ಆನೇಕಲ್ ನ ಗ್ರಾಮವೊಂದರಲ್ಲಿ ಕುದಿಯುವ ನೀರಿನ ಹೊಂಡ

ಬೆಂಗಳೂರು: ನಗರದ ಹೊರವಲಯದಲ್ಲಿರುವ ಆನೇಕಲ್ ನ ಕೆಲ ಪ್ರದೇಶಗಳಲ್ಲಿ ಸೌದೆ ಅಥವಾ ಗ್ಯಾಸ್ ಬಳಕೆ ಇಲ್ಲದೆಯೇ ಬೆಂಕಿ ಹೊತ್ತಿಕೊಳ್ಳುತ್ತಿದ್ದು, ಇಲ್ಲಿನ ಬೋರ್ ವೆಲ್ ಗಳಲ್ಲಿ ನೀರು ಬದಲಿಗೆ ಬಯೋಗ್ಯಾಸ್ ಬರುತ್ತಿದ್ದು, ಜನರು ಆ ಹಬೆಯ ತಾಪದಲ್ಲೇ ಆಮ್ಲೆಟ್ ಮಾಡಿ ತಿನ್ನುವಂತಾಗಿದೆ.

ಅಲ್ಲಿ ಕಲ್ಲುಗಳನ್ನು ಜೋಡಿಸಿ ಅದರ ಮೇಲೆ ಕಾಗದದ ಚೂರನ್ನು ಹಾಕಿದರೆ ಸಾಕು ಬೆಂಕಿ ಹೊತ್ತಿಕೊಳ್ಳುತ್ತಿದ್ದು, ಸ್ಥಳೀಯರು ಬೆಚ್ಚಿ ಬೀಳುವಂತಾಗಿದೆ. ಇದಕ್ಕೆ ಬಿಬಿಎಂಪಿಯವರು ಕಸದ ವಿಲೇವಾರಿ ಕಾರಣವಾಗಿದೆ. ಈ ಹಿಂದೆ ಆನೇಕಲ್ ತಾಲೂಕಿನ ಲಕ್ಮೀಪುರದ ಕ್ವಾರಿಯಲ್ಲಿ ಬಿಬಿಎಂಪಿಯವರು ಕಳೆದ ಮೂರು ವರ್ಷಗಳಿಂದ ಅವೈಜ್ಞಾನಿಕವಾಗಿ ಕಸ ಸುರಿದಿರುವುದರಿಂದ ಈ ಪ್ರದೇಶದಲ್ಲಿ ಗ್ಯಾಸ್ ಉತ್ಪತಿಯಾಗುತ್ತಿದ್ದು ಇದು ಕುದಿಯುತ್ತಿರುವ ಹೊಂಡದಂತಾಗಿದೆ.

ಬಿಬಿಎಂಪಿಯವರು ಸಂಸ್ಕರಣೆ ಮಾಡದ ಕಸವನ್ನು ಬಂಡೆಯಲ್ಲಿ ಹಾಕಿ ಮುಚ್ಚಿರುವುದರಿಂದ ಈ ಪ್ರದೇಶದ ಅಂತರ್ಜಲ ಸಂಪೂರ್ಣ ಮಲಿನವಾಗಿದ್ದು, ಕೆರೆ-ಕುಂಟೆ, ಬಾವಿಗಳ ನೀರು ವಿಷಯುಕ್ತವಾಗಿ ಮಾರ್ಪಟಿವೆ. ಈ ಕುರಿತು ಸ್ಥಳೀಯ ಮಂಟಪ ಗ್ರಾಮ ಪಂಚಾಯಿತಿ ಪ್ರತಿನಿಧಿಗಳಾಗಲಿ, ಅಧಿಕಾರಿಗಳಾಗಲಿ, ಶಾಸಕ ಎಂ.ಕೃಷ್ಣಪ್ಪನವರಾಗಲಿ, ಸಂಸದ ಡಿ.ಕೆ.ಸುರೇಶ್ ಆಗಲಿ ಯಾರೂ ಕೂಡ ತಲೆಕೆಡಿಸಿಕೊಳ್ಳುತ್ತಿಲ್ಲ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.