ಕೋಳಗುಂದ ಗೊಲ್ಲರಹಟ್ಟಿಯಲ್ಲಿ ಜನಜಾಗೃತಿ ಕಾರ್ಯಕ್ರಮ

ಜಾವಗಲ್: ಮಹಿಳೆಯರ ಆರೋಗ್ಯ ದೃಷ್ಟಿಯಿಂದ ಸ್ನಾನಗೃಹ ಮತ್ತು ಶೌಚಾಲಯಗಳನ್ನು ಕಡ್ಡಾಯವಾಗಿ ವ್ಯವಸ್ಥೆಗೊಳಿಸುವಂತೆ ತಹಸೀಲ್ದಾರ್ ಜಗದೀಶ್ ತಿಳಿಸಿದರು.
 ಜಾವಗಲ್ ಹೋಬಳಿ ಕೋಳಗುಂದ ಗೊಲ್ಲರಹಟ್ಟಿಯಲ್ಲಿ ಜಾವಗಲ್ ಪೊಲೀಸ್ ಠಾಣೆಯಿಂದ ಮಂಗಳವಾರ ಏರ್ಪಡಿಸಿದ್ದ ಜನಜಾಗೃತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಮಾನವ ಹಕ್ಕುಗಳ ಘೋಷಣೆಯಲ್ಲಿ ಮಹಿಳೆಯರಿಗೆ ಸೂಕ್ತ ಸೌಲಭ್ಯ ಕಲ್ಪಿಸ ಬೇಕು, ಇಲ್ಲದಿದ್ದಲ್ಲಿ ಕಾನೂನು ಕ್ರಮ ಕೈಗೊಳ್ಳಲಾಗುವುದೆಂದು ಎಚ್ಚರಿಕೆ ನೀಡಿದರು.  ಯಾದವ ಜನಾಂಗದಲ್ಲಿ ಇಂದಿಗೂ ರೂಢಿಯಲ್ಲಿರುವ ಋತುಮತಿ ಮತ್ತು ಜನನಕಾಲದಲ್ಲಿನ ಅನಿಷ್ಟ ಪದ್ಧತಿಯನ್ನು ದೂರ ಮಾಡಿ ಸಮಾಜದ ಮುಖ್ಯ ವಾಹಿನಿಯಲ್ಲಿ ಬೆರೆಯುವಂತೆ ತಿಳಿಸಿದರು. ಸಮಾಜದ ಏಳಿಗೆಗೆ ಶೈಕ್ಷಣಿಕ ಸುಧಾರಣೆ ಅಗತ್ಯವೆಂದರಲ್ಲದೆ ಸಮಾಜದ ಅನಿಷ್ಟ ಪದ್ಧತಿ ದೂರ ಮಾಡುವುದರಿಂದ ಮಹಿಳೆಯ ಆರೋಗ್ಯ ಸುಧಾರಣೆ ಉಂಟಾಗುತ್ತದೆ. ಪ್ರಸ್ತುತ ಸನ್ನಿವೇಶದಲ್ಲಿ ಸಂಪ್ರದಾಯಬದ್ಧ ಸಮಾಜದ ಬದಲಾವಣೆ ಆಗಬೇಕೆಂದರು.   ಅಧ್ಯಕ್ಷತೆ ವಹಿಸಿದ್ದ  ಡಿವೈಎಸ್ಪಿ ಮಂಜುನಾಥ್ ಮಾತನಾಡಿದರು. ಗ್ರಾಪಂ ಅಧ್ಯಕ್ಷೆ ಸಣ್ಣಮ್ಮ, ಕಂದಾಯ ಅಧಿಕಾರಿ ರಮೇಶ್, ಡಾ.ಪ್ರೇಮಾನಂದ್, ಹೇಮಾವತಿ ಮಹಾಲಿಂಗಪ್ಪ, ಹಾಲಪ್ಪ ಸದಸ್ಯ ಲೋಹಿತ್, ಪಿಡಿಓ ಮಂಜುಳಾ,  ಸಿಂಧು ಸಿಆರ್ಪಿ ರಮೇಶ್ ಇದ್ದರು.