ನ್ಯಾಸ್ಕಂ ಕಾರ್ಯಕ್ರಮಕ್ಕೆ ಸಿಎಂ ಆಹ್ವಾನಿಸದಿರುವುದು ದ್ರೋಹ

ಬೆಂಗಳೂರು: ಐಟಿ ಸಿಟಿ ಬೆಂಗಳೂರಿನಲ್ಲಿ ನಡೆದ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ನ್ಯಾಸ್ಕಮ್ ಕಾರ್ಯಕ್ರಮಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಆಹ್ವಾನಿಸದಿರುವುದು ನಿಜಕ್ಕೂ ದೊಡ್ಡ ದ್ರೋಹ. ಇದು ಮತ್ತೆ ಮುಂದುವರಿಯಬಾರದು ಎಂದು ಸಮಾಜ ಕಲ್ಯಾಣ ಸಚಿವ ಎಚ್.ಆಂಜನೇಯ ಹೇಳಿದ್ದಾರೆ.

 ಇಂದು ಬೆಂಗಳೂರು ನಗರ ಐಟಿ-ಬಿಟಿ ಕ್ಷೇತ್ರದಲ್ಲಿ ವಿಶ್ವ ಮಟ್ಟದ ಗಮನ ಸೆಳೆಯಲು ರಾಜ್ಯ ಸರ್ಕಾರದ ಕಾಣಿಕೆ ಸಾಕಷ್ಟಿದೆ. ಇದನ್ನರಿಯದೆ ಪ್ರಧಾನಿಮಂತ್ರಿ ಅವರು ರಾಜ್ಯದ ಮುಖ್ಯಮಂತ್ರಿ ಅವರನ್ನೇ ಕಡೆಗಣಿಸಿರುವುದು ಶಿಷ್ಠಾಚಾರದ ಉಲ್ಲಂಘನೆಯಾ ಗುತ್ತದೆ ಎಂದು ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿದ್ದಾರೆ. ಪ್ರಧಾನಿ ಅವರು ಮುಂದೆ ಎಲ್ಲಾ ರಾಜ್ಯದ ಮುಖ್ಯಮಂತ್ರಿಗಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಕಾರ್ಯಕ್ರಮಗಳನ್ನು ನಡೆಸಬೇಕು. ಏಕೆಂದರೆ, ಪ್ರಧಾನಿ ಅವರು ಏನೇ ಒಪ್ಪಂದ ಮಾಡಿಕೊಂಡರೂ ಆ ಉದ್ಯಮಗಳಿಗೆ ಭೂಮಿ, ನೀರು, ರಸ್ತೆ ಮತ್ತು ವಿದ್ಯುತ್ ಸೇರಿದಂತೆ ಸೌಲಭ್ಯಗಳನ್ನು ನೀಡುವುದು ರಾಜ್ಯ ಸರ್ಕಾರ. ಇದನ್ನು ಪ್ರಧಾನಿ ಅವರು ಗಮನದಲ್ಲಿರಿಸಿಕೊಳ್ಳ ಬೇಕು ಎಂದು ಆಂಜನೇಯ ಹೇಳಿದ್ದಾರೆ.

ಜನತೆಗೆ ಮಾಡಿದ ಅಪಮಾನ: ನ್ಯಾಸ್ಕಂ ಕಾರ್ಯಕ್ರಮಕ್ಕೆ ರಾಜ್ಯದ ಸಿಎಂ ಅವರನ್ನೇ ಆಹ್ವಾನಿಸದಿರುವುದಕ್ಕೆ ವಿಧಾನಪರಿಷತ್ ಸದಸ್ಯ ವಿ.ಎಸ್.ಉಗ್ರಪ್ಪ ಖಂಡಿಸಿದ್ದಾರೆ. ಮೋದಿ ಅವರಿಗೆ ನಿಜಕ್ಕೂ ಬದ್ಧತೆ ಇದ್ದರೆ ರಾಜ್ಯದಲ್ಲಿ 136 ತಾಲೂಕುಗಳಲ್ಲಿ ಬರ ಆವರಿಸಿದೆ. ಅದನ್ನು ವಿಚಾರಿಸಬಹುದಿತ್ತು. ಮಹದಾಯಿ ಹೋರಾಟ ನಡೆಯುತ್ತಿದೆ. ಆ ಬಗ್ಗೆ ಅಹವಾಲು ಸ್ವೀಕರಿಸಬಹುದಿತ್ತು. ಆದರೆ ಅದ್ಯಾವುದನ್ನೂ ಮಾಡಿಲ್ಲ. ಅದೇ ತಮಿಳುನಾಡಿಗೆ ಭೇಟಿ ನೀಡಿದಾಗ ಅಲ್ಲಿನ ಮುಖ್ಯಮಂತ್ರಿ ಅವರನ್ನು ಭೇಟಿಯಾಗಿ ಕಾವೇರಿ ವಿವಾದಕ್ಕೆ ಸಂಬಂಧಿಸಿದಂತೆ ಮನವಿಗಳನ್ನು ಸ್ವೀಕರಿಸುತ್ತಾರೆ. ಇಲ್ಲಿ ಮಾತ್ರ ತಮ್ಮ ಕಾರ್ಯಕ್ರಮಗಳಿಂದ ಸಿಎಂ ಅವರನ್ನೇ ದೂರ ಇರಿಸುತ್ತಾರೆ. ಇದು ಯಾವ ನ್ಯಾಯ ಎಂದು ಉಗ್ರಪ್ಪ ಪ್ರಶ್ನಿಸಿದರು.