ನೀರಿಗಾಗಿ ಮುನಿದ ಸಂಸದ ಮುನಿಯಪ್ಪ !

ಬೆಂಗಳೂರು: ಕುಡಿಯುವ ನೀರಿನ ವಿಚಾರದಲ್ಲಿ ನಿರ್ಲಕ್ಷ್ಯ ಮಾಡಿದರೆ ನಮ್ಮ ಪಕ್ಷದ ಸರ್ಕಾರ ಎಂಬುದನ್ನೂ ನೋಡದೆ ವಿಧಾನಸೌಧದ ಮುಂದೆ ಅನಿರ್ದಿಷ್ಟ ಧರಣಿ ನಡೆಸಲಾಗುವುದು ಎಂದು ಕೋಲಾರ ಸಂಸದ ಕೆ.ಎಚ್.ಮುನಿಯಪ್ಪ ರಾಜ್ಯ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.

ಹಲವು ಅಭಿವೃದ್ಧಿ ಕಾಮಗಾರಿಯನ್ನು ಉದ್ಘಾಟಿಸಿದ ಬಳಿಕ ಸಭೆಯಲ್ಲಿ ಮಾತನಾಡಿದ ಅವರು, ಈ ಭಾಗದಲ್ಲಿ ಕುಡಿಯುವ ನೀರಿನ ಹಾಹಾಕಾರ ಉಂಟಾಗಿದೆ. ಮಳೆ ಇಲ್ಲದೆ ಕೃಷಿಕರು ನಗರ ಪ್ರದೇಶಗಳಿಗೆ ವಲಸೆ ಹೋಗುತ್ತಿದ್ದಾರೆ. ಪರಿಸ್ಥಿತಿ ಇಷ್ಟು ಗಂಭೀರವಾಗಿದ್ದು, ರಾಜ್ಯ ಸರ್ಕಾರ ನಿರ್ಲಕ್ಷಿಸಿದರೆ, ಪರಿಸ್ಥಿತಿ ನೆಟ್ಟಗಿರುವುದಿಲ್ಲ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಸಚಿವ ಆರ್.ವಿ. ದೇಶಪಾಂಡೆ ಅವರಿಬ್ಬರೂ ಪ್ರತಿನಿಧಿಸುವ ಕ್ಷೇತ್ರಗಳಲ್ಲಿ ನೀರಿನ ಬವಣೆ ಇಲ್ಲ. ಆದರೆ, ನಮ್ಮ ಜಿಲ್ಲೆಗಳ ಸಮಸ್ಯೆಗಳನ್ನೂ ಅವರು ಅರಿತು ತುರ್ತು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ಎತ್ತಿನಹೊಳೆಯಿಂದ 2 ಟಿಎಂಸಿ: ಎತ್ತಿನಹೊಳೆ ಯೋಜನೆಯಿಂದ ಚಿಕ್ಕಬಳ್ಳಾಪುರ ಜಿಲ್ಲೆಗೆ ದಕ್ಕುವ ನೀರಿನ ಪ್ರಮಾಣ ಕೇವಲ 2 ಟಿಎಂಸಿ. ಚಿಕ್ಕಬಳ್ಳಾಪುರ ಜಿಲ್ಲೆಗೆ 2 ಹಾಗೂ ಕೋಲಾರ ಜಿಲ್ಲೆಗೆ 4 ಟಿಎಂಸಿ ನೀರು ಎತ್ತಿನಹೊಳೆ ಯೋಜನೆಯಿಂದ ಸಿಗಲಿದ್ದು, ಕೆಸಿ ವ್ಯಾಲಿಯಿಂದ ವ್ಯರ್ಥವಾಗುತ್ತಿರುವ 25 ಟಿಎಂಸಿ ನೀರನ್ನಾದರೂ ಈ ಭಾಗಕ್ಕೆ ನೀಡಬೇಕು. ಈ 2 ಜಿಲ್ಲೆಗಳಿಗೆ ನೀವು ನೀಡುವ ಯಾವುದೇ ಸಬ್ಸಿಡಿ ಬೇಡ ಸ್ವಾಮಿ, ನಮಗೆ ನೀರು ಕೊಡಿ. ನಾವೇ ನಿಮಗೆ ಎಲ್ಲವನ್ನೂ ಕೊಡುತ್ತೇವೆ. ನೀರಿಲ್ಲದ ಪರಿಣಾಮ ಹಾಲು ಉತ್ಪಾದನೆಯೂ ಕುಂಠಿತಗೊಳ್ಳುತ್ತಿದೆ. ತೋಟಗಾರಿಕಾ ಬೆಳೆಗಳು ಕ್ಷೀಣಿಸುತ್ತಿವೆ. ಮಳೆ ಆಧಾರಿತ ಕೃಷಿ ಅಂತಿಮ ಘಟ್ಟದಲ್ಲಿದೆ. ಆದ್ದರಿಂದ ಆದಷ್ಟು ಶೀಘ್ರದಲ್ಲಿ ಯಾವುದೇ ಮೂಲದಿಂದಾದರೂ ಸರ್ಕಾರ ನೀರು ನೀಡಬೇಕು ಎಂದು ಒತ್ತಾಯಿಸಿದರು.

ಕುಡಿಯುವ ನೀರು ಒದಗಿಸುವುದು ಸರ್ಕಾರದ ಜವಾಬ್ದಾರಿಯಾಗಿದ್ದು,ಶೀಘ್ರದಲ್ಲೇ ನೀರು ಕೊಡಲು ಕ್ರಮ ಕೈಗೊಳ್ಳಲಾಗುವುದು ಎಂದು ಉನ್ನತ ಶಿಕ್ಷಣ ಸಚಿವ ಆರ್.ವಿ .ದೇಶಪಾಂಡೆ ಚಿಕ್ಕಬಳ್ಳಾಪುರದಲ್ಲಿ ಭರವಸೆ ನೀಡಿದ್ದಾರೆ.