ಸುದ್ದಿ ಸಂಕ್ಷೇಪ

ಯಲ್ಲಾಪುರ: ಇಂದು ನಾಟಕ
ಯಲ್ಲಾಪುರ: ರಂಗಸಮೂಹ ಮಂಚಿಕೇರಿ ಹಾಗೂ ಕನ್ನಡ ಮತ್ತು ಸಂಸ್ಕಣತಿ ಇಲಾಖೆ ಕಾರವಾರ ಇವುಗಳ ಸಹಯೋಗದಲ್ಲಿ ಫೆ. 23ರಂದು ಮಂಚಿಕೇರಿಯ ಸಮಾಜ ಮಂದಿರದಲ್ಲಿ ಸಂಜೆ 7ಕ್ಕೆ ನಾಟಕ ಏರ್ಪಡಿಸಲಾಗಿದೆ. ಒಡ್ಡೋಲಗ ರಂಗ ಪರ್ಯಟನ ತಂಡದ ಅಭಿನಯ ಹಾಗೂ ಡಾ. ಪ್ರಕಾಶ ಗರುಡ ಧಾರವಾಡ ಇವರ ಭಾವಾನುವಾದ-ನಿರ್ದೇಶನದಲ್ಲಿ 'ಗಾರ್ಬೆಜ್ ಸಿಟಿಯಲ್ಲಿ ಬೆತ್ತಲೆ ಮನುಷ್ಯ' ನಾಟಕ ಪ್ರದರ್ಶಿಸಲಾಗುವುದು. ನಿವೃತ್ತ ಕಾರ್ಯನಿರ್ವಾಹಕ ಅಭಿಯಂತರ ಎಂ.ಎಸ್. ಜೋಷಿ ಶಿರಸಿ ಹಾಗೂ ಚಾಟರ್ಡ್ ಅಕೌಂಟೆಂಟ್ ಎಸ್.ಜಿ. ಹೆಗಡೆ ಶಿರಸಿ ಕಾರ್ಯಕ್ರಮದಲ್ಲಿ ಉಪಸ್ಥಿತರಿರುತ್ತಾರೆಂದು ಸಂಘಟಕರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಚುನಾವಣೆ: ಕೆಜೆಪಿ ಸ್ಪರ್ಧೆ
ಹೊನ್ನಾವರ: ಪುರಸಭೆ, ಪಪಂ ಸೇರಿದಂತೆ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಕೆಜೆಪಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲಿದೆ ಎಂದು ಕೆಜೆಪಿ ಉ.ಕ. ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಅರುಣ ಆರ್. ನಾಯ್ಕ ಮತ್ತು ವಿಧಾನಸಭಾ ಕ್ಷೇತ್ರ ಸಂಚಾಲಕ ನರಸಿಂಹ ಭಟ್ಟ ತಿಳಿಸಿದ್ದಾರೆ. ಕುಮಟಾ  ಪುರಸಭೆ, ಹೊನ್ನಾವರ ಪಪಂ, ಭಟ್ಕಳ ಪುರಸಭೆ ಚುನಾವಣೆಯಲ್ಲಿ ಕೆಜೆಪಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲಿದ್ದು, ಉಮೇದುವಾರರು ದೂ. 9845407028, 9535672111ಗೆ ಸಂಪರ್ಕಿಸಬಹುದು ಎಂದು ತಿಳಿಸಿದ್ದಾರೆ.  
ಹಣ ವಸೂಲಿ ಸುಳ್ಳು: ಸ್ಪಷ್ಟನೆ
ಕಾರವಾರ: ಬಿಲ್ ನೆಪದಲ್ಲಿ ಅನಧಿಕೃತವಾಗಿ ಹಣ ವಸೂಲಿ ಮಾಡಲಾಗುತ್ತಿದೆ ಎಂದು  ವರದಿಯಾಗಿರುವುದು ಸತ್ಯಕ್ಕೆ ದೂರವಾಗಿದೆ ಎಂದು ಹೆಸ್ಕಾಂ ಅಧಿಕಾರಿಗಳು ಸ್ಪಷ್ಟೀಕರಣ ನೀಡಿದ್ದಾರೆ. ನಿಗದಿತ ಅವಧಿಯೊಳಗೆ ವಿದ್ಯುತ್ ಬಿಲ್ ಪಾವತಿ ಮಾಡದಿರುವ ಗ್ರಾಹಕರ ಮನೆಗಳಿಗೆ ತೆರಳಿ ಸ್ಥಳದಲ್ಲಿಯೇ ಬಿಲ್ ಪಾವತಿಸಲು ಅವಕಾಶ ಕಲ್ಪಿಸಲಾಗುತ್ತಿದೆ. ಇದಕ್ಕೆ ಸಾರ್ವಜನಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹೆಸ್ಕಾಂ ಸಿಬ್ಬಂದಿಯೊಂದಿಗೆ ಅನುಚಿತವಾಗಿ ವರ್ತಿಸಿ, ಈ ರೀತಿಯ ಸುಳ್ಳು ದೂರನ್ನು ಗ್ರಾಹಕರು ನೀಡಿದ್ದಾರೆಂದರು.