ಗರ್ಭಿಣಿ ಕೊಂದು ಬೆಂಕಿ ಹಚ್ಚಿದ್ದ ಭೂಪನ ಬಂಧನ

ಬೆಂಗಳೂರು:ಗರ್ಭಿಣಿಯಾದ ಪ್ರೇಯಸಿ ವಿವಾಹವಾಗು ಎಂದು ಒತ್ತಾಯಿಸಿದ್ದಕ್ಕೆ, ಆಕೆಯನ್ನು ಕೊಲೆ ಮಾಡಿದ್ದ ಪ್ರಕರಣವನ್ನು ಒಂದೂವರೆ ವರ್ಷದ ಬಳಿಕ ಬಾಗಲೂರು ಪೊಲೀಸರು ಬೇಧಿಸಿ, ಆರೋಪಿಯನ್ನು ಜೈಲಿಗೆ ಕಳುಹಿಸಿದ್ದಾರೆ.

ಜಾಲ ಹೋಬಳಿ ಶ್ರೀನಿವಾಸಪುರ ನಿವಾಸಿ ರೂಪೇಶ್ (24) ಬಂಧಿತ. ಇದೇ ಗ್ರಾಮದ ಶೋಭಾ(18) ಎಂಬಾಕೆಯನ್ನು 2013ರ ಅಕ್ಟೋಬರ್ 14ರಂದು ಆರೋಪಿ ಕೊಲೆ ಮಾಡಿದ್ದ. ಯುವತಿ ಕಾಣೆಯಾಗಿದ್ದಾಳೆಂದು ಬಾಗಲೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು, ನಾಪತ್ತೆ ಪ್ರಕರಣಗಳ ರೀಕಾಲ್ ವೇಳೆ ಅನುಮಾನದ ಮೇಲೆ ಆರೋಪಿ ರೂಪೇಶ್ ನನ್ನು ವಶಕ್ಕೆ ಪಡೆದು ವಿಚಾರಿಸಿದಾಗ ಕೊಲೆ ಪ್ರಕರಣ ಬಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.