ಹೋರಾಟ ಕೈಬಿಡಿ, ಸಿಎಂ ಮನವಿ

ಮೈಸೂರು:`ಕಳಸಾ-ಬಂಡೂರಿ ವಿಚಾರದಲ್ಲಿ ರೈತರಿಗೆ ಅನುಕೂಲ ಮಾಡಿಕೊಡಲು ಸರ್ಕಾರ ಸರ್ವರೀತಿಯಲ್ಲೂ ಪ್ರಯತ್ನಿಸುತ್ತಿದೆ. ಆದ್ದರಿಂದ ಉತ್ತರ ಕರ್ನಾಟಕದ ಜನ ಹೋರಾಟ ಕೈಬಿಡಬೇಕು,' ಎಂದು ಮನವಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಶನಿವಾರ ಮನವಿ ಮಾಡಿದ್ದಾರೆ.

ಮೈಸೂರಿನಲ್ಲಿ ಮಾತನಾಡಿರುವ ಅವರು, `ಪದೇ ಪದೇ ಬಂದ್‍ಗೆ ಕರೆ ನೀಡುವಂಥ ಸ್ಥಿತಿ ರಾಜ್ಯದಲ್ಲಿಲ್ಲ. ಕೆಲ ನಾಯಕರು ರಾಜಕೀಯ ಮತ್ತು ಸ್ವಪ್ರತಿಷ್ಠೆಗಾಗಿ ಬಂದ್‍ಗೆ ಕರೆ ನೀಡುತ್ತಿದ್ದಾರೆ. ಇದರಿಂದ ಜನ ಸಾಮಾನ್ಯರಿಗೆ ತೊಂದರೆಯಾಗುತ್ತಿದೆ,' ಎಂದು ಅಭಿಪ್ರಾಯಪಟ್ಟಿದ್ದಾರೆ.

`ಸಿದ್ದರಾಮಯ್ಯ ಅವರು ಮೈಸೂರಿಗೆ ಮಾತ್ರ ಸಿಎಂ. ಹೀಗಾಗಿ ರಾಜ್ಯದ ಅಭಿವೃದ್ಧಿ ಕುಂಠಿತವಾಗಿದೆ' ಎಂಬ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರ ಟೀಕೆಗೆ  ಪ್ರತಿಕ್ರಿಯಿಸಿರುವ ಸಿದ್ದರಾಮಯ್ಯ, `ರಾಜ್ಯ ಹಿಂದುಳಿಯಲು ಕಾಂಗ್ರೆಸ್ ಸರ್ಕಾರ ಕಾರಣವಲ್ಲ. ಬಿಜೆಪಿ ಸರ್ಕಾರದಿಂದಾಗಿ ರಾಜ್ಯ 10 ವರ್ಷಗಳಷ್ಟು ಹಿಂದಕ್ಕೆ ಹೋಗಿದೆ' ಎಂದಿದ್ದಾರೆ.

ಮೊದಲ ಗುರುವನ್ನು ನೆನೆದ ಸಿದ್ದು : `ನಮ್ಮ ರಾಜಪ್ಪ ಮೆಷ್ಟ್ರು ಅವತ್ತು ನನ್ನನ್ನು ನೇರವಾಗಿ ಐದನೇ ತರಗತಿಗೆ ಹಾಕದೇ ಇದ್ದಿದ್ದರೆ ನಾನು ಓದುತ್ತಿರಲೂ ಇಲ್ಲ, ಈ ಮಟ್ಟಕ್ಕೆ ಬೆಳೆಯುತ್ತಲೂ ಇರಲಿಲ್ಲ. ನಾನು ಇವತ್ತು ಏನಾಗಿದ್ದೀನಿ ಅದಕ್ಕೆಲ್ಲಾ ನಮ್ಮ ರಾಜಪ್ಪ ಮೇಷ್ಟ್ರು ಕಾರಣ ಎಂದು ಕೃತಜ್ಞತೆ ಸಲ್ಲಿಸಿದರು.

ಆತ್ಮಹತ್ಯೆ ಬೆದರಿಕೆ: ಅವರ ಹೆಸರು ಚನ್ನರಾಜನಾಯಕ. ಸಿಎಂ ಸಿದ್ದರಾಮಯ್ಯ ಅವರಿಗೆ ಗುರುತಿನ ವ್ಯಕ್ತಿ. ಮಾರ್ಬಳ್ಳಿ ಗ್ರಾಮದ ಅಭಿವೃದ್ಧಿಗಾಗಿ ಸಿಎಂ ಅವರಿಂದ  50 ಲಕ್ಷ ಮಂಜೂರು
ಮಾಡಿಸಿದ್ದರು. ಆದರೆ, ಜಿ.ಪಂ.ಮಾಜಿ ಅಧ್ಯಕ್ಷರೊಬ್ಬರು ಇದಕ್ಕೆ ತೊಡರುಗಾಲು  ಹಾಕಿದ್ದಾರೆಂದು ನಾಯಕ ಅವರು ಸಿಎಂ ಬಳಿ ಸಮಸ್ಯೆ ನಿವೇದಿಸಿಕೊಳ್ಳುತ್ತಿದ್ದರು.`ಸಮಸ್ಯೆ ನಿವಾರಿಸದೇ ಇದ್ದರೆ ನಾನು ವಿಷ ಕುಡಿದು ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ ಎಂದು ಜೋರಾಗಿ ಕೂಗಾಡುತ್ತಿದ್ದರು. ಸಿಎಂ, ಏಯ್ ನಾಯಕ ನಿನಗೆ  ಅನುಕೂಲ ಮಾಡಿಕೊಡ್ತೀನಿ ಹೋಗಯ್ಯ ಎಂದು ಹೇಳಿದರು.