ್ಥೆಯಲ್ಲಿ ಅನಿಶ್ಚಿತತೆಯ ಪರಿಸ್ಥಿತಿ ಮೂಡಿ ಹಲವು ತಿಂಗಳುಗಳೇ ಕಳೆದಿವೆ. ಆ ಪರಿಸ್ಥಿತಿಯನ್ನು ಇನ್ನಷ್ಟು ಉಲ್ಬಣಾವಸ್ಥೆಯನ್ನು ತಲುಪುವಂತೆ ಮಾಡಿದರೆ ಆಡಳಿತ ವ್ಯವಸ್ಥೆ ಕುಸಿಯದಂತೆ ಸಂವಿಧಾನದ ಕ್ರಮ ಅಗತ್ಯವಾಗಬಹುದು. ಖಂಡಿತವಾಗಲೂ ಇದು ಒಳ್ಳೆಯ ಬೆಳವಣಿಗೆ ಅಲ್ಲ.