ಪರಂ ಬೆಂಬಲಿಗರ ದಾಳಿಗೆ ವಿರೋಧ

ಪಾವಗಡ: ಅವಾಚ್ಯ ಶಬ್ದಗಳಿಂದ ನಿಂದನೆ ಮತ್ತು ಕೆಪಿಸಿಸಿ ಅಧ್ಯಕ್ಷ ಪರಮೇಶ್ವರ ಅವರ ಬೆಂಬಲಿಗರು ಪ್ರಜಾಪ್ರಗತಿ ಕಚೇರಿ ಮೇಲೆ ದಾಳಿ ಮಾಡಿರುವುದನ್ನು ವಿರೋಧಿಸಿ ಇಲ್ಲಿನ ಕಾರ್ಯನಿರತ ಪತ್ರಕರ್ತರ ಸಂಘದ ವತಿಯಿಂದ ಶುಕ್ರವಾರ ಪ್ರತಿಭಟನೆ ನಡೆಸಲಾಯಿತು.
ಪಟ್ಟಣದ ಪೊಲೀಸ್ ಠಾಣೆ ಬಳಿ ಚಳ್ಳಕರೆ ರಸ್ತೆಯಲ್ಲಿ ಅರ್ಧಗಂಟೆಗೂ ಹೆಚ್ಚು ಕಾಲ ರಸ್ತೆ ತಡೆ ನಡೆಸಿದ ಪ್ರತಿಭಟನೆಕಾರರು ಪತ್ರಿಕಾ ಕಚೇರಿಯ ಮಲೆ ದಾಂಧಲೆ ನಡೆಸಿದ ಪರಮೇಶ್ವರ ಬೆಂಬಗಲಿಗರ ವಿರುದ್ಧ ಸೂಕ್ತ ಕ್ರಮ ಜರುಗಿಸುವಂತೆ ಒತ್ತಾಯಿಸಿದರು.
ಇದೇ ಸಂದರ್ಭದಲ್ಲಿ ತಾಲೂಕು ಕಚೇರಿ ಬಳಿ ಪ್ರತಿಭಟನೆ ಉದ್ದೇಶಿಸಿ ಮಾತನಾಡಿದ ಸಂಘದ ನಿರ್ದೇಶಕ ಸತ್ಯಾ ಲೋಕೇಶ್, ಪ್ರಜಾಪ್ರಗತಿ ಮೇಲೆ ನಡೆಸಿರುವ ದಾಳಿ ಪೂರ್ವಯೋಜಿತ ಸಂಚು ಎಂದರು. ತಾಲೂಕು ಪತ್ರಕರ್ತರ ಸಂಘದ ಅಧ್ಯಕ್ಷ ಹನುಮಂತರಾಯಪ್ಪ ಮಾತನಾಡಿ, ಪರಮೇಶ್ವರ ಬೆಂಬಲಿಗರ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿ ಪತ್ರಿಕಾ ಸ್ವಾತಂತ್ರ್ಯಕ್ಕೆ ಧಕ್ಕೆ ತರುವ ಕಿಡಿಗೇಡಿಗಳನ್ನು ಮಟ್ಟಹಾಕಬೇಕು ಎಂದು ಆಗ್ರಹಿಸಿದರು.
ಪತ್ರಕರ್ತರಾದ ಎ.ಶಂಕರಪ್ಪ, ಹನುಮಂತರಾಯಪ್ಪ, ಜೆ.ನಾಗೇಂದ್ರ, ಜಯಸಿಂಹ, ಇಮ್ರಾನ್, ಅಮೋಘ ಸತ್ಯಪ್ರಸಾದ್, ರಾಮಾಂಜಿನಪ್ಪ, ಸೂರ್ಯಪ್ರಕಾಶ್, ದವಡಬೆಟ್ಟ ನಾಗರಾಜ್, ಸಮಾಜ ಸೇವಕರಾದ ದೇವಲಕೆರೆ ಲೋಕೇಶ್ ರಂಗಸಮುದ್ರ ನಲೆಸಿರಿ ಜಯರಾಮ್ ಇತರರು ಘಟನೆ ಬಗ್ಗೆ ವಿರೋಧಿಸಿ ದಾಳಿ ನಿರತರ ವಿರುದ್ಧ ಸೂಕ್ತ ಕ್ರಮ ಜರುಗಿಸುವಂತೆ ಒತ್ತಾಯಿಸಿದರು. ಕೆ.ರಾಂಪುರ ನಾಗೇಶ್ ವೈ.ಎನ್.ಹೊಸಕೋಟೆ ರಫೀಕ್, ಧನಂಜಯ, ಸತೀಶ್ ಇತರರು ಇದ್ದರು.