ನೀರು ಪೋಲು ತಡೆದ ಜಸ್ಕೋ

ಮೈಸೂರು: ನಗರದಲ್ಲಿ ಕುಡಿಯುವ ನೀರಿಗೂ ತತ್ವಾರ ಉಂಟಾಗಿರುವ ಸಂದರ್ಭದಲ್ಲೇ ಇಲ್ಲಿನ ಕೃಷ್ಣಮೂರ್ತಿಪುರಂ ರಾಮ ಅಯ್ಯರ್ ರಸ್ತೆಯ ಅಶೋಕ ಕ್ಲಿನಿಕ್ ಬಳಿ ಹಲವು ದಿನಗಳಿಂದ ನೀರು ಪೋಲಾಗುತ್ತಿದ್ದನ್ನು ಜಸ್ಕೋ ದುರಸ್ತಿ ಮಾಡಿ ತಡೆದಿದೆ. ನೀರು ಪೋಲಾಗುತ್ತಿದ್ದ ಬಗ್ಗೆ ಕನ್ನಡಪ್ರಭ ಜ.22 ರಂದು 5 ದಿನಗಳಿಂದ ನೂರು ಪೋಲು ಎಂಬ ಶೀರ್ಷಿಕೆಯಡಿ ವರದಿ ಪ್ರಕಟಿಸಿತ್ತು. ಇದರಿಂದ ಎಚ್ಚೆತ್ತ ಜಸ್ಕೋ, ಪೈಪ್ ಅಳವಡಿಸಿ ಅರ್ಧಕ್ಕೆ ಬಿಟ್ಟಿದ್ದನ್ನು ಸರಿಪಡಿಸಿ ನೀರು ಪೋಲಾಗದಂತೆ ಬಂದ್ ಮಾಡಿದೆ.
ಆದಿಶ್ರೀಗಳಿಗೆ ಇಂದು ಶ್ರದ್ಧಾಂಜಲಿ
ಮೈಸೂರು: ಆದಿಚುಂಚನಗಿರಿ ಮಠದ ಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿಗಳಿಗೆ ಶ್ರದ್ಧಾಂಜಲಿ ಕಾರ್ಯಕ್ರಮವನ್ನು ಜ.24ರ ಸಂಜೆ 5ಕ್ಕೆ ಕಲಾಮಂದಿರದಲ್ಲಿ ಆಯೋಜಿಸಲಾಗಿದೆ. ತ್ರಿವಿಧ ದಾಸೋಹಿಗಳು, ಶೈಕ್ಷಣಿಕ ಕ್ಷೇತ್ರದಲ್ಲಿ ಬಹುದೊಡ್ಡ ಕ್ರಾಂತಿ ಮಾಡಿದ ಶ್ರೀಗಳಿಗೆ ಶ್ರದ್ಧಾಂಜಲಿ ಅರ್ಪಿಸಲಾಗುತ್ತಿದೆ.
ಹಲ್ಲೆ ಮಾಡಿದ್ದ ಮೂವರಿಗೆ ಜೈಲು
ಮೈಸೂರು: ಮಹಿಳೆ ಮೇಲೆ ಹಲ್ಲೆ ನಡೆಸಿದ ಒಂದೇ ಕುಟುಂಬದ ಮೂವರಿಗೆ ಇಲ್ಲಿನ ನ್ಯಾಯಾಲಯವು ತಲಾ 2 ವರ್ಷ ಜೈಲು ಶಿಕ್ಷೆ ವಿಧಿಸಿ ತೀರ್ಪು ನೀಡಿದೆ. ಮೈಸೂರು ತಾಲೂಕು ಚೋರನಹಳ್ಳಿ ನಿವಾಸಿಗಳಾದ ದೊಡ್ಡ ದೇವಯ್ಯ ಎಂಬವರ ಪುತ್ರ ದೊಡ್ಡಯ್ಯ, ಇವರ ಪತ್ನಿ ಮಹಾದೇವಮ್ಮ ಮತ್ತು ಪುತ್ರ ಮರಿಸ್ವಾಮಿ ಶಿಕ್ಷೆಗೆ ಗುರಿಯಾದವರು. ಈ ಮೂವರು ಚೋರನಹಳ್ಳಿ ಗ್ರಾಮದ ದೇವಣ್ಣ ಎಂಬವರ ಪತ್ನಿ ರಾಧಾ ಎಂಬವರ ಮೇಲೆ ಹಲ್ಲೆ ನಡೆಸಿದ್ದರು. 2010ರ ಜು.18 ರಂದು ರಾಧಾ ತಮ್ಮ ಜಮೀನಿನಲ್ಲಿ ಬೆಳೆದಿದ್ದ ಅಲಸಂದೆ ಕಟಾವಿಗೆ ಹೋಗಿದ್ದರು. ಈ ವೇಳೆ ದೊಡ್ಡಯ್ಯ, ಮಹಾದೇವಮ್ಮ ಮತ್ತು ಮರಿಸ್ವಾಮಿ ದನಗಳನ್ನು ಜಮೀನಿನಲ್ಲಿ ಮೇಯಿಸುತ್ತಿದ್ದರು. ಇದನ್ನು ಪ್ರಶ್ನಿಸಿದ ರಾಧಾರೊಂದಿಗೆ ಮೂವರು ಜಗಳ ತೆಗೆದು, ರಾಧಾ ಕೈಗೆ ಕುಡುಗೋಲಿನಿಂದ ಹೊಡೆದು ಗಾಯಗೊಳಿಸಿದ್ದರು.