'ಪುತಿನಗೆ ಜ್ಞಾನಪೀಠ ದೊರೆಯಬೇಕಿತ್ತು'

ಬೆಂಗಳೂರು: ಪು.ತಿ.ನ ಅವರಂತಹ ಸಮರ್ಥ ಕವಿಗೆ ನ್ಯಾಯವಾಗಿ ಜ್ಞಾನಪೀಠ ಪ್ರಶಸ್ತಿ ದೊರೆಯಬೇಕಿತ್ತು ಎಂದು ನಾಡೋಜ ಪ್ರೊ.ಜಿ. ವೆಂಕಟಸುಬ್ಬಯ್ಯ ಅಭಿಪ್ರಾಯಪಟ್ಟರು.
ಬಸವನಗುಡಿ ನ್ಯಾಷನಲ್ ಕಾಲೇಜಿನಲ್ಲಿ 'ಚತುರ್ಮುಖ'ದಿಂದ ಹಮ್ಮಿಕೊಳ್ಳಲಾಗಿದ್ದ ಜಿ. ವೆಂಕಟಸುಬ್ಬಯ್ಯ 101ರ ಸಂಭ್ರಮ ಕಾರ್ಯಕ್ರಮದಲ್ಲಿ ಪುಸ್ತಕ ಬಿಡುಗಡೆಗೊಳಿಸಿ ಅವರು ಮಾತನಾಡಿದರು.
ಸಾಹಿತಿಗಳು ಹೊರಗಣ್ಣಿನಲ್ಲಿ ಒಳನೋಟ ಹೊಂದಿರುತ್ತಾರೆ. ಅಂತರಂಗದಲ್ಲಿ ಯೋಚನೆ ಮಾಡಿ ಸಾಹಿತ್ಯ ರಚನೆ ಮಾಡುತ್ತಾರೆ. ಇತರರ ಅಂತರಂಗವನ್ನು ಅರಿತಾಗ ಅವರ ಯೋಚನೆಗಳು ನಮಗೆ ಕಾಣಿಸುತ್ತದೆ ಎಂದು ಹೇಳಿದರು. ನನ್ನ ಹೊರಗಣ್ಣು ಒಳಗೆ ಹೋಗುತ್ತಿರುವಾಗ ಡಾ. ಕಮಲಾ ಹೆಮ್ಮಿಗೆ ಅವರ 'ಒಳಗಣ್ಣಿನ ಹೊರನೋಟ' ಎಂಬ ಪುಸ್ತಕ ಬಿಡುಗಡೆ ಮಾಡಿದ್ದೇನೆ. 100 ವರ್ಷ ದಾಟಿದ ಮೇಲೆ ಇಂತಹ ಪುಸ್ತಕ ಬಿಡುಗಡೆ ಮಾಡಲು ಸಾಮರ್ಥ್ಯವಿರಬೇಕು ಎಂದರು.
ಗೌರಿ ಸುಂದರ್ ಸಂಪಾದಿಸಿದ ಜಿ.ವಿ. ಶಬ್ದ ಭಂಡಾರಿ, ಎನ್. ಆನಂದರಾಮರಾವ್ ಅವರ ನಿವೃತ್ತಿ ನೆಮ್ಮದಿ, ಎಚ್.ಆರ್. ಪದ್ಮಿನಿ ಅವರ ಪುಸ್ತಕಗಳನ್ನು ಬಿಡುಗಡೆಗೊಳಿಸಲಾಯಿತು. ಪದ್ಮಭೂಷಣ ಆರ್.ಕೆ. ಶ್ರೀಕಂಠನ್, ಡಾ. ಭುಜಂಗಶೆಟ್ಟಿ, ಡಾ.ಸಿ.ಎಸ್. ಊರ್ಮಿಳಾ, ಡಾ. ಕಮಲಾ ಹೆಮ್ಮಿಗೆ, ಡಾ. ಗೀತಾ ರಾಮಾನುಜಂ ಉಪಸ್ಥಿತರಿದ್ದರು.