'ಕೋಚ್ ಬದಲಿಸಿ, ಎಂಎಸ್ ಧೋನಿಯನ್ನು ಮೆಂಟರ್ ಆಗಿ ಕರೆತನ್ನಿ': ಗೌತಮ್ ಗಂಭೀರ್ ವಿರುದ್ಧ ಮಾಜಿ ಆಟಗಾರ ಎಸ್ ಶ್ರೀಶಾಂತ್ ಕಿಡಿ

ಟೀಂ ಇಂಡಿಯಾದ ಮುಖ್ಯ ಕೋಚ್ ಗೌತಮ್ ಗಂಭೀರ್ ವಿರುದ್ಧ ಕಟು ವಾಗ್ದಾಳಿ ನಡೆಸಿದ ಭಾರತೀಯ ಕ್ರಿಕೆಟ್ ತಂಡದ ಮಾಜಿ ವೇಗಿ ಎಸ್. ಶ್ರೀಶಾಂತ್, ರಾಷ್ಟ್ರೀಯ ತಂಡವು ಎಂಎಸ್ ಧೋನಿಯನ್ನು ಮೆಂಟರ್ ಆಗಿ ನೇಮಿಸಬೇಕು ಎಂದು ಸಲಹೆ ನೀಡಿದ್ದಾರೆ. ತಂಡಕ್ಕೆ ಸಾಂಪ್ರದಾಯಿಕ ಮುಖ್ಯ ಕೋಚ್ ಅಗತ್ಯವಿಲ್ಲ ಮತ್ತು ಬದಲಾಗಿ ಮೆಂಟರ್ ಈ ವ್ಯವಸ್ಥೆಗೆ ಹೆಚ್ಚು ಸೂಕ್ತ ಎಂದು ಶ್ರೀಶಾಂತ್ ಹೇಳಿದ್ದಾರೆ.

ಭಾರತವು 2024 ರಲ್ಲಿ ನ್ಯೂಜಿಲೆಂಡ್ ಮತ್ತು 2025 ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಸ್ವದೇಶಿ ಸರಣಿ ಸೋಲುಗಳನ್ನು ಅನುಭವಿಸಿತು. ಲಲ್ಲಂಟಾಪ್ ಜೊತೆಗಿನ ಸಂವಾದದ ಸಂದರ್ಭದಲ್ಲಿ, ಟೆಸ್ಟ್ ಕ್ರಿಕೆಟ್‌ಗೆ ಸಂಬಂಧಿಸಿದಂತೆ ಭಾರತ ಇತ್ತೀಚಿನ ವರ್ಷಗಳಲ್ಲಿ ಏಕೆ ಸಂಕಷ್ಟದಲ್ಲಿದೆ ಎಂದು ಶ್ರೀಶಾಂತ್ ಅವರನ್ನು ಕೇಳಿದಾಗ, ಈ ಎರಡೂ ಸೋಲುಗಳು ಗಂಭೀರ್ ಅವಧಿಯಲ್ಲಿ ಸಂಭವಿಸಿವೆ ಮತ್ತು ಗಂಭೀರ್ ತಂಡಕ್ಕೆ ತರಬೇತಿ ನೀಡುವ ವಿಧಾನದ ಬಗ್ಗೆ ತಮಗೆ ಸಮಸ್ಯೆ ಇದೆ ಎಂದು ಹೇಳಿದರು.

'ಕೋಚ್ ಬದಲಾಯಿಸಿ ಗೆಳೆಯ. ಭಾರತಕ್ಕೆ ಕೋಚ್ ಅಲ್ಲ, ಮಾರ್ಗದರ್ಶಕ ಬೇಕು' ಎಂದು ಶ್ರೀಶಾಂತ್ ಹೇಳಿದರು.

