ತೊಗಾಡಿಯಾ ಬಂದೇ ಬರ್ತಾರೆ!

ಬೆಂಗಳೂರು: ಜಾತೀಯತೆ ನಿರ್ಮಾಣ, ಘರ್ ವಾಪಸಿ ಸಂಸ್ಕೃತಿ ಕುರಿತ ಜನಜಾಗೃತಿ ಕಾರ್ಯಕ್ರಮ ವಾಗಿ ವಿರಾಟ ಹಿಂದೂ ಸಮಾಜೋತ್ಸವವನ್ನುಫೆ .8ರಂದು ಸಂಜೆ 4ಕ್ಕೆ ಬಸವನಗುಡಿ ನ್ಯಾಷನಲ್ ಕಾಲೇಜಿನಲ್ಲಿ ಆಯೋಜಿಸಲಾಗಿದೆ. ರಾಜ್ಯದ 5 ನಗರಗಳಲ್ಲಿ ಉತ್ಸವ ನಡೆಯಲಿದೆ. ಧರ್ಮಸ್ಥಳ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ ಉದ್ಘಾಟಿಸಲಿದ್ದು, ರಾಷ್ಟ್ರೀಯ ಸ್ವಯಂಸೇವಕ ಸಂಘ ಸಹಕಾರ್ಯದರ್ಶಿ ಭಯ್ಯಾಜಿ ಜೋಷಿ, ವಿಶ್ವ ಹಿಂದು ಪರಿಷಷತ್ತಿನ ಅಂತಾರಾಷ್ಟ್ರೀಯ ಅಧ್ಯಕ್ಷ ರಾಘವ ರೆಡ್ಡಿ, ಕಾರ್ಯಾಧ್ಯಕ್ಷ ಪ್ರವೀಣ್ ಭಾಯಿ ತೊಗಾಡಿಯಾ ಆಗಮಿಸಲಿದ್ದಾರೆ ಎಂದು ವಿಶ್ವ ಹಿಂದೂ ಪರಿಷತ್ ಕ್ಷೇತ್ರ ಸಂಘಟನಾ ಕಾರ್ಯದರ್ಶಿ ಗೋಪಾಲ್ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

 ತೊಗಾಡಿಯಾ ಮೇಲೆ ಇಲ್ಲಸಲ್ಲದ ಆರೋಪಗಳು ಮಂಗಳೂರು, ಗುಲ್ಬರ್ಗಾ ಮುಂತಾದ ಕಡೆಗಳಲ್ಲಿ ನಡೆದಿದೆ. ಈ ಎಲ್ಲಾ ಜಿಲ್ಲೆಗಳಲ್ಲೂ ಜಿಲ್ಲಾಧಿಕಾರಿಗಳಿಗೆ ಆಮಿಷ ಒಡ್ಡಿ ತೊಗಾಡಿಯಾ ಮೇಲೆ ಆರೋಪ ಬರುವಂತೆ ಮಾಡಿದ್ದಾರೆ. ಎಲ್ಲಾ ಕಡೆಗಳಲ್ಲೂ ಕಾನೂನಿನ ಮೂಲಕ ಹೋರಾಟ ಮಾಡಿ ಜಯ ಗಳಿಸಿದ್ದೇವೆ, ಬೆಂಗಳೂರಿನಲ್ಲೂ ಗೆಲ್ಲುತ್ತೇವೆ ಎಂಬ ವಿಶ್ವಾಸವಿದೆ. ತೊಗಾಡಿಯಾ ವಿರಾಟ ಹಿಂದು ಉತ್ಸವದಲ್ಲಿ ಖಂಡಿತವಾಗಿಯೂ ಪಾಲ್ಗೊಳ್ಳುತ್ತಾರೆ ಎಂದರು.
ಸಮಾಜೋತ್ಸವದಲ್ಲಿ ಸಾಮಾಜಿಕ ಸಮರಸ, ಮತಾಂತರ ತಡೆ ಹಾಗೂ ಮರಳಿ ಮಾತೃಧರ್ಮಕ್ಕೆ ಕರೆತರುವುದು, ಗೋರಕ್ಷ ಣೆ, ಹಿಂದು ಸಂಸ್ಕೃತಿ ರಕ್ಷ ಣೆ ಕುರಿತು ವಿಷಯ ಮಂಡನೆಯಾಗಲಿದೆ.
ಪೇಜಾವರ ಮಠದ ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ, ರವಿಶಂಕರ್ ಗುರೂಜಿ, ಆದಿಚುಂಚನಗಿರಿ ಮಠ ನಿರ್ಮಲಾನಂದನಾಥ ಸ್ವಾಮೀಜಿ, ಬೇಲಿಮಠ ಶಿವರುದ್ರ ಸ್ವಾಮೀಜಿ ಉತ್ಸವದಲ್ಲಿ ಪಾಲ್ಗೊಳ್ಳಲಿರುವುದಾಗಿ ತಿಳಿಸಿದರು. ಪ್ರೇಮದ ಆಮಿಷದ ಮೂಲಕ `ಘರ್ ವಾಪಸಿ' ಮಾಡುತ್ತಿಲ್ಲ. ಯಾರು ತಾವಾಗಿಯೇ  ಹಿಂದೂ ಧರ್ಮವನ್ನು ಸೇರಲು ಇಚ್ಛೆ ಪಡುತ್ತಾರೋ ಅಂತವರನ್ನು ಧರ್ಮಕ್ಕೆ ಸೇರಿಸಿಕೊಳ್ಳಲಾಗಿದೆ ವಿನಃ ಯಾವ ರೀತಿಯ ಒತ್ತಾಯವಾಗಲೀ, ಆಮಿಷವಾಗಲಿ ಇಲ್ಲ ಎಂದರು. ವಿಶ್ವಹಿಂದು ಪರಿಷತ್ ಗೌರವ ಸಮಿತಿ ಸದಸ್ಯೆ ಮಾಳವಿಕಾ
ಅವಿನಾಶ್ ಉಪಸ್ಥಿತರಿದ್ದರು.