ಮತದಾರರ ಜಾಗೃತಿ ಜಾಥಾಗೆ ಚಾಲನೆ

ಕಾರವಾರ:  ಎಸ್.ಆರ್. ಹಿರೇಮಠ ನೇತೃತ್ವದಲ್ಲಿ ಜನ ಸಂಗ್ರಾಮ ಪರಿಷತ್ ಕಾರವಾರದಿಂದ ಬಳ್ಳಾರಿ ತನಕ ನಡೆಸಲಿರುವ ಮತದಾರರ ಜಾಗೃತಿ ಜ ಾಥಾಕ್ಕೆ ಕಾರವಾರದಲ್ಲಿ ಮಂಗಳವಾರ ಚಾಲನೆ ನೀಡಲಾಯಿತು.
ನಗರದ ಮಿತ್ರ ಸಮಾಜದ ಆವರಣದಿಂದ ಬೆಳಗ್ಗೆ 9.30ಕ್ಕೆ ಜಾಥಾ ಆರಂಭವಾಯಿತು. ಅನಾರೋಗ್ಯದ ಹಿನ್ನೆಲೆಯಲ್ಲಿ ಎಸ್.ಆರ್. ಹಿರೇಮಠ ಜಾಥಾ ಆರಂಭದ ವೇಳೆ ಉಪಸ್ಥಿತರಿರಲಿಲ್ಲ. ಉದ್ಯಮಿ ಬಿ.ಜಿ. ಮೋಹನ್ ಮಾತನಾಡಿ, ಮತದಾನ ಪ್ರಬಲವಾದ ಅಸ್ತ್ರವಾಗಿದೆ. ಇದನ್ನು ಬಳಸಿ, ಪ್ರಾಮಾಣಿಕರು ಹಾಗೂ ನಿಜವಾದ ಸಮಾಜ ಸೇವಕರನ್ನು ಆಯ್ಕೆ ಮಾಡಬೇಕಾದ ಮಹತ್ತರವಾದ ಜವಾಬ್ದಾರಿ ನಮ್ಮ ಮೇಲಿದೆ. ಯಾವುದೆ ಆಸೆ, ಆಮಿಷಗಳಿಗೆ ಬಲಿಯಾಗದೆ ಮತದಾನ ಮಾಡುವ ಬಗ್ಗೆ ಈ ಜಾಥಾದ ಮೂಲಕ ಮತದಾರರಲ್ಲಿ ಜಾಗೃತಿ ಮೂಡಿಸಲಾಗುವುದು ಎಂದು ಹೇಳಿದರು. ಮಿತ್ರ ಸಮಾಜದಿಂದ ಕಾಲ್ನಡಿಗೆಯಲ್ಲಿ ನಗರದಲ್ಲಿ ಸಂಚರಿಸಿ, ವಾಹನದ ಮೂಲಕ ಜಾಥಾ ಹೊರಟಿತು.
ಅದಿರು ಕಂಪನಿಗಳಿಂದ ಮೀನುಗಾರರು, ಸಾರ್ವಜನಿಕರು ನಾಶವಾಗಿದ್ದಾರೆ. ಭ್ರಷ್ಟರೇ ಸಾರ್ವಜನಿಕ ಜೀವನ ಬಿಟ್ಟು ಹೋಗಿ, ಅಕ್ರಮ ಗಣಿಗಾರಿಕೆಯಿಂದ ಗಳಿಸಿದ ಹಣವನ್ನು ಮರಳಿಸಬೇಕು. ಅರಣ್ಯ ಹಾಗೂ ಮನುಕುಲವನ್ನು ರಕ್ಷಿಸಬೇಕು ಎಂಬ ಫಲಕಗಳನ್ನು ಜಾಥಾದಲ್ಲಿ ಪಾಲ್ಗೊಂಡಿದ್ದವರು ಹಿಡಿದು, ಗಣಿಗಾರಿಕೆ, ಭ್ರಷ್ಟಾಚಾರದ ವಿರುದ್ಧ ಘೋಷಣೆಗಳನ್ನು ಕೂಗಿದರು.
ಜ. 25ರ ತನಕ ಈ ಜಾಥಾ ನಡೆಯಲಿದ್ದು, ಧಾರವಾಡ, ಬೆಳಗಾವಿ, ಬಾಗಲಕೋಟ, ಇಳಕಲ್, ಕುಷ್ಟಗಿ, ಕಂಪ್ಲಿ ಮೂಲಕ ಬಳ್ಳಾರಿಯಲ್ಲಿ ಮುಕ್ತಾಯವಾಗಲಿದೆ. ಗ್ರಾಮ ಗಣರಾಜ್ಯ ವೇದಿಕೆಯ ಆರ್.ಬಿ. ಪಾಟೀಲ, ಸಮಾಜ ಪರಿವರ್ತನಾ ಸಮುದಾಯದ ವೀರಣ್ಣಾ ಜ್ಯೋತಿ, ಬಳ್ಳಾರಿ ಜನ ಸಂಗ್ರಾಮ ಪರಿಷತ್‌ನ ಎಸ್. ಪನ್ನರಾಜ, ಭಾವನಾ ಪಾಟೀಲ್ ಮತ್ತಿತರರು ಇದ್ದರು.