ಕೆಜೆಪಿ ಬಿಡುವುದಿಲ್ಲ: ಮಹದೇವಯ್ಯ ಸ್ಪಷ್ಟನೆ

ನಂಜನಗೂಡು: ಯಾವ ಕಾರಣಕ್ಕೂ ಕೆಜೆಪಿ ತೊರೆಯುವುದಿಲ್ಲ ಎಂದು ಸ್ಪಷ್ಟಪಡಿಸಿರುವ ಮುಖಂಡ ಎಸ್. ಮಹದೇವಯ್ಯ, ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಎಂದೆಂದಿಗೂ ನನ್ನ ನಾಯಕರು ಎಂದು ಸ್ಪಷ್ಟಪಡಿಸಿದ್ದಾರೆ.
ಇತ್ತೀಚೆಗೆ ಪಟ್ಟಣದಲ್ಲಿ ನಡೆದ ಪಕ್ಷದ ಸಮಾವೇಶದ ನಂತರ, ನಂಜನಗೂಡು ಮೀಸಲು ವಿಧಾನಸಬಾ ಕ್ಷೇತ್ರದ ಕೆಜೆಪಿ ಟಿಕೆಟ್ ಆಕಾಂಕ್ಷಿಗಳ ಪಟ್ಟಿ ಬೆಳೆಯುತ್ತಲೇ ಇದೆ. ಕೆಲವರು ಜನರಲ್ಲಿ ಗೊಂದಲವನ್ನುಂಟು ಮಾಡಿದ್ದಾರೆ. ಆದರೆ ವರಿಷ್ಠರು ಈವರೆಗೆ ಯಾರನ್ನೂ ಅಧಿಕೃತ ಅಭ್ಯರ್ಥಿ ಎಂಬುದಾಗಿ ಘೋಷಿಸಿಲ್ಲ. ಹಾಗಾಗಿ ಕ್ಷೇತ್ರದ ಜನತೆ ಗೊಂದಲಕ್ಕೀಡಾಗಬಾರದೆಂದು ಅವರು ಸುದ್ದಿಗೋಷ್ಠಿಯಲ್ಲಿ ಮನವಿ ಮಾಡಿದರು.
ಕಳೆದ ಚುನಾವಣೆಯಲ್ಲಿ ಕಡಿಮೆ ಅಂತರದಿಂದ ಪರಾಜಯಗೊಂಡರೂ, ಕ್ಷೇತ್ರದ ಮತದಾರರೊಂದಿಗೆ ನಿಕಟ ಸಂಪರ್ಕದಿಂದಿದ್ದು, ಅವರ ಕಷ್ಟ ಸುಖಗಳಿಗೆ ಸ್ಪಂದಿಸಿದ್ದೇನೆ. ಜನರ ಅಭಿಪ್ರಾಯ ಅರಿತು ವರಿಷ್ಠರು ಸ್ಪರ್ಧಿಸಲು ನನಗೆ ಟಿಕೆಟ್ ನೀಡಿದಲ್ಲಿ ನಾನು ಸ್ಪರ್ಧಿಸುತ್ತೇನೆ. ಒಂದು ವೇಳೆ ಇಲ್ಲವಾದರೆ ಯಡಿಯೂರಪ್ಪನವರ ಜತೆಯಲ್ಲೆ ಇದ್ದು, ಪಕ್ಷದ ಸಂಘಟನೆಗೆ ದುಡಿಯುತ್ತೇನೆಯೆ ಹೊರತು ಯಾವುದೆ ಕಾರಣಕ್ಕೂ ಪಕ್ಷ ಬಿಡುವುದಿಲ್ಲ ಎಂದು ಹೇಳಿದರು.
ಮುಖಂಡರಾದ ಶಾಂತಮೂರ್ತಿ, ಮಹದೇವಪ್ಪ, ಅಣ್ಣಯ್ಯ ಶೆಟ್ಟಿ, ಮಲ್ಲಿಕಾರ್ಜುನ್, ನಾಜಿರ್‌ಖಾನ್ ಇದ್ದರು. ಭೋವಿ ಜನಾಂಗದ ಮುಖಂಡ ಕೆ.ವಿ. ಚಿನ್ನಯ್ಯ ಎಂಬುವರು ತಮ್ಮನ್ನು ಕೆಜೆಪಿ ಅಭ್ಯರ್ಥಿ ಎಂಬುದಾಗಿ ಪಕ್ಷದ ಮುಖಂಡ ಕಾ.ಪು. ಸಿದ್ದಲಿಂಗಸ್ವಾಮಿ ತೀರ್ಮಾನಿಸಿದ್ದಾರೆ ಎಂದು ಹೇಳಿಕೊಂಡು, ಮತದಾರರಲ್ಲಿ ಮತಯಾಚಿಸುವ ಪಾಂಪ್ಲೆಟ್ ಮುದ್ರಿಸಿ ಇತ್ತೀಚೆಗೆ ತಾಲೂಕಿನಾದ್ಯಂತ ಹಂಚಿದ್ದರು.