ಸೂಪರ್‌ಸೀಡ್‌ಗೆ ಒತ್ತಾಯ ಸಲ್ಲ

ಶಿವಮೊಗ್ಗ: ಡಿಸಿಸಿಬಿ ನಗರ ಶಾಖೆಯಲ್ಲಿ ನಡೆದ ಹಗರಣ ಮುಂದಿಟ್ಟುಕೊಂಡು ಬ್ಯಾಂಕ್ ಸೂಪರ್ ಸೀಡ್ ಮಾಡುವಂತೆ ಕೆಲ ರಾಜಕಾರಣಿಗಳು ಒತ್ತಾಯಿಸುತ್ತಿರುವುದು ಸರಿ ಅಲ್ಲ ಎಂದು ಸಹ್ಯಾದ್ರಿ ಮಹಿಳಾ ಪಟ್ಟಣ ಸಹಕಾರ ಬ್ಯಾಂಕ್ ಅಧ್ಯಕ್ಷೆ ವೀರಮ್ಮ ಹೇಳಿದ್ದಾರೆ.
ನಗರದಲ್ಲಿ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, 20 ವರ್ಷಗಳ ಹಿಂದೆ ಸೂಪರ್ ಸೀಡ್ ಆಗಿದ್ದ ಬ್ಯಾಂಕನ್ನು ಬೆಳೆಸಲು ಆರ್.ಎಂ. ಮಂಜುನಾಥಗೌಡರು ಹಗಲಿರುಳು ಶ್ರಮಿಸಿದ್ದಾರೆ. ಸ್ವಸಹಾಯ ಗುಂಪುಗಳಿಗೆ ಹಣಕಾಸು ನೆರವು ನೀಡುವ ಮೂಲಕ ಮಹಿಳೆಯರನ್ನು ಸ್ವಾವಲಂಬಿಗಳನ್ನಾಗಿ ಮಾಡಿದ್ದಾರೆ. ಆದರೆ ಬ್ಯಾಂಕಿನ ಕೆಲವು ಸಿಬ್ಬಂದಿಗಳು ಮಾಡಿದ ತಪ್ಪಿಗೆ ಇಡೀ ಬ್ಯಾಂಕನ್ನೇ ಹೊಣೆ ಮಾಡುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದರು.
ಡಿಸಿಸಿ ಬ್ಯಾಂಕ್ ಸೂಪರ್ ಸೀಡ್ ಮಾಡಿದರೆ ಸಹಕಾರ ಸಂಘಗಳ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಲಿದೆ. ರಾಜಕೀಯ ಹಗೆತನದಿಂದ ಸಹಕಾರ ವ್ಯವಸ್ಥೆ ಹಾಳುಮಾಡುವುದು ಸರಿ ಅಲ್ಲ ಎಂದರು. ಉಪಾಧ್ಯಕ್ಷೆ ವನಜಾಕ್ಷಿ, ಬಸವೇಶ್ವರ ಪಟ್ಟಣ ಪತ್ತಿನ ಸಹಕಾರ ಸಂಘದ ಮಾಜಿ ಅಧ್ಯಕ್ಷೆ ಶಾಂತಾ ಆನಂದ್, ಯಶೋದ ಮಂಜುನಾಥ್, ಮಂಜುಳಾ ಬಾಯಿ, ಪುಷ್ಪ, ತಬಸ್ಸುಂ, ಆರ್ಯಾಂಭ ಮತ್ತಿತರರು ಇದ್ದರು.