ಬಿಡಿಎ ಮೇಲೆ ನಿಗಾಕ್ಕೆ ಪರಿಶೀಲನಾ ಸಮಿತಿ

ಬೆಂಗಳೂರು: ನಿವೇಶನ ಹಂಚಿಕೆಗಾಗಿ ಜನರಿಂದ ಬಿಡಿಎ ಹಣ ಸಂಗ್ರಹಿಸುತ್ತಿರುವುದರ ಮೇಲೆ ನಿಗಾ ವಹಿಸಲು ಸರ್ಕಾರ ಪರಿಶೀಲನಾ ಸಮಿತಿ ನೇಮಿಸಬೇಕು ಎಂದು ಬಿಜೆಪಿ ಶಾಸಕ ಹಾಗೂ ವಕ್ತಾರ ಸುರೇಶ್‍ಕುಮಾರ್ ಆಗ್ರಹಿಸಿದ್ದಾರೆ.

ಅಂದಾಜು 5000 ನಿವೇಶನಗಳನ್ನು ಹಂಚಿಕೆ ಮಾಡುವುದಾಗಿ ಬಿಡಿಎ ಜನರಿಂದ ಕೋಟ್ಯಂತರ ವಸೂಲಿ ಮಾಡುತ್ತಿದ್ದು, ಇದಕ್ಕೆ ಹೊಣೆಗಾರಿಕೆ ಮತ್ತು ಪಾರದರ್ಶಕತೆ ಎರಡೂ ಇಲ್ಲ. ಬಿಡಿಎ ಅಧಿಕಾರಿಗಳು ಅರ್ಜಿದಾರರಿಂದ ರು.100 ಅರ್ಜಿ ಶುಲ್ಕ, ಗರಿಷ್ಠ ರು.5000 ನೋಂದಣಿ ಶುಲ್ಕ ಮತ್ತು ರು.2.30ಲಕ್ಷದವರೆಗೂ ಆರಂಭಿಕ ಠೇವಣಿಯನ್ನು ಸಂಗ್ರಹಿಸಲಾಗುತ್ತಿದೆ. ಆದರೆ ಈ ಹಣಕ್ಕೆ ಯಾವುದೇ ಖಾತರಿ ಇಲ್ಲ ಎಂದು ಅವರು ದೂರಿದ್ದಾರೆ.

ಈಗಾಗಲೇ ಲಕ್ಷಾಂತರ ಮಂದಿಯಿಂದ ಅರ್ಜಿ ಮತ್ತು ಹಣವನ್ನು ಸಂಗ್ರಹಿಸಿರುವ ಬಿಡಿಎ ಕೋಟ್ಯಂತರ ಹಣ ಸ್ವೀಕರಿಸಿದೆ. ಆದರೆ ಈ ಹಣಕ್ಕೆ ನಿವೇಶನ ನೀಡುವ ಖಾತರಿ ಇಲ್ಲ. ಹಣವನ್ನು ವಾಪಸ್ ನೀಡುವ ಖಚಿತತೆ ಇಲ್ಲ. ಅದಕ್ಕೆ ಬಡ್ಡಿಯನ್ನಾದರೂ ನೀಡುವ ಭರವಸೆ ಕೂಡ ಕೊಟ್ಟಿಲ್ಲ. ಅಷ್ಟೇ ಏಕೆ ಈ ಹಣವನ್ನು ಸರ್ಕಾರ ಹೇಗೆ ಬಳಸಿಕೊಳ್ಳುತ್ತಿದೆ ಎನ್ನುವ ಬಗ್ಗೆಯೂ ಮಾಹಿತಿ ಇಲ್ಲ. ಅಂದರೆ ಸರ್ಕಾರ ಜನರಿಂದ ಅನಗತ್ಯವಾಗಿ ಕೋಟ್ಯಂತರ ವಸೂಲಿ ಮಾಡಿ ರಿಯಲ್ ಎಸ್ಟೇಟ್ ಮಾಡುತ್ತಿದೆ. ಆದ್ದರಿಂದ ಬಿಡಿಎ ಕಾರ್ಯವೈಖರಿಯನ್ನು ಮೂರನೇ ವ್ಯಕ್ತಿ ಪರಿಶೀಲನೆಗೆ ಒಳಪಡಿಸಬೇಕು. ಇದಕ್ಕಾಗಿ ಒಂದು ಸಮಿತಿ ರಚಿಸಬೇಕು ಎಂದು ಸುರೇಶ್ ಕುಮಾರ್ ಆಗ್ರಹಿಸಿದರು.