ಶಿಕಾರಿಗೆ ಹೋಗಿದ್ದ ವ್ಯಕ್ತಿಗೆ ಗುಂಡೇಟು ತಗುಲಿ ಸಾವು

ಚಿಕ್ಕಮಗಳೂರು: ಶಿಕಾರಿಗೆ ಹೋಗಿದ್ದ ಮೂವರು ಸ್ನೇಹಿತರಲ್ಲಿ ಒಬ್ಬ ಆಕಸ್ಮಿಕವಾಗಿ ಗುಂಡು ತಗುಲಿ ಸಾವನ್ನಪ್ಪಿರುವ ಘಟನೆ ಚಿಕ್ಕಮಗಳೂರಿನಲ್ಲಿ ನಡೆದಿದೆ.

ಹರೀಶ್ , ಮಾಧವ, ಹಾಗೂ ಮಂಜುನಾಥ ಎಂಬುವವರು ಚಿಕ್ಕಮಗಳೂರಿನ ಗುತ್ತೇಹಳ್ಳಿಯವರಾಗಿದ್ದು ನಿನ್ನೆ ತಡರಾತ್ರಿ ಊರವರ ಮಾತನ್ನು ಧಿಕ್ಕರಿಸಿ ಬೇಟೆಗೆ ತೆರಳಿದ್ದರು.

ಈ ವೇಳೆ ಹರೀಶ್ ಕೈಯಲ್ಲಿದ್ದ ಸಿಂಗಲ್ ಬ್ಯಾರಲ್ ಗನ್ ನಿಂದ ಆಕಸ್ಮಿಕವಾಗಿ ಗುಂಡು ಹಾರುವ ಮೂಲಕ ಮಾಧವ ಎಂಬುವವನು ಮೃತಪಟ್ಟಿದ್ದಾನೆ.

ಮಾಧವನ ಕಾಲಿಗೆ ಗುಂಡು ತಗುಲಿ ಅತಿಯಾದ ರಕ್ತಸ್ರಾವವಾಗಿದೆ. ಹೆದರಿದ ಹರೀಶ್ ಹಾಗೂ ಮಂಜುನಾಥ್ ಊರಿಗೆ ಬಂದು ವಿಷಯ ತಿಳಿಸಿದ್ದಾರೆ. ಊರಿನವರು ಹೋಗುವಷ್ಟರಲ್ಲಿ ಮಾಧವ ಕೊನೆಯುಸಿರೆಳೆದಿದ್ದರು ಎಂದು ಮೂಲಗಳು ತಿಳಿಸಿವೆ.

ಸ್ಥಳೀಯ ಪೋಲಿಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಹರೀಶ್ ನನ್ನು ಬಂಧಿಸಿದ ಪೊಲೀಸರು ವಿಚಾರಣೆ ನಡೆಸುತ್ತಿದ್ದು, ಮಂಜುನಾಥ ಪರಾರಿಯಾಗಿದ್ದು ಆತನನ್ನು ಹುಡುಕುತ್ತಿದ್ದಾರೆ ಎಂದು ತಿಳಿದು ಬಂದಿದೆ.