ಟಿಪ್ಪು ಕಟೌಟ್‌ಗೆ ಸಗಣಿ: ಪ್ರತಿಭಟನೆ

ಯಲ್ಲಾಪುರ: ಈದ್ ಮಿಲಾದ್ ಹಬ್ಬದಂದು ಬಸ್ ನಿಲ್ದಾಣದ ಬಳಿ ನಿಲ್ಲಿಸಿದ್ದ ಟಿಪ್ಪು ಸುಲ್ತಾನ್ ಕಟೌಟ್‌ಗೆ ಶನಿವಾರ ಮಧ್ಯರಾತ್ರಿ ದುಷ್ಕರ್ಮಿಗಳು ಸಗಣಿ ಹಚ್ಚಿ ಅವಮಾನಗೊಳಿಸಿದ್ದಾರೆಂದು ಒಂದು ಕೋಮಿನ ಯುವಕರು ರಾಷ್ಟ್ರೀಯ ಹೆದ್ದಾರಿಯ ಪೊಲೀಸ್ ಠಾಣೆ ಎದುರು ಭಾನುವಾರ ಪ್ರತಿಭಟನೆ ನಡೆಸಿದರು. ಪಟ್ಟಣದಲ್ಲಿ ಈದ್ ಮಿಲಾದ್ ಹಬ್ಬದಾಚರಣೆಯ ಹಿನ್ನೆಲೆಯಲ್ಲಿ ರಸ್ತೆಯ ಎರಡೂ ಕಡೆಗಳಲ್ಲಿ ಪತಾಕೆಗಳು ಮತ್ತು ಕಟೌಟಗಳನ್ನು ನಿಲ್ಲಿಸಿದ್ದರು. ಆದರೆ ಭಾನುವಾರ ಬೆಳಗಾಗುವುದರೊಳಗೆ ಟಿಪ್ಪು ಸುಲ್ತಾನ್ ಕಟೌಟ್‌ಗೆ ಸಗಣಿ ಹಚ್ಚಿರುವುದು ಒಂದು ಕೋಮಿನ ಆಕ್ರೋಶಕ್ಕೆ ಕಾರಣವಾಯಿತು. ಘಟನೆ ಗಂಭೀರತೆ ಅರಿತ ಪೊಲೀಸ್ ನಿರೀಕ್ಷಕ ಅರವಿಂದ ಕಲಗುಜ್ಜಿ, ಶಿರಸಿ ಡಿವೈಎಸ್‌ಪಿ ಎನ್.ಡಿ. ಬಿರ್ಜೆ ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿ ಪ್ರತಿಭಟನೆಯಲ್ಲಿ ನಿರತರಾದ ಯುವಕರ ಮನವೊಲಿಸಿ ವಾಹನ ಸಂಚಾರ ಸುಗಮಗೊಳಿಸಿದರು.