ನಾಗರಹೊಳೆ ಹಲವೆಡೆ ಮಳೆ

ಹುಣಸೂರು: ನಾಗರಹೊಳೆ ರಾಷ್ಟ್ರೀಯ ಉದ್ಯಾನದ ಹಲವು ವಲಯಗಳಲ್ಲಿ ಭರ್ಜರಿ ಮಳೆಯಾಗಿದ್ದು, ವನ್ಯಜೀವಿಗಳಿಗೆ ಹಾಗೂ ಪ್ರಾಣಿಪ್ರಿಯರ ಮನಸ್ಸಿಗೆ ಸಂತಸ ಮೂಡಿಸಿದೆ.
ಒಂದು ಗಂಟೆಗೂ ಹೆಚ್ಚು ಕಾಲ ವೀರನಹೊಸಳ್ಳಿ, ಕಲ್ಲಳ್ಳ, ಮೇಟಿಕುಪ್ಪೆ, ಆನೆಚೌಕೂರು ವಲಯಗಳಲ್ಲಿ ಬಿದ್ದ ಮಳೆಯು ಅರಣ್ಯವನ್ನು ತಂಪಾಗಿಸಿದೆ. ಮತ್ತೊಂದೆಡೆ ಕೆರೆ-ಕಟ್ಟೆಗಳಿಗೆ ಅಲ್ಪಸ್ವಲ್ಪ ನೀರು ತುಂಬಿದೆ.
ಕಳೆದ ವರ್ಷ ಈ ಭಾಗದಲ್ಲಿ ಅತಿ ಕಡಿಮೆ ಪ್ರಮಾಣ ಮಳೆಯಾಗಿತ್ತು. ಆದ್ದರಿಂದ ಅರಣ್ಯ ಪ್ರದೇಶದಲ್ಲಿ ವನ್ಯಜೀವಿಗಳಿಗೆ ಆಹಾರ ಮತ್ತು ನೀರಿನ ತೀವ್ರ ಕೊರತೆ ಏರ್ಪಟ್ಟಿತ್ತು. ಅದೂ ಅಲ್ಲದೆ ಈ ಸಮಯ ಅರಣ್ಯಕ್ಕೆ ಬೆಂಕಿ ಬೀಳುವ ಸಮಯವಾಗಿದ್ದು, ಈಗ ಬಿದ್ದಿರುವ ವರ್ಷಧಾರೆಯಿಂದಾಗಿ ಬೆಂಕಿಯಿಂದ ಅರಣ್ಯ ಪಾರಾಗಿರುವುದು ನೆಮ್ಮದಿ ವಿಚಾರವಾಗಿದೆ. ಮತ್ತಷ್ಟು ಮಳೆ ಬಿದ್ದಲ್ಲಿ ಕೆರೆಕಟ್ಟೆಗಳು ತುಂಬಿ ವನ್ಯಜೀವಿಗಳ ನೀರಿನ ದಾಹ ಇಂಗಿಸಲು ಸಹಕಾರಿಯಾಗಲಿದೆ.
ಮೈಸೂರಲ್ಲಿ ಮಳೆ: ಮೈಸೂರಿನಲ್ಲಿ ಶುಕ್ರವಾರ ರಾತ್ರಿ ಜೋರು ಮಳೆ ಬಿದ್ದಿತು. ಮಧ್ಯಾಹ್ನ ನಗರದ ಕೆಲವೆಡೆ ತುಂತುರು ಮಳೆಯಾಗಿತ್ತು. ರಾತ್ರಿ 9ರ ಸುಮಾರಿಗೆ ಜೋರು ಮಳೆಯಾಯಿತು.