ಅನ್ನ ಕೊಡುವವನು ರೈತನೇ ಹೊರತು ರಾಜಕಾರಣಿಯಲ್ಲ

ಚಾಮರಾಜನಗರ: ಹಸಿದ ಹೊಟ್ಟೆಗೆ ರೈತ ಅನ್ನ ಕೊಡುವನೇ ಹೊರತೂ, ನಮ್ಮಿಂದಲೇ ರಾಜ್ಯ ಎಂದು ಭಾವಿಸಿರುವ  ರಾಜಕಾರಣಿಯಲ್ಲ ಎಂದು ನರ್ಮದಾ ಬಚಾವೋ ಆಂದೋಲನದ ಹೋರಾಟಗಾರ್ತಿ ಮೇಧಾ ಪಾಟ್ಕರ್ ಹೇಳಿದರು.
ಅವರು ತಾಲೂಕಿನ ಹೊಂಡರಬಾಳು ಗ್ರಾಮದ ಅಮೃತಭೂಮಿ ಅಂತಾರಾಷ್ಟ್ರೀಯ ಸುಸ್ಥಿರ ಅಭಿವೃದ್ಧಿ ಕೇಂದ್ರದ ಆವರಣದಲ್ಲಿ 4 ದಿನಗಳ ರಾಷ್ಟ್ರೀಯ ರೈತ ಕಾರ್ಯಕರ್ತರ ಅಧ್ಯಯನ ಶಿಬಿರದ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿ, ರಾಜಕಾರಣಿಗಳು ಮತ್ತು ಕಾರ್ಪೋರೇಟ್ ಕಂಪನಿಗಳು ನಮ್ಮನ್ನು ಸೇವಕರನ್ನಾಗಿ ನೋಡುತ್ತಾ ನಮ್ಮಿಂದ ಎಲ್ಲವನ್ನು ಕಿತ್ತುಕೊಂಡು, ನಮ್ಮ ಭೂಮಿಯ ಮೇಲೆ ಕಣ್ಣಿಟ್ಟಿದ್ದಾರೆ. ಕೇರಳದಲ್ಲಿ ಸಾವಿರಾರು ಮಂದಿ 10 ವರ್ಷಗಳ ತನಕ ಹೋರಾಡಿದರು. ದೊಡ್ಡ ಅಣೆಕಟ್ಟು ಸೇರಿದಂತೆ ಸಾವಿರಾರು ಎಕರೆ ಮುಳುಗಡೆಯಾಯಿತು. ಈ ಸಂದರ್ಭದಲ್ಲಿ ಯಾವುದೇ ರಾಜ್ಯದಲ್ಲಿ ಭೂಮಿ ಉಳಿದಿದೆ ಎಂದರೆ ಅದು ಅಮೃತಭೂಮಿಯಾಗಿದೆ ಎಂದರು.
ಶೇ.14 ಮಂದಿಯ ಅನುಕೂಲಕ್ಕಾಗಿ ದಿಲ್ಲಿ, ಮುಂಬೈನಲ್ಲಿ ಕಾರಿಡಾರ್ ಮಾಡಲು ಯೋಜನೆ ನಡೆಯುತ್ತಿದೆ. ಇಂದು ಕುಲಾಂತರಿ ಬೀಜದ ದೆಸೆಯಿಂದ ನಮ್ಮ ಬಿತ್ತನೆ ಬೀಜದ ಮೇಲೆ ಆಕ್ರಮಣ ನಡೆಯುತ್ತಿದೆ. ಅಂತಾರಾಷ್ಟ್ರೀಯ ಪಿತೂರಿಯಿಂದ ನಮ್ಮ ರೈತ ಮಹಿಳೆಯರು, ದಲಿತರನ್ನು ಕೇಳದೆಯೇ ಜಾಗತೀಕರಣ ಒಪ್ಪಂದಕ್ಕೆ ಸಹಿ ಮಾಡಲಾಗಿದೆ. ಸಂವಿಧಾನದಲ್ಲಿ ಇಂಥವುಗಳಿಗೆ ಅವಕಾಶ ನೀಡದೇ ತಿದ್ದುಪಡಿ ತರುವ ಅಗತ್ಯವಿದೆ ಎಂದರು.
ಜೈಲಿಗೆ ಹೋಗುವುದೇ ಗೌರವ: ನಾವು ಹೋರಾಟದ ಶೃಂಗದಲ್ಲಿದ್ದು, ಈಗಲೂ ಮಧ್ಯಪ್ರದೇಶದಲ್ಲಿ ಹಲವಾರು ಮಂದಿ ಹೋರಾಟಗಾರರು ಜೈಲಿನಲ್ಲಿದ್ದಾರೆ. ಹೋರಾಟಗಾರರಾದ ನಾವು ಜೈಲಿಗೆ ಹೋಗುವುದೇ ಗೌರವ ಎಂದು ಭಾವಿಸಿದ್ದೇವೆ. ರೈತರ ಬೆಳೆಗಳಿಗೆ ಬೆಂಬಲ ಬೆಲೆ ಕೊಡದೆ, ಅವರು ಆತ್ಮಹತ್ಯೆ ಮಾಡಿಕೊಳ್ಳುವ ಹಂತಕ್ಕೆ ತಂದು ನಿಲ್ಲಿಸಲಾಗಿದೆ. ಇದು ರೈತರ ಆತ್ಮಹತ್ಯೆಯಲ್ಲ, ಬೇಸಾಯದ ಕೊಲೆ ಎಂದರು.