Lanka Premier League: ಆಟಗಾರನಿಗೆ ಲಂಚ; U-19 ವಿಶ್ವಕಪ್ ವಿಜೇತ ಭಾರತದ ಮಾಜಿ ಆಟಗಾರನ ಬಂಧನ!

ಕೊಲ್ಕತ್ತಾ: ಲಂಕಾ ಪ್ರೀಮಿಯರ್ ಲೀಗ್‌ಗೆ (LPL)ನಲ್ಲಿ ಲಂಚದ ಪ್ರಯತ್ನದ ಆರೋಪದ ಮೇಲೆ, ಭಾರತದ ಮಾಜಿ ಅಂಡರ್-19 ಕ್ರಿಕೆಟಿಗ ಮಂಜೋತ್ ಕಲ್ರಾ ಅವರನ್ನು ಶ್ರೀಲಂಕಾದ ಕ್ರೀಡಾ ಭ್ರಷ್ಟಾಚಾರ ವಿರೋಧಿ ಘಟಕವು ಬಂಧಿಸಿದೆ.

'ಜಾಫ್ನಾ ಕಿಂಗ್ಸ್' ಫ್ರಾಂಚೈಸಿಯ ಸಹ-ಮಾಲೀಕರಾಗಿರುವ ಕಲ್ರಾ ಅವರನ್ನು, ಜುಲೈ 17 ರಂದು LPL ಸೀಸನ್ ಆರಂಭಕ್ಕೂ ಮುನ್ನ ವಶಕ್ಕೆ ಪಡೆಯಲಾಯಿತು.

ಶ್ರೀಲಂಕಾ ಪೊಲೀಸರ ಪ್ರಕಾರ, ಟೂರ್ನಿ ಆರಂಭಕ್ಕೂ ಸುಮಾರು 10 ದಿನಗಳ ಮುನ್ನ 27 ವರ್ಷದ ಕಲ್ರಾ ಆಟಗಾರನೊಬ್ಬನಿಗೆ ಲಂಚ ನೀಡಲು ಪ್ರಯತ್ನಿಸಿದ್ದರು ಎಂದು ಆರೋಪಿಸಲಾಗಿದೆ. ಆ ಆಟಗಾರನು ಈ ವಿಷಯವನ್ನು ಅಧಿಕಾರಿಗಳಿಗೆ ತಿಳಿಸಿದ ನಂತರ ತನಿಖೆ ನಡೆಸಲಾಗಿದ್ದು, ಕಲ್ರಾ ಅವರನ್ನು ಬಂಧಿಸಲಾಗಿದೆ.

ಕ್ರೀಡೆಗೆ ಸಂಬಂಧಿಸಿದ ಭ್ರಷ್ಟಾಚಾರದ ತನಿಖೆಗಾಗಿ ಸ್ಥಾಪಿಸಲಾದ 'ಕ್ರೀಡೆಗೆ ಸಂಬಂಧಿಸಿದ ಅಪರಾಧಗಳ ತಡೆಗಟ್ಟುವಿಕೆಗಾಗಿನ ವಿಶೇಷ ತನಿಖಾ ಘಟಕ'ವು ಈ ಕಾರ್ಯಾಚರಣೆಯನ್ನು ನಡೆಸಿತು. ಬಂಧನದ ನಂತರ ಕಲ್ರಾ ಅವರನ್ನು ಮ್ಯಾಜಿಸ್ಟ್ರೇಟ್ ಮುಂದೆ ಹಾಜರುಪಡಿಸಲಾಯಿತು.

ಜಾಫ್ನಾ ಕಿಂಗ್ಸ್ ತಂಡದ ಆಟಗಾರರಾದ ಭನುಕ ರಾಜಪಕ್ಸೆ, ಅವಿಷ್ಕ ಫೆರ್ನಾಂಡೊ ಮತ್ತು ದುನಿತ್ ವೆಲ್ಲಲಾಗೆ ಅವರು ಈ ದೂರು ದಾಖಲಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಸದ್ಯ ಈ ಕುರಿತು ತನಿಖೆ ನಡೆಯುತ್ತಿದೆ.

ಲಂಕಾ ಪ್ರೀಮಿಯರ್ ಲೀಗ್‌ಗೆ (LPL) ಸಂಬಂಧಿಸಿದ ಭ್ರಷ್ಟಾಚಾರದ ವಿವಾದಗಳ ಪಟ್ಟಿಗೆ ಈ ಘಟನೆಯೂ ಸೇರ್ಪಡೆಗೊಂಡಿದೆ. ಇದಕ್ಕೂ ಮುನ್ನ, ಈ ವರ್ಷದ ಆರಂಭದಲ್ಲಿ, ಮತ್ತೊಂದು LPL ಫ್ರಾಂಚೈಸ್‌ನ ಮಾಲೀಕರೊಬ್ಬರು ಆಟಗಾರನೊಬ್ಬನನ್ನು ಮ್ಯಾಚ್-ಫಿಕ್ಸಿಂಗ್‌ನಲ್ಲಿ ತೊಡಗಿಸಿಕೊಳ್ಳಲು ಪ್ರಯತ್ನಿಸಿದ ಆರೋಪ ಸಾಬೀತಾದ ನಂತರ ನಾಲ್ಕು ವರ್ಷಗಳ ನಿಷೇಧಕ್ಕೆ ಒಳಗಾಗಿದ್ದರು.

2018ರ ಐಸಿಸಿ ಅಂಡರ್-19 ವಿಶ್ವಕಪ್‌ನಲ್ಲಿ ಕಲ್ರಾ ಖ್ಯಾತಿ: ಆ ಟೂರ್ನಿಯ ಫೈನಲ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಅಜೇಯ 101 ರನ್ ಗಳಿಸುವ ಮೂಲಕ ಭಾರತ ಪ್ರಶಸ್ತಿ ಗೆಲ್ಲಲು ಅವರು ನೆರವಾಗಿದ್ದರು. ಶುಭಮನ್ ಗಿಲ್ ಮತ್ತು ನಾಯಕ ಪೃಥ್ವಿ ಶಾ ಅವರಿದ್ದ ಅದೇ ಚಾಂಪಿಯನ್ ತಂಡದ ಭಾಗವಾಗಿಯೂ ಅವರು ಗುರುತಿಸಿಕೊಂಡಿದ್ದರು. ಈ ಮಾಜಿ ಆರಂಭಿಕ ಆಟಗಾರ ದೇಶೀಯ ಕ್ರಿಕೆಟ್‌ನಲ್ಲಿ ಆಡಿದ ನಂತರ, ಲಂಕಾ ಪ್ರೀಮಿಯರ್ ಲೀಗ್‌ನಲ್ಲಿ ಫ್ರಾಂಚೈಸಿ ಸಹ-ಮಾಲೀಕರಾಗಿ ಗುರುತಿಸಿಕೊಂಡರು. ಅವರ ಮೇಲಿನ ಆರೋಪಗಳು ಇನ್ನೂ ನ್ಯಾಯಾಲಯದಲ್ಲಿ ಸಾಬೀತಾಗಿಲ್ಲ ಮತ್ತು ತನಿಖೆ ಪ್ರಗತಿಯಲ್ಲಿದೆ.