ಇಂದು ದಾಂಡೇಲಿ ಬಂದ್

ದಾಂಡೇಲಿ:  ರಾಜ್ಯ ಸರ್ಕಾರ ಪ್ರಸಕ್ತ ವರ್ಷದ ಬಜೆಟ್‌ನಲ್ಲಿ 43 ಹೊಸ ತಾಲೂಕುಗಳನ್ನು ಘೋಷಣೆ ಮಾಡಿದ್ದು, ಉತ್ತರ ಕನ್ನಡ ಜಿಲ್ಲೆಯ ದಾಂಡೇಲಿಯನ್ನು ಇದರಲ್ಲಿ ಸೇರಿಸಿಲ್ಲ. ಈ ಹಿನ್ನೆಲೆಯಲ್ಲಿ ಫೆ. 11ರಂದು ದಾಂಡೇಲಿ ಬಂದ್‌ಗೆ ಕರೆ ನೀಡಲಾಗಿದೆ ಎಂದು ದಾಂಡೇಲಿ ಜೆಡಿಎಸ್ ಘಟಕದ ಅಧ್ಯಕ್ಷ ಟಿ.ಆರ್. ಚಂದ್ರಶೇಖರ ತಿಳಿಸಿದ್ದಾರೆ.  ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ದಾಂಡೇಲಿಗೆ ಅನ್ಯಾಯವಾಗಿದೆ. ಬಂದ್‌ಗೆ ದಾಂಡೇಲಿ ನಾಗರಿಕರ ಸಹಕಾರ ಅಗತ್ಯ ಎಂದರು. ಸರ್ಕಾರ ದಾಂಡೇಲಿಗೆ ಸಹಾಯಕ ಸಾರಿಗೆ ಕಚೇರಿ ಘೋಷಣೆ ಮಾಡಿದ್ದು, ಶಾಸಕ ಸುನೀಲ ಹೆಗಡೆಯವರ ಸತತ ಪ್ರಯತ್ನದಿಂದ ಈ ಕೆಲಸ ಆಗಿದೆ. ಮಾಜಿ ಸಚಿವ ಆರ್.ವಿ. ದೇಶಪಾಂಡೆ ಅವರಿಂದ ಕೆಲಸ ಆಗಿದೆ ಎಂದು ಕಾಂಗ್ರೆಸ್ ಮುಖಂಡರು ಪ್ರಚಾರ ನಡೆಸುತ್ತಿದ್ದಾರೆ. ದೇಶಪಾಂಡೆಯವರಿಗೆ ಯಾವ ಅಧಿಕಾರವಿದೆ? ಹೇಗೆ ಸಹಾಯಕ ಸಾರಿಗೆ ಕಚೇರಿಯನ್ನು ದಾಂಡೇಲಿಗೆ ತರಲು ಸಾಧ್ಯ? ಎಂದು ಚಂದ್ರಶೇಖರ ಪ್ರಶ್ನಿಸಿದರು.   ಪತ್ರಿಕಾಗೋಷ್ಠಿಯಲ್ಲಿ ದಾಂಡೇಲಿ ನಗರಸಭೆ ಅಧ್ಯಕ್ಷ ಗೋವಿಂದ ಮೆಲಗಿರಿ, ಜೆಡಿಎಸ್ ಜಿಲ್ಲಾ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಮುಸ್ತಾಕ್ ಶೇಖ್, ಜೆಡಿಎಸ್ ಉಪಾಧ್ಯಕ್ಷ ಕೆ.ಎಸ್.ಪಾಟೀಲ್, ನಗರಸಭೆಯ ಸದಸ್ಯ ಆದಂ ದೇಸೂರು, ಥಾಮಸ್, ಸುಶೀಲಾ ಕಾಸರಕೊಡ್, ಮಹೇಶ ಸಾವಂತ, ಪಕ್ಷದ ಮುಖಂಡ ಸುರೇಶ ದಂಡಗಲ್, ಶಶಿ ಒಶೀಮಠ ಮುಂತಾದವರು ಇದ್ದರು.
