25ರಿಂದ ಪಣಂಬೂರಲ್ಲಿ ಬೀಚ್ ಉತ್ಸವ

ಮಂಗಳೂರು: ಕರಾವಳಿ ಉತ್ಸವ ಅಂಗವಾಗಿ ಬೀಚ್ ಉತ್ಸವ ಜ.25ರಿಂದ 27ರ ವರೆಗೆ ಪಣಂಬೂರು ಬೀಚ್‌ನಲ್ಲಿ ನಡೆಯಲಿದೆ. ಉತ್ಸವ ಸಮಿತಿ ಅಧ್ಯಕ್ಷ, ಸ.ಆಯುಕ್ತ ಡಾ.ವೆಂಕಟೇಶ್ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು. 25ರಂದು ಸಂಜೆ 4ಕ್ಕೆ ಬೀಚ್ ಉತ್ಸ ಮತ್ತು ಆಹಾರೋತ್ಸವವನ್ನು ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಟಿ. ರವಿ ಉದ್ಘಾಟಿಸಲಿದ್ದಾರೆ. ಟೀಮ್ ಮಂಗಳೂರು ತಂಡದ ಆಕರ್ಷಕ ಗಾಳಿಪಟ ಹಾರಾಟ ಪ್ರದರ್ಶನ, 6.30ರಿಂದ ಆಯ್ದ ತಂಡಗಳಿಂದ ನೃತ್ಯ ಸ್ಪರ್ಧೆ, ಸಂಗೀತ ಸ್ಪರ್ಧೆ ಏರ್ಪಡಲಿದೆ. 26ರಂದು ಸಂಜೆ 4ರಿಂದ ಗಾಳಿಪಟ ಹಾರಾಟ ಪ್ರದರ್ಶನ, ಬೇಬಿ ಬೀಚ್ ಸ್ಪರ್ಧೆ, ಸಂಗೀತ ಸ್ಪರ್ಧೆ ನಡೆಯಲಿದೆ. 27ರಂದು ಬೆಳಗ್ಗೆ 8ರಿಂದ ಶಾಲಾ ಮಕ್ಕಳಿಗೆ ಸ್ಕೇಟಿಂಗ್ ಸ್ಪರ್ಧೆ, 11ರಿಂದ ನಾಡದೋಣಿಗಳ ಸ್ಪರ್ಧೆ, ಸಮುದ್ರದಲ್ಲಿ ಈಜು ಸ್ಪರ್ಧೆ, ಮರಳಿನಲ್ಲಿ ಆಕೃತಿ ರಚನೆ ಸ್ಪರ್ಧೆ, ಸಂಜೆ 3ರಿಂದ ಗಾಳಿಪಟ ಹಾರಾಟ ಪ್ರದರ್ಶನ, 6ರಿಂದ ಸಮಾರೋಪ, ಬಳಿಕ ಗಾಯಕ ಯುಫೋರಿಯಾ ತಂಡದಿಂದ ಸಂಗೀತ ರಸಮಂಜರಿ ಜರುಗಲಿದೆ ಎಂದರು. ಮೀನುಗಾರಿಕಾ ಉಪನಿರ್ದೇಶಕ ಸುರೇಶ್ ಕುಮಾರ್, ಪಡಿತರ ಪೂರೈಕೆ ಉಪನಿರ್ದೇಶಕ ಶರಣಬಸಪ್ಪ, ಬೀಚ್ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ಯತೀಶ್ ಬೈಕಂಪಾಡಿ ಇದ್ದರು.