ನಗರಗಳತ್ತ ಯುವಜನರ ವಲಸೆಯಿಂದ ಕೃಷಿಗೆ ಹಿನ್ನಡೆ: ಡಾ. ಬೋರೇಗೌಡ

ಕ.ಪ್ರ. ವಾರ್ತೆ ಬೆಂಗಳೂರು ಮಾ.28-
ಯುವಜನತೆ ನಗರಗಳತ್ತ ಮುಗಿಬೀಳುತ್ತಿರುವುದರಿಂದ ಕೃಷಿಗೆ ಹಿನ್ನಡೆಯಾಗುತ್ತಿದೆ ಎಂದು ಭೂಗೋಳಶಾಸ್ತ್ರಜ್ಞ ಡಾ.ಪಿ. ಬೋರೇಗೌಡ ಅವರು ಅಭಿಪ್ರಾಯಪಟ್ಟಿದ್ದಾರೆ.
ಬೆಂಗಳೂರು ವಿಶ್ವವಿದ್ಯಾಲಯದ ಭೂಗೋಳಶಾಸ್ತ್ರ ವಿಭಾಗ 'ನಗರದ ಸಮಸ್ಯೆಗಳು ಮತ್ತು ಸವಾಲುಗಳು' ಎಂಬ ಬಗ್ಗೆ ನಗರದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ವಿಚಾರ ಸಂಕಿರಣದಲ್ಲಿ ಅವರು ಮಾತನಾಡಿದರು.
ಗ್ರಾಮೀಣ ಪ್ರದೇಶದವರು ನಗರಕ್ಕೆ ವಲಸೆ ಬರುವುತ್ತಿರುವುದರಿಂದ ನಗರ ಪ್ರದೇಶದಲ್ಲಿನ ಸಮಸ್ಯೆಗಳು ಹೆಚ್ಚುತ್ತಿದ್ದು, ಅವನ್ನು ಎದುರಿಸುವುದೇ ಸವಾಲಾಗಿ ಪರಿಣಮಿಸಿದೆ. ಮತ್ತೊಂದೆಡೆ ನಗರೀಕರಣದ ದುಷ್ಪರಿಣಾಮ ಪರಿಸರ ಹಾಗೂ ಗ್ರಾಮೀಣ ಪ್ರದೇಶದ ಜನರ ಮೇಲೂ ಆಗುತ್ತಿದೆ. ಯುವಜನತೆ ನಗರಗಳತ್ತ ವಲಸೆ ಬರುತ್ತಿರುವುದರಿಂದ ಕೃಷಿಗೂ ಹಿನ್ನಡೆಯಾಗುತ್ತಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಪ್ರಾಯೋಗಿಕವಾಗಿರಲಿ: ಇತ್ತೀಚಿನ ಭೂಗೋಳ ಶಾಸ್ತ್ರಜ್ಞರು ಪ್ರಾಯೋಗಿಕ ಅಧ್ಯಯನಕ್ಕಿಂತ ಥಿಯರಿ ಅಧ್ಯಯನಕ್ಕೇ ಹೆಚ್ಚು ಆದ್ಯತೆ ನೀಡುತ್ತಿದ್ದಾರೆ. ಅಂತಹವರು ಪ್ರಾಯೋಗಿಕ ಅಧ್ಯಯನಕ್ಕೆ ಹೆಚ್ಚಿನ ಆದ್ಯತೆ ನೀಡಬೇಕು. ಜತೆಗೆ ವಿದ್ಯಾರ್ಥಿಗಳು ಕೂಡ ಭೂಗೋಳಶಾಸ್ತ್ರದ ಅಧ್ಯಯನಕ್ಕೆ ಹೆಚ್ಚಿನ ಆಸಕ್ತಿ ತೋರಬೇಕು ಎಂದು ಅವರು ಆಶಿಸಿದರು. ಎನ್. ಪ್ರಿಯಾ ಅವರು ಮಂಡಿಸಿದ ಅಧ್ಯಯನ ವರದಿಗೆ ಇದೇ ವೇಳೆ 'ಯುವ ಭೂಗೋಳಶಾಸ್ತ್ರಜ್ಞೆ' ಪ್ರಶಸ್ತಿ ನೀಡಲಾಯಿತು. ಬೆಂಗಳೂರು ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಪ್ರೊ.ಎ.ಎಸ್. ರಾಯಮನೆ, ಪ್ರೊ.ಬಿ. ಈಶ್ವರಪ್ಪ, ಡಾ. ಅಶೋಕ ಡಿ. ಹಂಜಗಿ ಹಾಜರಿದ್ದರು.