ಅಂದು ಪ್ರವಾಹ, ಇಂದು ಹರಿವೇ ಇಲ್ಲ!

ಮಡಿಕೇರಿ: ಕಾವೇರಿಯ ಉಗಮತಾಣ ತಲಕಾವೇರಿ ಮತ್ತು ದಕ್ಷಿಣ ಪ್ರಯಾಗ ಕ್ಷೇತ್ರ ಭಾಗಮಂಡಲದಲ್ಲಿಯೇ ಈ ವರ್ಷ ಮಳೆ ಕಡಿಮೆಯಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಭಾಗಮಂಡಲದಲ್ಲಿ ಈ ಸಲ 100 ಸೆಂಟಿ ಮೀಟರ್‌ನಷ್ಟು ಮಳೆಯ ಕೊರತೆ ಕಂಡುಬಂದಿದೆ.
 ಕಳೆದ ವರ್ಷ ಜುಲೈ 4 ರಂದು ತ್ರಿವೇಣಿ ಸಂಗಮದಲ್ಲಿ ಕಾವೇರಿ ಪ್ರವಾಹ ಪರಿಸ್ಥಿತಿ ಕಂಡುಬಂದಿದ್ದರೆ ಈ ಬಾರಿ ನದಿ ನೀರಿನ ಹರಿವೇ ಕ್ಷೀಣಿಸಿದೆ.
ಜುಲೈ ತಿಂಗಳ ಮೊದಲ ವಾರ ಮುಗಿಯುತ್ತಾ ಬಂದರೂ ಕೊಡಗಿನಲ್ಲಿ ವರುಣನ ಸುಳಿವಿಲ್ಲ. ಎಲ್ಲೆಡೆ ಬಿಸಿಲಿನ ವಾತವರಣವೇ ಇದ್ದು, ತುಂತುರು ಮಳೆ ಆಗಿಂದಾಗ್ಗೆ ಬರುತ್ತಿದ್ದರೂ ಮುಂಗಾರು ಮಳೆಯ ಲಕ್ಷಣವೇ ಇಲ್ಲ. ಕಾವೇರಿ ಉಗಮ ತಾಣ ತಲಕಾವೇರಿ ಮತ್ತು ತ್ರಿವೇಣಿ ಸಂಗಮ ಕ್ಷೇತ್ರ ಭಾಗಮಂಡಲದಲ್ಲಿಯೂ ವರ್ಷಧಾರೆ ಇಲ್ಲ. ಸಾಮಾನ್ಯವಾಗಿ ಕೊಡಗಿನಲ್ಲಿ ಧಾರಾಕಾರ ಮಳೆ ಆರಂಭವಾಗುವುದೇ ಬ್ರಹ್ಮಗಿರಿ ತಪ್ಪಲಿನ ತಲಕಾವೇರಿ ಮತ್ತು ಭಾಗಮಂಡಲದಲ್ಲಿ. ಆದರೆ ಈ ವರ್ಷ ತುಂತುರು ಮಳೆ ಮಾತ್ರ ಬರುತ್ತಿದೆ.
ಕಾವೇರಿ ಹರಿವು ಕ್ಷೀಣ: ಕಳೆದ ವರ್ಷ ಭಾಗಮಂಡಲದಲ್ಲಿ 214 ಸೆಂ. ಮೀಟರ್ ಮಳೆಯಾಗಿದ್ದರೆ, ಈ ವರ್ಷ 112 ಸೆಂ.ಮೀ. ಮಾತ್ರ ಮಳೆ ಬಿದ್ದಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಭಾಗಮಂಡಲದಲ್ಲಿಯೇ 102 ಸೆಂ.ಮೀ. ಗಳಷ್ಟು ಮಳೆ ಕಡಿಮೆಯಾಗಿದೆ. ಜೂನ್ ತಿಂಗಳಲ್ಲಿ ಕಳೆದ ವರ್ಷ 159 ಸೆಂ.ಮೀ. ಮಳೆಯಾಗಿದ್ದರೆ ಈ ವರ್ಷ ಜೂನ್ ತಿಂಗಳಲ್ಲಿ 73 ಸೆಂ.ಮೀ. ಮಾತ್ರ ಮಳೆ ಬಿದ್ದಿದೆ.. ಹೋಲಿಕೆಯಲ್ಲಿ ಭಾಗಮಂಡಲದಲ್ಲಿ ಜೂನ್ ತಿಂಗಲೊಂರಲ್ಲಿಯೇ 86 ಸೆಂ.ಮೀ. ಮಳೆಯಾಗಿದೆ.
 ಆಕಾಶದಲ್ಲಿ ಕಾಣುವ ಮೋಡಗಳ ಸಾಲು ಸಾಲು, ಮಳೆಯ ಸಿಂಚನ ಮಾತ್ರ ಮಾಡುತ್ತಿಲ್ಲ. ಹೀಗಾಗಿ ಕಾವೇರಿ ತವರೇ ಈಗ ಮಳೆಯಿಲ್ಲದೆ ಸೊರಗುವಂತಾಗಿದೆ.