ಕೆಜಿಎಫ್ ಲಕ್ಷ್ಮಿ ವೆಂಕಟರಮಣ ಉತ್ಸವ: ಅಸಮರ್ಪಕ ನೀರು ಪೂರೈಕೆ; ಆಕ್ರೋಶ

ಕೆಜಿಎಫ್: ಕೆಜಿಎಫ್‌ನ ಪ್ರಸಿದ್ಧ ಲಕ್ಷ್ಮೀ ವೆಂಕಟರಮಣ ದೇವಾಲಯದ 78ನೇ ವಾರ್ಷಿಕ ಮಹೋತ್ಸವದ ಪ್ರಯುಕ್ತ ಕೆಜಿಎಫ್ ನಗರಸಭೆ ಪೌರಾಯುಕ್ತರ ಮಾರ್ಗದರ್ಶನದಲ್ಲಿ ಜಾತ್ರೆಗೆ ಬರುವ ಭಕ್ತಾಧಿಗಳಿಗೆ ಕುಡಿಯುವ ನೀರಿನ ವ್ಯವಸ್ಥೆ ಕಲ್ಪಿಸುವ ನಿಟ್ಟಿನಲ್ಲಿ ಅನುಕೂಲ ಮಾಡಿಕೊಟ್ಟಿದ್ದರು.
ಆದರೆ, ಈ ಟ್ಯಾಂಕ್‌ಗಳಲ್ಲಿ ಪ್ರಾರಂಭದ ಎರಡು ದಿನಗಳಲ್ಲಿ ಮಾತ್ರ ನೀರನ್ನು ತುಂಬಿಸಿದ್ದು ಬಿಟ್ಟರೆ ಜಾತ್ರೆ ಪ್ರಾರಂಭವಾಗಿ 8 ದಿನಗಳು ಕಳೆಯುತ್ತಿದ್ದರೂ ಇದುವರೆಗೂ ಟ್ಯಾಂಕ್‌ಗಳಲ್ಲಿ ನೀರನ್ನು ತುಂಬಿಸುವ ಕೆಲಸ ಅಧಿಕಾರಿಗಳಾಗಲಿ ಅಥವಾ ಸಿಬ್ಬಂದಿಗಳಾಗಲಿ ಮಾಡಲಿಲ್ಲ. ದಿನೇ ದಿನೇ ಬಿಸಿಲಿನ ತಾಪಮಾನ ಹೆಚ್ಚಾಗುತ್ತಿದ್ದು, ಜಾತ್ರೆಗೆ ಬರುವ ನಾಗರಿಕರು ನೀರಿನ ದಾಹ ತಣಿಸಲು ಪರದಾಡುವಂತಾಗಿದೆ.
ಮುಜರಾಯಿ ಇಲಾಖೆಗೆ ಒಳಪಡುವ ಪ್ರಸನ್ನ ಲಕ್ಷ್ಮೀ ವೆಂಕಟರಮಣ ದೇವಾಲಯದ ಜಾತ್ರಾ ಮಹೋತ್ಸವಕ್ಕೆ ಕೋಲಾರ ಜಿಲ್ಲೆ ಹಾಗೂ ಇತರೆ ನೆರ ರಾಜ್ಯಗಳಿಂದ ಪ್ರತಿ ದಿನ ಸಾವಿರಾರು ಭಕ್ತರು ಆಗಮಿಸುತ್ತಿದ್ದಾರೆ. ಜಾತ್ರೆಯ ಪ್ರಯುಕ್ತ ಬೀದಿಗಳಲ್ಲಿ ವಿವಿಧ ಮಾರಾಟದ ಅಂಗಡಿಗಳು, ವ್ಯಾಪಾರ ವಹಿವಾಟು ನಡೆಯುತ್ತಿದ್ದು, ಇಲ್ಲಿಗೆ ಬಂದು ಹೋಗುವ ಜನರಿಗೆ ಕುಡಿಯಲು ನೀರಿಲ್ಲದೆ ಖಾಸಗಿ ಟ್ಯಾಂಕರ್‌ಗಳಿಂದ ಪ್ರತಿ ಬಿಂದಿಗೆಗೆ 3 ರೂ ಕೊಟ್ಟು ಕರೀದಿಸುತ್ತಿದ್ದಾರೆ.
ಇನ್ನಾದರೂ ಪೌರಾಯುಕ್ತರು ಇದರತ್ತ ಗಮನ ಹರಿಸಿ ಜಾತ್ರೆಗೆ ಬರುವ ಭಕ್ತಾಧಿಗಳಿಗೆ ಕುಡಿಯುವ ನೀರಿನ ವ್ಯಾವಸ್ಥೆಯನ್ನು ಮಾಡಲು ಮುಂದಾಗಬೇಕಿದೆ.