ಇಂದಿನಿಂದ ಗ್ರಾಮ ಸಂದರ್ಶನ ಯಾತ್ರೆ

ಗಜೇಂದ್ರಗಡ: ಜೆಡಿಎಸ್‌ನಿಂದ ರೋಣ ಮತ ಕ್ಷೇತ್ರದಾದ್ಯಂತ ಫೆ. 11ರಿಂದ 24ರ ವರೆಗೆ ಮ್ಯಾಕಲಝರಿ ಗ್ರಾಮದಿಂದ ಗ್ರಾಮ ಸಂದರ್ಶನ ಯಾತ್ರೆ ನಡೆಯಲಿದೆ. ಮಾಜಿ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿಯವರ 20 ತಿಂಗಳ ಅಧಿಕಾರಾವಧಿಯಲ್ಲಿ ನಾಡಿನ ಸಮಗ್ರ ಅಭಿವೃದ್ಧಿಗಾಗಿ ಕೈಗೊಂಡ ಯೋಜನೆಗಳನ್ನು ಜನತೆಗೆ ತಿಳಿಸುವ ಉದ್ದೇಶದಿಂದ ಜೆಡಿಎಸ್ ಮುಖಂಡ ಹೇಮಗಿರೀಶ ಹಾವಿನಾಳ ನೇತೃತ್ವದಲ್ಲಿ, ಪಕ್ಷದ ಜಿಲ್ಲಾಧ್ಯಕ್ಷ ವಿಶ್ವನಾಥ ಕಪ್ಪತನವರ, ರವಿ ದಂಡಿನ, ಶರಣಪ್ಪ ರೇವಡಿ, ನಿಂಗನಗೌಡ ಪಾಟೀಲ, ಡಾ. ಮಂಜುನಾಥ ವಿಶ್ವಬ್ರಾಹ್ಮಣ, ಎಚ್.ಎಸ್. ಸೋಂಪುರ, ರಾಮಣ್ಣ ಸಕ್ರೋಜಿ, ಕಳಕಪ್ಪ ಕೊಡತಗೇರಿ, ಸೇರಿದಂತೆ ಹಲವಾರು ಮುಖಂಡರು ಪಾಲ್ಗೊಳ್ಳುವರೆಂದು ಪಕ್ಷದ ಪ್ರಧಾನ ಕಾರ್ಯದರ್ಶಿ ಉಮೇಶ ಮಲ್ಲಾಪುರ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಇಂದು ಪ್ರತಿಭಟನೆ
ಗದಗ: ದಲಿತ ಯುವ ಸೇನಾ ಸಮಿತಿ, ರಾಜ್ಯ ರೇಲ್ವೆ ಅಭಿವೃದ್ಧಿ ಹೋರಾಟ ಸಮಿತಿ ಗದಗ ಘಟಕ ಹಾಗೂ ವಿವಿಧ ಸಂಘಟನೆಗಳ ಆಶ್ರಯದಲ್ಲಿ 54 ವಕಾರ ಸಾಲುಗಳನ್ನು ನಗರಸಭೆ ಕಬ್ಜಾಕ್ಕೆ ತೆಗೆದುಕೊಳ್ಳಲು ಒತ್ತಾಯಿಸಿ ಫೆ. 11ರ ಬೆಳಗ್ಗೆ 10ಕ್ಕೆ ಪ್ರತಿಭಟನಾ ರ್ಯಾಲಿ ಹಮ್ಮಿಕೊಳ್ಳಲಾಗಿದೆ. ರ್ಯಾಲಿಯು ನಗರದ ಕಿತ್ತೂರ ಚೆನ್ನಮ್ಮ ವೃತ್ತದಿಂದ ಪ್ರಾರಂಭಿಸಿ ಜಿಲ್ಲಾಧಿಕಾರಿ ಕಚೇರಿ ವರೆಗೆ ಸಾಗಿ ಜಿಲ್ಲಾಧಿಕಾರಿ ಮೂಲಕ ರಾಜ್ಯಪಾಲರಿಗೆ ಮನವಿ ಸಲ್ಲಿಸಲಾಗುವುದು. ಪ್ರತಿಭಟನೆಯಲ್ಲಿ ದಲಿತ ಯುವ ಸೇನಾ ಸಮಿತಿಯ ಅಧ್ಯಕ್ಷ ವಿಜಯ ಮುಳಗುಂದ, ರಾಜ್ಯ ರೇಲ್ವೆ ಅಭಿವೃದ್ಧಿ ಹೋರಾಟ ಸಮಿತಿಯ ಅಧ್ಯಕ್ಷ ನಿಸಾರಅಹ್ಮದ ಖಾಜಿ, ದಲಿತ ಸಂಘರ್ಷ ಸಮಿತಿ ನಾಗವಾರ ಬಣದ ಜಿಲ್ಲಾ ಸಂಚಾಲಕ ಪ್ರಕಾಶ ಕೆಲೂರ, ಹಮಾಲರ ಸಂಘದ ರಾಜ್ಯಾಧ್ಯಕ್ಷ ಅಯ್ಯಪ್ಪ ನಾಯ್ಕರ, ದಲಿತ ಸಂಘರ್ಷ ಸಮಿತಿ, ದೇವಪ್ಪ ಲಿಂಗದಾಳ, ವಿವಿಧ ಸಂಘಟನೆಗಳ ಅಧ್ಯಕ್ಷರು, ಪದಾಧಿಕಾರಿಗಳು ಭಾಗವಹಿಸುವರೆಂದು ಪ್ರಕಟಣೆ ತಿಳಿಸಿದೆ.
ನೀರು ಪೂರೈಕೆ ಮಾಹಿತಿ
ಗದಗ:  ಬಸವೇಶ್ವರ ನಗರ, ಮಹೇಂದ್ರಕರ ವೃತ್ತ, ಹಳೆ ಬಸ್‌ಸ್ಟ್ಯಾಂಡ್ ರಸ್ತೆ, ಕಮ್ಮಾರ ಸಾಲ, ಹಳೇ ವಕಾರ ಸಾಲ, ಡಿ.ಸಿ. ಮಿಲ್ ರಸ್ತೆ, ಸೋಮೇಶ್ವರ ಗುಡಿ ಲೈನ್ ಈ ಭಾಗಗಳಲ್ಲಿ ಸೋಮವಾರ ನದಿ ನೀರು ಪೂರೈಕೆ ಮಾಡಲಾಗುವುದು ಎಂದು ನಗರಸಭೆಯ ಪ್ರಕಟಣೆ ತಿಳಿಸಿದೆ.