ರಸ್ತೆ ಕಾಮಗಾರಿಗೆ ಭೂಮಿ ಪೂಜೆ

ಬಿಜಾಪುರ: ಐತಿಹಾಸಿಕ ನಗರ ಬಿಜಾಪುರದಲ್ಲಿ ಫೆ. 9, 10, 11ರಂದು ನಡೆಯಲಿರುವ 79ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಅಂಗವಾಗಿ ನಗರೋತ್ಥಾನ ಯೋಜನೆಯಡಿ ಬಿಜಾಪುರ ನಗರದ ಇಬ್ರಾಹಿಂಪೂರದ ಗುರುಪಾದೇಶ್ವರ ಕಾಲನಿ, ಕೆ.ಕೆ. ಕಾಲನಿ ರಸ್ತೆ ಡಾಂಬರೀಕರಣ ಹಾಗೂ ಸಿಸಿ ರಸ್ತೆ ನಿರ್ಮಾಣಕ್ಕೆ ಗುರುವಾರ ಶಾಸಕ ಅಪ್ಪಾಸಾಹೇಬ ಪಟ್ಟಣಶೆಟ್ಟಿ ಭೂಮಿ ಪೂಜೆ ನೆರವೇರಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಇಬ್ರಾಹಿಂಪುರ ರಸ್ತೆಯನ್ನು ರು. 48 ಲಕ್ಷ ವೆಚ್ಚದಲ್ಲಿ ನಿರ್ಮಿಸಲಾಗುತ್ತಿದೆ. ಅದೇ ರೀತಿ ನಗರದ ವಿವಿಧ ರಸ್ತೆಗಳ ಡಾಂಬರೀಕರಣ ತ್ವರಿತವಾಗಿ ಕೈಗೊಂಡು ಸಮ್ಮೇಳನಕ್ಕೆ ಸುಂದರ ರಸ್ತೆಗಳ ನಿರ್ಮಾಣಕ್ಕೆ ಯುದ್ದೋಪಾದಿಯಲ್ಲಿ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಸಾಹಿತ್ಯ ಸಮ್ಮೇಳನಕ್ಕೆ ನಗರದ ರಸ್ತೆಗಳು ಸಿದ್ಧಗೊಳಿಸಲು ಈಗಾಗಲೆ ಗುತ್ತಿಗೆದಾರರಿಗೆ ಸೂಚಿಸಲಾಗಿದೆ ಎಂದು ತಿಳಿಸಿದರು.
ಈ ಸಂದರ್ಭದಲ್ಲಿ ನಗರಸಭೆ ಉಪಾಧ್ಯಕ್ಷ ಚನ್ನಬಸಪ್ಪ ಬಜಂತ್ರಿ, ಪೌರಾಯುಕ್ತ ಎಸ್.ಜಿ. ರಾಜಶೇಖರ, ಸಹಾಯಕ ಕಾರ್ಯಪಾಲಕ ಅಭಿಯಂತರ                   ರಾಜು ಹೇರಲಗಿ, ಶ್ರೀಧರ ಹಳ್ಳಿ, ರಮೇಶ ಕೌಲಗಿ ಉಪಸ್ಥಿತರಿದ್ದರು.