ಬಜೆಟ್ ಬಿಜೆಪಿ ಪ್ರಣಾಳಿಕೆ
ಹಳಿಯಾಳ:  ರಾಜ್ಯ ಬಿಜೆಪಿ ಸರ್ಕಾರ ಮಂಡಿಸಿದ ಬಜೆಟ್ ಬಿಜೆಪಿ ಚುನಾವಣಾ ಪ್ರಣಾಳಿಕೆಯಂತಿದ್ದು, ಕೇವಲ ರು. ಲಕ್ಷ ಕೋಟಿಗಿಂತ ಹೆಚ್ಚಿನ ಮೊತ್ತದ ಬಜೆಟ್ ಮಂಡಿಸಿದ್ದು ಸಾಧನೆ ಎಂಬಂತೆ ಬಿಂಬಿಸಲು ಯತ್ನಿಸಿದ್ದಾರೆ. ಆದರೆ ಅದರ ಅನುಷ್ಠಾನ ಸಾಧ್ಯವಿಲ್ಲ ಎಂದು ವಿಧಾನ ಪರಿಷತ್ ಸದಸ್ಯ ಎಸ್.ಎಲ್. ಘೋಟ್ನೇಕರ ಟೀಕಿಸಿದ್ದಾರೆ. ಅವರು ಭಾನುವಾರ ಪಟ್ಟಣದ ತಮ್ಮ ಕಾರ್ಯಾಲಯದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ರೈತರಿಗೆ ಸಾಲಮನ್ನಾ ಮತ್ತು ಬಡವರಿಗೆ ರು. 2ಗೆ ಕೆಜಿ ಅಕ್ಕಿ ನೀಡುತ್ತಿರುವುದು ಸ್ವಾಗತಾರ್ಹ. ಬಿಜೆಪಿ ಸರ್ಕಾರ ನಿರುದ್ಯೋಗಿಗಳಿಗೆ ಭತ್ಯೆ ಮತ್ತು ರೈತರ ಪಂಪ್‌ಸೆಟ್‌ಗಳಿಗೆ ನಿರಂತರ ವಿದ್ಯುತ್ ಕೋಡುತ್ತೇನೆಂದು ಹೇಳುತ್ತಾ ಬಂದ ಭರವಸೆ ಈವರೆಗೂ ಈಡೇರಿಸಿಲ್ಲ ಎಂದು ದೂರಿದರು. ಈ ಬಾರಿಯ ಬಜೆಟ್‌ನಲ್ಲಿ ಉತ್ತರ ಕನ್ನಡವನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಲಾಗಿದೆ. ಕಾಳಿ ಏತ ನೀರಾವರಿ ಯೋಜನೆ ಬಗ್ಗೆ ಯಾವುದೇ ಚಕಾರ ಎತ್ತಿಲ್ಲ. ದಾಂಡೇಲಿ ಪ್ರತ್ಯೇಕ ತಾಲೂಕಿಗೆ ಪ್ರಾಶಸ್ತ್ಯ ನೀಡಿಲ್ಲ. 43 ತಾಲೂಕುಗಳ ಘೋಷಣೆ ಸ್ವಾಗತಾರ್ಹ. ಇವುಗಳ ಮೂಲಕ ರಾಜ್ಯದ ಅಭಿವೃದ್ಧಿ ಸಾಧಿಸಲು ಸಾಧ್ಯ. ಜಿಲ್ಲೆಯ ಪ್ರವಾಸೋದ್ಯಮಕ್ಕೆ ಯಾವುದೇ ಅನುದಾನ ನೀಡದೆ ಇರುವುದು ಆಶ್ಚರ್ಯ ತಂದಿದೆ. ಜಿಲ್ಲೆಯ ಕೆಡಿಸಿಸಿ ಬ್ಯಾಂಕ್‌ನಿಂದ ಬತ್ತದ ಪ್ರತಿ ಎಕರೆ ಬೆಳೆಗೆ ನೀಡಲಾಗುತ್ತಿದ್ದ ಸಾಲದ ಮೊತ್ತವನ್ನು ರು. 2 ಸಾವಿರದಿಂದ ರು. 10 ಸಾವಿರ ವರೆಗೆ ಮತ್ತು ಕಬ್ಬಿನ ಬೆಳೆಗೆ ರು. 20 ಸಾವಿರದಿಂದ ರು. 30 ಸಾವಿರಗೆ ಏರಿಸಲಾಗಿದ್ದು, ರೈತರ ಅಭಿವೃದ್ಧಿಗೆ ಎಲ್ಲ ಸೌಕರ್ಯ ಕಲ್ಪಿಸಲಾಗಿದೆ ಎಂದು ಘೋಟ್ನೆಕರ ತಿಳಿಸಿದರು. ಪ್ರತಿಕಾಗೋಷ್ಠಿಯಲ್ಲಿ ಪ್ರಕಾಶ ಕಿತ್ತೂರ, ಸಂತೋಷ ಹುಂಡೇಕರ, ನಾರಾಯಣ ಬೆಳಗಾಂವಕರ ಮತ್ತಿತರರು ಹಾಜರಿದ್ದರು.