ಆತ್ಮಶಕ್ತಿಯಿಲ್ಲದ ರಾಜಕಾರಣಿಗಳ ಕಿತ್ತಾಟ

ಮದ್ದೂರು: ಆತ್ಮಶಕ್ತಿ ಇಲ್ಲದ ರಾಜಕಾರಣಿಗಳಿಂದ ಅಧಿಕಾರಕ್ಕಾಗಿ ಕಿತ್ತಾಟ ನಡೆಯುತ್ತಿದೆ ಎಂದು ರಾಜ್ಯ ಮದ್ಯಪಾನ ಸಂಯಮ ಮಂಡಳಿ ಅಧ್ಯಕ್ಷ ಸಚ್ಚಿದಾನಂದ ಹೆಗಡೆ ಶುಕ್ರವಾರ ಹೇಳಿದರು.
ತಾಲೂಕಿನ ಎಚ್.ಕೆ. ವೀರಣ್ಣಗೌಡ ಕಾಲೇಜಿನಲ್ಲಿ ಗಾಂಧಿ ವಿಚಾರ ಪ್ರಣೀತ ರಾಜ್ಯಮಟ್ಟದ ರಾಷ್ಟ್ರೀಯ ಸೇವಾ ಯೋಜನೆಯ ಸ್ವಯಂ ಸೇವಕರ 11ನೇ ವರ್ಷದ ವಿಶೇಷ ಕಾರ್ಯಾಗಾರದಲ್ಲಿ ಅವರು ಗಾಂಧಿ ಭಾವಚಿತ್ರಕ್ಕೆ ಪುಷ್ಪನಮನ ಸಲ್ಲಿಸಿ ಮಾತನಾಡಿ, ಆತ್ಮಶಕ್ತಿ ಇಲ್ಲದವರು ಎಲ್ಲಾ ರೀತಿಯ ವಂಚಕತನ ಮತ್ತು ಮೋಸ ಮಾಡುವ ಮೂಲಕ ಬೆನ್ನಿಗೆ ಚೂರಿ ಹಾಕುವ ಕೆಲಸ ಮಾಡುತ್ತಿದ್ದಾರೆ ಎಂದು ವಿಷಾದಿಸಿದರು.
ರಾಜಕಾರಣಿಗಳು ಅಧಿಕಾರ ಮತ್ತು ಹಣ ಗಳಿಸುವ ಮೂಲಕ ಸುಖ ಪಡಬಹುದು ಎಂದು ಅಭಿಲಾಷೆ ಹೊಂದಿದ್ದಾರೆ. ಆದರೆ, ಇಂತಹ ವ್ಯವಸ್ಥೆಯಿಂದ ಬರುವ ಅಧಿಕಾರ ಮತ್ತು ಹಣ ನಿಜವಾದ ಸುಖ ನೀಡುವುದಿಲ್ಲ ಎಂದು ಹೇಳಿದರು. ಲಂಚದ ಆಸೆಗೆ ಒಳಗಾಗುವವರು ಆತ್ಮಶಕ್ತಿ ಇಲ್ಲದವರು ಮಾಡುವ ಕೆಲಸವಾಗಿದೆ. ಇದರಿಂದ ನಿಜವಾದ ಸುಖ ಗಳಿಸಲು ಸಾಧ್ಯವಿಲ್ಲ ಎಂದರು.
ದುಡಿತವಿಲ್ಲದೇ ಜೀವನ ನಡೆಸುವುದು ನಮ್ಮ ಸಂಸ್ಕೃತಿ ಅಲ್ಲ. ನಾವುಗಳು ನಮ್ಮದಲ್ಲದ ಹಣಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದೇವೆ. ನೌಕರಿ ಮೂಲಕ ಬರುವ ಸಂಬಳಕ್ಕಿಂತ ಲಂಚ ಇರುವ ಹುದ್ದೆಗಳ ಕಡೆಗೆ ಜನರು ಆಕರ್ಷಿಸುತ್ತಿರುವುದು ವಿಷಾದನಿಯವಾಗಿದೆ ಎಂದರು.