ಸೇವಾವಧಿಯಲ್ಲಿ ಜನಪರ ಕಾಳಜಿಯಿರಲಿ

ಬ್ಯಾಡಗಿ: ಸರ್ಕಾರಿ ಸೇವೆಯಲ್ಲಿರುವವರು ಎಷ್ಟು ಅವಧಿವರೆಗೆ ಸೇವೆಯಲ್ಲಿದ್ದರು ಎಂಬುದು ಮುಖ್ಯವಲ್ಲ. ತಮ್ಮ ಸೇವಾವಧಿಯಲ್ಲಿ ಎಷ್ಟು ಜನಪರ ಕೆಲಸ ಮಾಡಿದ್ದಾರೆ ಎಂಬುದು ಮುಖ್ಯ ಎಂದು ಕೃಷಿಕ ಸಮಾಜದ ಅಧ್ಯಕ್ಷ ಗಂಗಣ್ಣ ಎಲಿ ಹೇಳಿದರು.
ತಾಲೂಕು ಕೃಷಿ ಇಲಾಖೆ ಕಾರ್ಯಾಲಯದಲ್ಲಿ ಸಹಾಯಕ ಕೃಷಿ ಅಧಿಕಾರಿ ಜಿ.ಪಿ. ಕೋರಿಶೆಟ್ಟರ್ ನಿವೃತ್ತಿ ಹಿನ್ನೆಲೆಯಲ್ಲಿ ಬೀಳ್ಕೊಡುಗೆ ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
ಸರ್ಕಾರಿ ಸೇವೆಯಲ್ಲಿರುವ ಅಧಿಕಾರಿಗಳಿಗೆ ಸರ್ಕಾರ ಲಕ್ಷ್ಮಣ ರೇಖೆ ಅಳವಡಿಸಿದೆ. ತಮ್ಮ ಇತಿಮಿತಿಗಳಲ್ಲಿ ಜನರ ಸೇವೆ ಎಂಬುದು ಅಧಿಕಾರಿಗಳ ಮುಖ್ಯ ಉದ್ದೇಶವಾಗಬೇಕು. ಅಧಿಕಾರಿಗಳಿಗೆ ಹಣ ಗಳಿಕೆ ಮುಖ್ಯವಲ್ಲ; ಪ್ರಾಮಾಣಿಕತೆ ತೋರುವ ಮೂಲಕ ಜನರ ಆಶೋತ್ತರಗಳಿಗೆ ಸ್ಪಂದಿಸುವುದು ಅವರ ಜವಾಬ್ದಾರಿ ಎಂದರು.
ಅಭಿವೃದ್ಧಿಗೆ ಸಹಕರಿಸಿ: ಸರ್ಕಾರದ ಯೋಜನೆಗಳನ್ನು ಪರಿಣಾಮಕಾರಿಯಾಗಿ ಅನುಷ್ಟಾನಗೊಳಿಸುವಲ್ಲಿ ಅಧಿಕಾರಿಗಳ ಪಾತ್ರ ಬಹುಮುಖ್ಯ. ಸಾರ್ವಜನಿಕರಿಗೆ ಸ್ಪಷ್ಟ ಮಾಹಿತಿಗಳನ್ನು ಒದಗಿಸುವ ಮೂಲಕ ಅಭಿವೃದ್ಧಿಗೆ ಸಹಕರಿಸಬೇಕು ಎಂದರು.
ಸನ್ಮಾನ ಸ್ವೀಕರಿಸಿದ ಜಿ.ಪಿ. ಕೋರಿಶೆಟ್ಟರ್ ಮಾತನಾಡಿ, ತಮ್ಮ ಸೇವಾವಧಿಯಲ್ಲಿ ಕೆಲವೊಮ್ಮೆ ಸಾರ್ವಜನಿಕರ ವರ್ತನೆಯಿಂದ ಬೇಸರಪಟ್ಟಿರುವ ಅನೇಕ ಪ್ರಸಂಗಗಳನ್ನು ನೆನಪಿಸಿಕೊಂಡ ಅವರು, ಇಲಾಖೆಗೆ ಕಳಂಕ ಬರುವಂತಹ ಯಾವುದೇ ಕೆಲಸ ಮಾಡಿಲ್ಲ. ಹೀಗಾಗಿ ತಮ್ಮ 33 ವರ್ಷಗಳ ಸೇವೆ ಸಾರ್ಥಕವೆನಿಸಿದೆ ಎಂದರು. ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಟಿ.ಎಚ್. ನಟರಾಜ, ಎಪಿಎಂಸಿ ಸದಸ್ಯ ಶಂಕರಗೌಡ ಪಾಟೀಲ, ಪುರಸಭೆ ಸದಸ್ಯರಾದ ಮುರಿಗೆಪ್ಪ ಶೆಟ್ಟರ, ಬಸವರಾಜ ಸಂಕಣ್ಣನವರ, ಶಂಭಣ್ಣ ಬಿದರಿ ರೈತ ಸಂಘ ನಗರ ಘಟಕದ ಅಧ್ಯಕ್ಷ ಚಿಕ್ಕಪ್ಪ ಛತ್ರದ ಕೃಷಿ ತಾಂತ್ರಿಕ ಸಹಾಯಕಾಧಿಕಾರಿ ದಿಲೀಪ್‌ಕುಮಾರ ಮಸೂತಿ ಇತರರಿದ್ದರು. ಲತಾ ಉದ್ಯೋಗಣ್ಣನವರ ಸ್ವಾಗತಿಸಿದರು. ಎಲ್.ಎಸ್. ಅಜಗಣ್ಣನವರ ನಿರೂಪಿಸಿ, ವಂದಿಸಿದರು.