ಕಾರು-ಬಸ್ ಡಿಕ್ಕಿ: ಒಂದೇ ಕುಟುಂಬದ ಇಬ್ಬರು ಸಾವು

ಬೆಳ್ಳಂಗಡಿ: ಧರ್ಮಸ್ಥಳ ಸಮೀಪ ಗುರುವಾರ ಬೆಳಗ್ಗೆ ಬಸ್ ಮತ್ತು ಕಾರು ನಡುವೆ ನಡೆದ ಭೀಕರ ಅಪಘಾತದಲ್ಲಿ ಒಂದೇ ಕುಟುಂಬದ ಇಬ್ಬರು ಸ್ಥಳದಲ್ಲೇ ಮೃತಪಟ್ಟು ಇನ್ನಿಬ್ಬರು ಗಂಭೀರ ಗಾಯಗೊಂಡಿದ್ದಾರೆ.

ಬೆಂಗಳೂರು ಆರ್.ಟಿ.ನಗರ ಸಮಾಪದ ಜಯಮಹಲ್ ನಿವಾಸಿ ರಾಜಮ್ಮ (50) ಹಾಗೂ ಕಾರಿನ ಚಾಲಕ, ಮಂಡ್ಯ ನಿವಾಸಿ ಪುನೀತ್ (27) ಮೃತರು. ರಾಜಮ್ಮ ಅವರ ಪುತ್ರ ಪ್ರಶಾಂತ್ (37) ಹಾಗೂ ಸೊಸೆ ರಾಧಾ (32) ಗಂಭೀರ ಗಾಯಗೊಂಡಿದ್ದು, ಇವರ ಪುತ್ರಿ ಯಾಶಿಕಾ (3) ಅಪಾಯವಿಲ್ಲದೆ ಪಾರಾಗಿದ್ದಾಳೆ.

ಕೆಎಸ್‌ಆರ್‌ಟಿಸಿ ಬಸ್ ಧರ್ಮಸ್ಥಳದಿಂದ ಮಡಿಕೇರಿ-ಮೈಸೂರಿಗೆ ತೆರಳುತ್ತಿದ್ದು, ಧರ್ಮಸ್ಥಳ ಸಮೀಪದ ಕಲ್ಲೇರಿ ಬಳಿಯ ಏರು ರಸ್ತೆಯಲ್ಲಿ ಬೆಂಗಳೂರಿನಿಂದ ಧರ್ಮಸ್ಥಳಕ್ಕೆ ಬರುತ್ತಿದ್ದ ಕಾರಿಗೆ ಡಿಕ್ಕಿ ಹೊಡೆದಿದೆ. ಕಾರು ಬಸ್ ನಡಿಗೆ ಸಿಲುಕಿದ್ದರಿಂದ ಸಂಪೂರ್ಣ ನುಜ್ಜುಗುಜ್ಜಾಗಿದೆ. ಅಪಘಾತದ ತೀವ್ರತೆಗೆ ಬಸ್‌ನ ಚಕ್ರಗಳು ಸ್ಫೋಟಗೊಂಡಿವೆ. ಸ್ಥಳೀಯರು ಕೂಡಲೇ ರಕ್ಷಣಾ ಕಾರ್ಯಾಚರಣೆ ನಜೆಸಿದ್ದಾರೆ. ಆದರೆ, ಅದಾಗಲೇ ಇಬ್ಬರು ಮೃತಪಟ್ಟಿದ್ದರು. ದಂಪತಿಯನ್ನು ಮಂಗಳೂರಿನ ಆಸ್ಪತ್ರೆಗೆ ದಾಖಲಾಗಿಸಲಾಗಿದೆ. ಬಸ್ ಚಾಲಕ ಹನುಮಂತ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ.

ಬದುಕುಳಿದ ಮಗು
ಕಾರಿನ ಹಿಂದಿನ ಆಸನದಲ್ಲಿ ತಂದೆ, ತಾಯಿಯೊಂದಿಗೆ ಇದ್ದ ಮಗು ಯಾವುದೇ ಗಾಯಗಳಿಲ್ಲದೆ ಪಾರಾಗಿದೆ. ಬಸ್ ಡಿಕ್ಕಿ ಹೊಡೆದ ರಭಸಕ್ಕೆ ಕಾರಿನ ಛಾವಣಿ ಕಿತ್ತು ಹೋಗಿದೆ. ಎದುರಿನ ಸೀಟಿಗೆ ಸಿಲುಕಿ ದಂಪತಿ ಕಾಲುಗಳು ನುಜ್ಜುಗುಜ್ಜಾಗಿವೆ. ಇದರಿಂದ ಮಧ್ಯದಲ್ಲಿದ್ದ ಮಗು ಪ್ರಾಣಾಪಾಯದಿಂದ ಪಾರಾಗಿದೆ.

ಮಗುವನ್ನು ಉಜಿರೆಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಆಸ್ಪತ್ರೆ ಸಿಬ್ಬಂದಿ ಸೂಕ್ತ ಚಿಕಿತ್ಸೆ ನೀಡದರು. ಗಾಯಗೊಂಡಿರುವ ಪ್ರಶಾಂತ್ ಬೆಂಗಳೂರಿನಲ್ಲಿ ಸರ್ಕಾರಿ ಉದ್ಯೋಗಿಯಾಗಿದ್ದಾರೆ.