ಉದಾರಿ

ಉದಾರಿ  
    ಬಹು ವಿಶಾಲವಾದ ದಾರಿಯಲ್ಲಿ ನಡೆವವ
    ಕೇಳಿದ್ದೆಲ್ಲ ಕೊಟ್ಟು ಆಮೇಲೆ ಉರಿ ಉರಿ ಪಡುವವ
    ಊರದಾರಿಗೆ ಬಂದವರನ್ನೆಲ್ಲ ಮನೆಗೆ ಕರೆದು ಉಪಚರಿಸುವವ
    ಮಾತು ಮಾತಿಗೆ ಉದಾಹರಣೆ ನೀಡುತ್ತ ಅತಿಯಾಗಿ ಮಾತನಾಡುವವ
    ಊರಿಗೇ ಒಂದು ದಾರಿಯಾದರೆ ಉದಾರಿಗೆ ಜಗವೆಲ್ಲ ದಾರಿ
    ದಾರಾ (ಹೆಂಡತಿ) ಹೇಳಿದ್ದನ್ನೆಲ್ಲ ಕೊಡಿಸುವವ
    ಯಾಚಿಸಿದವರಿಗೆಲ್ಲ ಹಣ ಕೊಟ್ಟು ದೋಚಿಸಿಕೊಳ್ಳಲ್ಪಡುವವ
    ದಾರಿ ಕಾಣದವರಿಗೆ ತನ್ನ ಕಣ್ಣನ್ನೇ ಕಿತ್ತು ಕೊಡುವವ
    ಈತನ ಕಿಸೆ ಮತ್ತು ಹೃದಯ ಸಾರ್ವಜನಿಕ ಆಸ್ತಿಯಿದ್ದಂತೆ
    ಕೊಡುಗೆ ನೀಡುವುದರಲ್ಲಿ ಕೊಡುಗೈ ದಾನಿಯೀತ
    ದಾರಿ ಯಾವುದಯ್ಯಾ ಎಂದು ಕೇಳಿದವನಿಗೆ ದಾರಿಯ ಜೊತೆ ದಾರಿ ಖರ್ಚನ್ನೂ ಕೊಟ್ಟು ಕಳಿಸುವವ
    ಕರೆಯದೇ ಬಂದವರಿಗೂ ಪಾಯಸ ಮಾಡಿಸಿ ಬಡಿಸುವವ
    ದೇವಸ್ಥಾನಗಳ ಮೇಲೆ ಕಲ್ಲಿನಲ್ಲಿ ಕೆತ್ತಲ್ಪಟ್ಟ ಹೆಸರಿನ ದಾನಿಗಳು
    ರೋಗಿಗಳಿಗೆ ಹಣ್ಣು ಹಂಪಲು ವಿತರಿಸಿ ದೊಡ್ಡ ಫ್ಲೆಕ್ಸ್ ಹಾಕಿಕೊಳ್ಳುವ ರಾಜಕಾರಣಿ
    ನಾಕಾಣೆ ಕೊಟ್ಟು ಎಂಟಾಣೆ ಕೊಟ್ಟವನಂತೆ ಪೋಸು ಕೊಡುವವ ಬೇಗ ಈ ಉಪಾಧಿ ಗಳಿಸಬಲ್ಲ
    ತಮಗೆ ಬೇಕಾದಾಗ ಸಾಲ ಕೊಡುವನನ್ನು ಜನ ಈ ರೀತಿ ಆಡಿಕೊಳ್ಳುತ್ತಾರೆ
    ದೇಶಕ್ಕಾಗಿ ಪ್ರಾಣವನ್ನೇ ಒತ್ತೆ ಇಡುವವನೇ ನಿಜವಾದ ಉದಾರಿ

ವಿಶ್ವನಾಥ ಸುಂಕಸಾಳ
vishwasunkasal@yahoo.com