'ನೀವು ಮೊದಲು ಸಹೋದರರಾಗಬೇಕು. ನೀವು ಗೆದ್ದಾಗ ನಗಲು ಮತ್ತು ಸೋತಾಗ ಕೋಪಗೊಳ್ಳಲು ಸಾಧ್ಯವಿಲ್ಲ. ನೀವು ದೇಶಕ್ಕಾಗಿ ಒಳ್ಳೆಯದನ್ನು ಮಾಡಿದ್ದೀರಿ, ಅದು ಅದ್ಭುತವಾಗಿದೆ. ಇತರರು ಪ್ರಯತ್ನಿಸುತ್ತಿಲ್ಲ ಎಂದು ಇದರ ಅರ್ಥವಲ್ಲ. ಕೋಚ್‌ಗಿಂತ ಮಾರ್ಗದರ್ಶಕರನ್ನು ಹೊಂದುವುದು ಸೂಕ್ತ' ಎಂದು ಅವರು ಹೇಳಿದರು.

ಗಂಭೀರ್ 'ಆಟಗಾರರ ಮೇಲೆ ಅತಿಯಾದ ಒತ್ತಡ' ಹೇರುತ್ತಾರೆ. ಅಂತರರಾಷ್ಟ್ರೀಯ ತಂಡಕ್ಕೆ ಆಟಗಾರರ ಮೇಲೆ ಒತ್ತಡ ಹೇರುವ ಕೋಚ್ ಅಗತ್ಯವಿಲ್ಲ. ಎಂಎಸ್ ಧೋನಿ ಈ ರೀತಿ ಎಂದಿಗೂ ಮಾಡಲಿಲ್ಲ. ಟೀಂ ಇಂಡಿಯಾಕ್ಕೆ ಧೋನಿಯಂತಹ ಮಾರ್ಗದರ್ಶಕರ ಅಗತ್ಯವಿದೆ' ಎಂದರು.

ಭಾರತದ ಟಿ20 ವಿಶ್ವಕಪ್ 2026ರ ಗೆಲುವಿಗೆ ಗಂಭೀರ್ ಮಾತ್ರ ಕಾರಣ ಎಂಬ ಕಲ್ಪನೆಯನ್ನು ಶ್ರೀಶಾಂತ್ ತಿರಸ್ಕರಿಸಿದರು. ಸಂಜು ಸ್ಯಾಮ್ಸನ್ ಮತ್ತು ಸೂರ್ಯಕುಮಾರ್ ಯಾದವ್ ಅವರಂತಹ ಆಟಗಾರರು ಭಾರತಕ್ಕೆ ಟ್ರೋಫಿಯನ್ನು ಗೆದ್ದುಕೊಡುವಲ್ಲಿ ದೊಡ್ಡ ಪಾತ್ರ ವಹಿಸಿದ್ದಾರೆ ಎಂದು ಅವರು ಹೇಳಿದರು.

'ತಂಡ ವಿಶ್ವಕಪ್ ಗೆದ್ದಾಗ, ಎಲ್ಲ ಶ್ರೇಯಸ್ಸು ಗೌತಮ್ ಗಂಭೀರ್‌ಗೆ ಸಲ್ಲುತ್ತದೆ. ಆದರೆ ಸಂಜು ಸ್ಯಾಮ್ಸನ್ ಇಲ್ಲದಿದ್ದರೆ, ಸೂರ್ಯಕುಮಾರ್ ಯಾದವ್ ನಾಯಕತ್ವ ವಹಿಸಿಕೊಂಡಿರದಿದ್ದರೆ ಮತ್ತು ಸರಿಯಾದ ಸಮಯದಲ್ಲಿ ಬೌಲಿಂಗ್ ಬದಲಾವಣೆಗಳನ್ನು ಮಾಡದಿದ್ದರೆ, ನಾವು ಪಂದ್ಯವನ್ನು ಗೆಲ್ಲುತ್ತಿದ್ದೆವಾ?. ಕೋಚ್ ಮೈದಾನದಲ್ಲಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದರೇ? ಆಶಿಶ್ ನೆಹ್ರಾ ಅವರಂತಹ ತರಬೇತುದಾರರು ಇದ್ದರೆ ಪರವಾಗಿಲ್ಲ' ಎಂದು ಶ್ರೀಶಾಂತ್ ಹೇಳಿದರು.