ನಾಳೆ ಜಿಲ್ಲೆ ಬಂದ್

ಚಾಮರಾಜನಗರ: ತಾಳವಾಡಿ ಫಿರ್ಕಾದ ಕನ್ನಡ ಮಾಧ್ಯಮ ಶಾಲೆಗಳಲ್ಲಿ ಕನ್ನಡವನ್ನು ದ್ವಿತೀಯ ಭಾಷೆಯನ್ನಾಗಿ ಮಾಡಿರುವ ಕ್ರಮ ವಿರೋಧಿಸಿ ಕನ್ನಡ ಸಂಘಟನೆಗಳ ವತಿಯಿಂದ ಜ. 24ರಂದು ಚಾಮರಾಜನಗರ ಬಂದ್ ಮಾಡಲಾಗುವುದು ಎಂದು ಜಿಲ್ಲಾ ಕರವೇ ಅಧ್ಯಕ್ಷ ಚಾ.ಗು.ನಾಗರಾಜು ತಿಳಿಸಿದರು.
ಮಂಗಳವಾರ ನಗರದ ಭುವನೇಶ್ವರಿ ವೃತ್ತದಲ್ಲಿ ಕರವೇ ಕಾರ್ಯಕರ್ತರು ಕೆಲಕಾಲ ರಸ್ತೆ ತಡೆ ನಡೆಸಿ ನಂತರ ಮಾತನಾಡಿ, ತಮಿಳುನಾಡು ಸರ್ಕಾರ ಭಾಷಾ ನೀತಿಯನ್ನು ಉಲ್ಲಂಘಿಸಿರುವುದಲ್ಲದೆ, ಕನ್ನಡಿಗರ ಮೇಲೆ ಪೊಲೀಸ್ ದೌರ್ಜನ್ಯ ನಡೆಸಿದೆ. ಒಬ್ಬ ತಮಿಳು ಪಾದ್ರಿಗೆ ಇಡಿ ತಮಿಳುನಾಡು ಸರ್ಕಾರ ಬೆಂಬಲವಾಗಿ ನಿಂತು ಕನ್ನಡಿಗರ ಮೇಲೆ ದೌರ್ಜನ್ಯ ಎಸಗಲು ಮುಂದಾಗಿರುವುದು ಒಳ್ಳೆಯ ಬೆಳವಣಿಗೆಯಲ್ಲ ಎಂದರು.
24ರ ಬಂದ್ ಎಚ್ಚರಿಕೆ ಗಂಟೆ: ತಮಿಳುನಾಡು ಸರ್ಕಾರ ಕನ್ನಡಕ್ಕಿದ್ದ ಪ್ರಥಮ ಭಾಷೆ ಸ್ಥಾನವನ್ನು ದ್ವಿತೀಯ ಭಾಷೆಯನ್ನಾಗಿ ಮಾಡಿರುವುದು ಹಾಗೂ ತಾಳವಾಡಿ ಬಂದ್ ಸಂದರ್ಭದಲ್ಲಿ ಬಂಧಿತರಾಗಿರುವ ಕನ್ನಡಿಗರ ಬಿಡುಗಡೆಗೆ ಆಗ್ರಹಿಸಿ, ಜ.24ರಂದು ಚಾಮರಾಜನಗರ ಬಂದ್‌ಗೆ ಕರೆ ನೀಡಿದ್ದು, ಫೆ.2ರಂದು ಮಾಜಿ ಶಾಸಕ ವಾಟಾಳ್ ನಾಗರಾಜ್ ನೇತೃತ್ವದಲ್ಲಿ ತಾಳವಾಡಿ ಮುತ್ತಿಗೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.
ಈ ಸಂಬಂಧ ಗಡುವು ನೀಡಿರುವವರೆಗೆ ಕನ್ನಡಿಗರ ಮೇಲೆ ದೌರ್ಜನ್ಯ ನಿಲ್ಲಬೇಕು. ಕನ್ನಡವನ್ನು ಪ್ರಥಮ ಭಾಷೆಯನ್ನಾಗಿ ಮಾಡಿ, 100 ಅಂಕಗಳನ್ನು ನಿಗದಿ ಮಾಡಬೇಕು. ಈಗಾಗಲೇ ಬಂಧನದಲ್ಲಿರುವ ಕನ್ನಡಿಗರ ಬಿಡುಗಡೆಗೆ ಕ್ರಮ ಕೈಗೊಳ್ಳಬೇಕು. ರಾಜ್ಯ ಸರ್ಕಾರ ಕೂಡಲೇ ತಮಿಳುನಾಡು ಸರ್ಕಾರದ ಜೊತೆ ಸಮಾಲೋಚಿಸಿ, ಕನ್ನಡಿಗರ ರಕ್ಷಣೆಗೆ ಮುಂದಾಗಬೇಕು. ಇಲ್ಲದಿದ್ದಲ್ಲಿ ಫೆ.2ರಂದು 2 ಸಾವಿರಕ್ಕೂ ಹೆಚ್ಚು ಕನ್ನಡ ಪರ ಕಾರ್ಯಕರ್ತರು ತಾಳವಾಡಿಗೆ ಮುತ್ತಿಗೆ ಹಾಕುತ್ತಾರೆ. ಮುಂದೆ ಅಲ್ಲಿ ನಡೆಯುವ ಅನಾಹುತಗಳಿಗೆ ತಮಿಳುನಾಡು ಸರ್ಕಾರವೇ ಹೊಣೆಯಾಗಬೇಕಾಗುತ್ತದೆ ಎಂದು ಎಚ್ಚರಿಸಿದರು.
ಪ್ರತಿಭಟನೆಯಲ್ಲಿ ಕರ್ನಾಟಕ ಸೇನಾಪಡೆ ರಾಜ್ಯಾಧ್ಯಕ್ಷ ಚಾ.ರಂ.ಶ್ರೀನಿವಾಸಗೌಡ, ಕಾರ್ಯದರ್ಶಿರಾಜಗೋಪಾಲ್, ಶಿವಣ್ಣಶೆಟ್ಟಿ, ಸಿ.ಸಿ.ಪ್ರಕಾಶ್, ಆಟೋ ಬಸವರಾಜು, ಶಿವರಾಜು, ಸಿ.ಗುರುಸ್ವಾಮಿ, ರಾಮಸಮುದ್ರ ಶಿವಕುಮಾರ್, ಸ್ವಾಮಿ, ಮುರಳೀಧರ, ಚಾಮರಾಜು, ಆರ್.ಪಿ.ಶಿವಮಲ್ಲು ಸೇರಿದಂತೆ ಇತರರಿದ್ದರು.