ಬೋನಿಗೆ ಬಿದ್ದ ಚಿರತೆ: ಜನ ನಿರಾಳ

ಹುಣಸೂರು: ತಾಲೂಕಿನ ಕೂಡ್ಲೂರು ಹಾಗೂ ತಟ್ಟೆಕೆರೆ ಗ್ರಾಮಗಳಲ್ಲಿ ಜಾನುವಾರು ಹಾಗೂ ನಾಯಿಗಳನ್ನು ಕೊಂದಿದ್ದ ಚಿರತೆ ಬೋನಿಗೆ ಬಿದ್ದಿದೆ. ಕಳೆದೊಂದು ವಾರದಿಂದ ಈ ಭಾಗದಲ್ಲಿ ಕರು, ಕುರಿ, ಮೇಕೆ ಹಾಗೂ ನಾಯಿಗಳನ್ನು ಹಗಲು ವೇಳೆಯೇ ತಿಂದು ಹಾಕುವ ಮೂಲಕ ಜನರನ್ನು ಭಯಭೀತಗೊಳಿಸಿತ್ತು. ಈ ಚಿರತೆಯನ್ನು ಹಿಡಿಯಲು ಕೊಂದಿದ್ದ ಕರುವಿನ ಮಾಂಸವನಿಟ್ಟಿದ್ದ 2 ಬೋನ್ಗಳನ್ನು ರೇವಣ್ಣರ ಜಮೀನಿನಲ್ಲಿಡಲಾಗಿತ್ತು. ರಾತ್ರಿ ವೇಳೆ ಮತ್ತೆ ಶಿಕಾರಿಗೆ ಬಂದ 3 ವರ್ಷದ ಗಂಡು ಚಿರತೆಯು ಮಾಂಸದಾಸೆಗಾಗಿ ಬೋನಿನೊಳಕ್ಕೆ ಬಂದ ವೇಳೆ ಅಲ್ಲೇ ಬಂಧಿಯಾಯಿತು. ಈ ಚಿರತೆಯನ್ನು ನಾಗರಹೊಳೆ ವಲಯದ ಪಾಲಾರ್ ಹಳ್ಳದಲ್ಲಿ ಬಿಡಲಾಯಿತೆಂದು ಎಸಿಎಫ್ ಪ್ರಸನ್ನಕುಮಾರ್ ತಿಳಿಸಿದ್ದಾರೆ. ಕಾರ್ಯಾಚರಣೆಯಲ್ಲಿ ವಲಯ ಅರಣ್ಯಾಧಿಕಾರಿ ಶಿವರಾಂ ಹಾಗೂ ಸಿಬ್ಬಂದಿ ಭಾಗವಹಿಸಿದ್ದರು.