ಕುಡಿವ ನೀರು ಪೂರೈಸಲು ಕರವೇ ಆಗ್ರಹ

ಕುಷ್ಟಗಿ: ಆಲಮಟ್ಟಿ ಜಲಾಶಯದಿಂದ ಜಿಂದಾಲ್ ಕಾರ್ಖಾನೆಗೆ ನೀರು ಸರಬರಾಜು ಮಾಡಲು ಜೋಡಿಸಿರುವ ಕೊಳವೆ ಮಾರ್ಗದಲ್ಲಿ ಬರುವ ಕುಷ್ಟಗಿ ತಾಲೂಕಿನ ಗ್ರಾಮಗಳಿಗೆ ಕುಡಿವ ನೀರು ಪೂರೈಸುವಂತೆ ಒತ್ತಾಯಿಸಿ ಕರ್ನಾಟಕ ರಕ್ಷಣಾ ವೇದಿಕೆ ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿದೆ. ಇಲ್ಲಿನ ತಹಸೀಲ್ದಾರ್ ವೀರೇಶ ಬಿರಾದಾರ ಮೂಲಕ ಮನವಿ ಸಲ್ಲಿಸಿದ ಕರವೇ ಜಿಲ್ಲಾಧ್ಯಕ್ಷ ಬಸವನಗೌಡ ಪೊಲೀಸ್ ಪಾಟೀಲ್ ಹಾಗೂ ಇತರರು ಆಲಮಟ್ಟಿ ಜಲಾಶಯದಿಂದ ಜಿಂದಾಲ್ ಕಾರ್ಖಾನೆಗೆ ನೀರು ಸರಬರಾಜು ಮಾಡಲು ಜೋಡಿಸಿರುವ ಕೊಳವೆ ಮಾರ್ಗ ಪಟ್ಟಣದ ರಾಷ್ಟ್ರೀಯ ಹೆದ್ದಾರಿ 13ರಲ್ಲಿ ಹಾದು ಹೋಗಿದ್ದು, ಅಲ್ಲದೇ ಜಿಲ್ಲೆಯ ಕೊಪ್ಪಳ ಹಾಗೂ ಯಲಬುರ್ಗಾ ತಾಲೂಕಿನ ಎಲ್ಲ ಗ್ರಾಮಗಳಿಗೆ ಕುಡಿವ ನೀರು ಪೂರೈಸುತ್ತಿದೆ. ಆದರೆ, ತೀವ್ರ ಕುಡಿವ ನೀರು ಅಭಾವ ಎದುರಿಸುತ್ತಿರುವ ತಾಲೂಕಿನ ಕಂದಕೂರು, ವಣಗೇರಿ ಕೆ.ಬೋದೂರು ತಾಂಡಾ, ಕಡೇಕೊಪ್ಪ, ಕುರಬನಾಳ, ನಡುವಲಕೊಪ್ಪ, ಕ್ಯಾದಗುಪ್ಪಾ ಗ್ರಾಮಗಳಿಗೆ ಹಾಗೂ ಕುಷ್ಟಗಿ ಪಟ್ಟಣಕ್ಕೆ ಸದ್ಯ ಕುಡಿವ ನೀರಿನ ಸಂಪರ್ಕ ಕಲ್ಪಿಸಿಕೊಡಬೇಕು. ಜಿಲ್ಲೆಯ ಇನ್ನೆರೆಡು ತಾಲೂಕಿಗೆ ನೀರು ಕೊಟ್ಟಿರುವ ಕಂಪನಿಯವರು ಕುಷ್ಟಗಿ ತಾಲೂಕಿಗೆ ಮೇಲೆ ಏಕೆ ಮಲತಾಯಿ ಧೋರಣೆ ತೋರುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಒಪ್ಪಂದಕ್ಕೆ ಬೆಲೆ ಇಲ್ಲವೇ?: ಜಿಂದಾಲ್ ಕಂಪನಿಗೆ ಕೊಳವೆ ಮಾರ್ಗ ನಿರ್ಮಾಣಕ್ಕೆ ಅನುಮತಿ ನೀಡುವಾಗ ಮಾರ್ಗ ಮಧ್ಯದಲ್ಲಿ ಬರುವ ಊರುಗಳಿಗೆ ಕುಡಿವ ನೀರು ಕೊಡುವ ಒಪ್ಪಂದವಾಗಿರುತ್ತದೆ. ಒಪ್ಪಂದ ಮಾಡಿಕೊಂಡಿರುವ ಕಂಪನಿ ಅದನ್ನು ಉಲ್ಲಂಘಿಸಿದ್ದು, ಅದಕ್ಕೆ ಬೆಲೆ ಇಲ್ಲವೇ ಎಂದು ಕರವೇ ಜಿಲ್ಲಾಧ್ಯಕ್ಷ ಬಸನಗೌಡ ಪೊಲೀಸ್‌ಪಾಟೀಲ್ ಪ್ರಶ್ನೆಸಿದ್ದಾರೆ. ಒಪ್ಪಂದದಂತೆ ಮಾರ್ಗದಲ್ಲಿ ಬರುವ ತಾಲೂಕಿನ ಗ್ರಾಮಗಳಿಗೆ ನೀರಿನ ಸಂಪರ್ಕ ಕಲ್ಪಿಸಬೇಕು. ವಿಳಂಬವಾದರೆ ತಾಲೂಕಿನ ಜನರ ಹಿತದೃಷ್ಟಿಯಿಂದ ರಾಷ್ಟ್ರೀಯ ಹೆದ್ದಾರಿ ತಡೆದು ಪ್ರತಿಭಟಿಸುವುದು ಅನಿವಾರ್ಯವಾಗುತ್ತದೆ. ಕೂಡಲೇ ಜಿಲ್ಲಾಧಿಕಾರಿ ಮಧ್ಯಸ್ಥಿಕೆ ವಹಿಸಿ ನೀರು ಒದಗಿಸಲು ಕ್ರಮಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.