ಮಾರ್ಚ್ ಒಳಗೆ ಕಬ್ಬಿನ ಬಾಕಿ ಅಸಾಧ್ಯ

ವಿಧಾನಸಭೆ: ಮಾರ್ಚ್ ತಿಂಗಳೊಳಗೆ ಕಬ್ಬು ಬೆಳೆಗಾರರ ಅಂತಿಮ ಕಂತಿನ ರೂ.200 ಹಣ ಸಿಗಲು ಸಾಧ್ಯವೇ ಇಲ್ಲ!

ಡಿಸೆಂಬರ್ ಅಂತ್ಯದೊಳಗೆ ಎಲ್ಲ ರೈತರಿಗೂ ಪ್ರತಿ ಟನ್ ಕಬ್ಬಿಗೆ ರೂ.2300 ಅನ್ನು ಸಕ್ಕರೆ ಕಾರ್ಖಾನೆಗಳು ನೀಡಲಿವೆ. ಉಳಿದ ಹಣವನ್ನು ಮಾರ್ಚ್ ತಿಂಗಳೊಳಗೆ ಕೊಡುವಂತೆ ಸರ್ಕಾರದಿಂದ ಸೂಚನೆ ನೀಡಲು ಅಸಾಧ್ಯ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಸ್ಪಷ್ಪಪಡಿಸಿದ್ದಾರೆ.

ರಾಜ್ಯ ಸರ್ಕಾರದ ಉತ್ತರಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ ಬಿಜೆಪಿ, ಜೆಡಿಎಸ್ ಸದಸ್ಯರು ಧರಣಿ ಮುಂದುವರಿಸಿ, ಉತ್ತರ ಕರ್ನಾಟಕದ ಸಮಸ್ಯೆಗಳ ಕುರಿತ ಚರ್ಚೆ ಮುಂದುವರಿಸಲು ಅವಕಾಶ ನೀಡುವ ಸಲುವಾಗಿ ಸಭಾತ್ಯಾಗ ನಡೆಸಿದರು.

ಸರ್ಕಾರದ ಉತ್ತರಕ್ಕೆ ಪ್ರತಿಪಕ್ಷಗಳ ಜತೆ ಸಭಾಧ್ಯಕ್ಷರೂ ಬೇಸರ ವ್ಯಕ್ತಪಡಿಸಿದರು. ನಿದಿಷ್ಟ ಸಮಯದಲ್ಲಿ ರೈತರಿಗೆ ಹಣ ನೀಡುವ ಬಗ್ಗೆ ಕೊನೆಗೂ ಸರ್ಕಾರ ಸ್ಪಷ್ಟ ಉತ್ತರ ನೀಡಲಿಲ್ಲ. ಇದಲ್ಲದೇ ಬಾಕಿ ರೂ.200ನ್ನು 2 ಕಂತುಗಳಲ್ಲಿ ಕೊಡಿಸುವ ಭರವಸೆ ನೀಡಿದೆ.

ಮತ್ತೊಂದೆಡೆ ಈವರೆಗೆ ಯಾವ್ಯಾವ ಸಕ್ಕರೆ ಕಾರ್ಖಾನೆಗಳು ಎಷ್ಟು ಹಣ ನೀಡಿವೆ ಪಟ್ಟಿ ನೀಡಿ ಎಂದು ಸದಸ್ಯರು ಪ್ರಶ್ನಿಸಿದರೂ ಸಕ್ಕರೆ ಸಚಿವ ನೀಡಲಿಲ್ಲ.

ಸರ್ಕಾರದ ಈ ವರ್ತನೆಗೆ ಪ್ರತಿಪಕ್ಷ ಸದಸ್ಯರು ಧಿಕ್ಕಾರ ಕೂಗಿದರು. ಸಕ್ಕರೆ ಕಾರ್ಖಾನೆ ಲಾಬಿಗೆ ಸರ್ಕಾರ ಮಣಿದಿದೆ ಎಂದು ಪ್ರತಿಪಕ್ಷ ನಾಯಕ ಜಗದೀಶ್ ಶೆಟ್ಟರ್ ಆರೋಪಿಸಿದರು.