ಅಕ್ರಮ ಮರಳುಸಾಗಣೆ: ಲಾರಿ ವಶ

ಆಲೂರು: ಅಕ್ರಮವಾಗಿ ಮರಳು ಸಾಗಿಸುತ್ತಿದ್ದ ಆರೋಪಿಯನ್ನು ಲಾರಿ ಸಮೇತ ಪೊಲೀಸರು ಹಿಡಿದಿರುವ ಘಟನೆ ಶುಕ್ರವಾರ ಸಂಜೆ ತಾಲೂಕಿನ ಹೆದ್ದುರ್ಗ ಕ್ರಾಸ್ ಬಳಿ ನಡೆದಿದೆ. ತಾಲೂಕಿನ ಹೆಮ್ಮಿಗೆ ಹೊನ್ನವಳ್ಳಿ ಗ್ರಾಮದ ಮಧು (28)  ಬಂಧಿತ ಆರೋಪಿ.
 ಈತ ತಾಲೂಕಿನ ಹೆದ್ದುರ್ಗ ಕ್ರಾಸ್ ಹತ್ತಿರ ಬಾಳ್ಯುಪೇಟೆ ಕಡೆಯಿಂದ ಲಾರಿಯಲ್ಲಿ ಮರಳು ತುಂಬಿಕೊಂಡು ಬರುತ್ತಿದ್ದಾಗ ಪೊಲೀಸರು  ತಡೆದು ವಿಚಾರಿಸಿದ್ದಾರೆ.  ಯಾವುದೇ ರಹದಾರಿ ಇಲ್ಲದೆ ಮರಳನ್ನು ಹರಿಹಳ್ಳಿ ಹತ್ತಿರ ಹೇಮಾವತಿ ನದಿಯ ಹಿನ್ನೀರಿನ ದಡದಲ್ಲಿ ತುಂಬಿಕೊಂಡು ಬರುತ್ತಿರುವುದಾಗಿ ಲಾರಿಯ ಚಾಲಕ ಮಧು ಒಪ್ಪಿಕೊಂಡಿದ್ದಾನೆ.  ಆತನನ್ನು   ಬಂಧಿಸಿದ ಪೊಲೀಸರು ಮರಳು ತುಂಬಿದ ಲಾರಿ  ವಶಪಡಿಸಿಕೊಂಡಿದ್ದಾರೆ. ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಅಕ್ರಮ ಮದ್ಯ ವಶ
ಹಾಸನ: ಜಿಲ್ಲೆಯ ಪ್ರತ್ಯೇಕ ಕಡೆಗಳಲ್ಲಿ ಅಕ್ರಮ ಮದ್ಯ ಮಾರಾಟ ಮಾಡುತ್ತಿದ್ದ ಜಾಗದ ಮೇಲೆ ದಾಳಿ ನಡೆಸಿರುವ ಪೊಲೀಸರು 3,800 ರು. ಮೌಲ್ಯದ ಮದ್ಯ ವಶಪಡಿಸಿಕೊಂಡಿರುವ ಘಟನೆ ಶುಕ್ರವಾರ ರಾತ್ರಿ ನಡೆದಿದೆ. ಅರಸೀಕೆರೆ ತಾಲೂಕಿನ  ಸಿದ್ದರಹಳ್ಳಿ.ಬಿ.ತಾಂಡ್ಯದ ಸಿದ್ದನಾಯ್ಕ ಮನೆಯಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದಾಗ ಪೊಲೀಸರು ದಾಳಿ ನಡೆಸಿದ್ದಾರೆ. ಈ ಸಂದರ್ಭದಲ್ಲಿ ಆರೋಪಿ ಪರಾರಿಯಾಗಿದ್ದಾನೆ.  ಸ್ಥಳದಲ್ಲಿದ್ದ  2420 ರು. ಬೆಲೆಯ ಮದ್ಯದ ಬಾಟಲಿಗಳನ್ನು ವಶಪಡಿಸಿಕೊಂಡಿರುವ ಗ್ರಾಮಾಂತರ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
 ತಾಲೂಕಿನ ಹೊಳೆನರಸೀಪುರ ರಸ್ತೆಯ ಕೊಂತಗೌಡನಹಳ್ಳಿ ಗ್ರಾಮದ ರಂಗೇಗೌಡರ ವಾಸದ ಮನೆಯ ಲಗತ್ತಾಗಿ ಅಂಗಡಿ ಮುಂದೆ ಅಕ್ರಮವಾಗಿ ಮದ್ಯ ಮಾರಾಟ ಮಾಡುತ್ತಿದ್ದಾಗ ಪೊಲೀಸರು ದಾಳಿ ನಡೆಸಿದ್ದಾರೆ. ಆರೋಪಿ ಪರಾರಿಯಾಗಿದ್ದಾನೆ. ಸ್ಥಳದಲ್ಲಿದ್ದ 1340 ರು. ಬೆಲೆಯ 25 ವಿಸ್ಕಿ,180 ಎಂಎಲ್‌ನ ಪ್ಯಾಕೆಟ್‌ಗಳು, 90 ಎಂಎಲ್‌ನ 15 ಪ್ಯಾಕೇಟ್‌ಗಳನ್ನು ವಶಪಡಿಸಿಕೊಂಡಿರುವ ಗ್ರಾಮಾಂತರ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
ಯುವತಿ ನಾಪತ್ತೆ
ಹಾಸನ: ನಗರದ ಪೆನ್ಷನ್ ಮೊಹಲ್ಲಾ ಶಾಯಿಮಸೀದಿ ಹತ್ತಿರದ ವಾಸಿ ಸೈಯದ್ ಸಿಖಂದರ್ ಅವರ ಅಣ್ಣನ ಮಗಳು ರೋಷನ್‌ಬಾನು  (19)  ಟೈಲರಿಂಗ್ ಕೆಲಸಕ್ಕೆ ಹೋಗುವುದಾಗಿ ಹೇಳಿ ಹೋದವರು ನಾಪತ್ತೆಯಾಗಿರುವ ಘಟನೆ ಇತ್ತೀಚೆಗೆ ನಡೆದಿದೆ.