'ನಜರ್' ಎಮೋಜಿಯೊಂದಿಗೆ ಪೋಸ್ಟ್: ಹೊಸ ಚರ್ಚೆ ಹುಟ್ಟುಹಾಕಿದ ಸ್ಮೃತಿ, ಪಲಾಶ್ ಇನ್‌ಸ್ಟಾ ಬಯೋ 'ಅಪ್‌ಡೇಟ್'!

ಅದ್ದೂರಿಯಾಗಿ ನಡೆಯಬೇಕಿದ್ದ ಹೈ ಪ್ರೊಫೈಲ್ ಮದುವೆಯೊಂದು ಇದೀಗ ಸಸ್ಪೆನ್ಸ್ ಮತ್ತು ವದಂತಿಗಳ ವಿಷಯವಾಗಿದೆ. ಮಹಿಳಾ ವಿಶ್ವಕಪ್ ಗೆದ್ದ ಭಾರತದ ತಂಡದ ಸ್ಟಾರ್ ಆಟಗಾರರಲ್ಲಿ ಒಬ್ಬರಾದ ಸ್ಮೃತಿ ಮಂಧಾನ, ನವೆಂಬರ್ 23 ರಂದು ಸಂಗೀತ ಸಂಯೋಜಕ ಪಲಾಶ್ ಮುಚ್ಚಲ್ ಅವರನ್ನು ವಿವಾಹವಾಗಬೇಕಿತ್ತು.

ಆದರೆ ಅದು ನಡೆಯಲಿಲ್ಲ. ಕಾರಣ ಮದುವೆ ದಿನವೇ ಸ್ಮೃತಿಯ ತಂದೆ ಶ್ರೀನಿವಾಸ್ ಅನಾರೋಗ್ಯಕ್ಕೆ ಒಳಗಾಗಿ ಆಸ್ಪತ್ರೆ ಸೇರಿದರು. ಅಷ್ಟೇ ಅಲ್ಲ, ಮರುದಿನ, ಪಲಾಶ್ ಅವರನ್ನು ಸಾಂಗ್ಲಿಯ (ಸ್ಮೃತಿಯ ತವರು) ಆಸ್ಪತ್ರೆಗೆ ದಾಖಲಿಸಿ, ತದನಂತರ ಮುಂಬೈಗೆ ಸ್ಥಳಾಂತರಿಸಲಾಯಿತು.

ಆರೋಗ್ಯ ತುರ್ತು ಪರಿಸ್ಥಿತಿಯಿಂದಾಗಿ ಮದುವೆ ಮುಂದೂಡಲಾಗಿದೆ ಎಂದು ಸ್ಮೃತಿ ಮಂಧಾನ ಹೇಳಿದ್ದರು. ಸ್ಮೃತಿ ವಿವಾಹ ಮುಂದೂಡಿಕೆ ನಂತರ ಸ್ಮೃತಿ ಮಂಧಾನ ತನ್ನ ಇನ್‌ಸ್ಟಾಗ್ರಾಮ್ ಖಾತೆಯಿಂದ ಮದುವೆಗೆ ಸಂಬಂಧಿಸಿದ ಎಲ್ಲಾ ಪೋಸ್ಟ್‌ಗಳನ್ನು ಡಿಲೀಟ್ ಮಾಡಿದ್ದರು. ಆದರೂ ಪಲಾಶ್ ಅವರೊಂದಿಗಿನ ಕೆಲವು ಸಾಂದರ್ಭಿಕ ಫೋಟೋಗಳು ಇನ್ನೂ ಉಳಿದಿವೆ.

ಈಗ ಸ್ಮೃತಿಯ ತಂದೆ ಮತ್ತು ಪಲಾಶ್ ಇಬ್ಬರೂ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಆದರೆ ಹೊಸ ಮದುವೆಯ ದಿನಾಂಕವನ್ನು ಎರಡೂ ಕುಟುಂಬಗಳು ಇನ್ನೂ ಘೋಷಿಸಿಲ್ಲ. ಇದರ ಮಧ್ಯೆ ಸ್ಮೃತಿ ಮತ್ತು ಪಲಾಶ್ ತಮ್ಮ ಇನ್‌ಸ್ಟಾಗ್ರಾಮ್ ಬಯೋವನ್ನು 'ನಜರ್' ಎಮೋಜಿಯೊಂದಿಗೆ ಅಪ್ ಡೇಟ್ ಮಾಡಿದ್ದಾರೆ ಎನ್ನಲಾಗಿದೆ. ನಜರ್ (ದುಷ್ಟ ಕಣ್ಣಿನಿಂದ ಮತ್ತು ನಕಾರಾತ್ಮಕ ಶಕ್ತಿಯಿಂದ ರಕ್ಷಣೆ ನೀಡುತ್ತದೆ ಎಂದು ನಂಬಲಾಗುತ್ತದೆ) ನಮ್ಮ ನಡುವೆ ಎಲ್ಲವೂ ಚೆನ್ನಾಗಿದೆ. ಎಲ್ಲಾ ವದಂತಿಗಳನ್ನು ನಂಬಬೇಡಿ. ದ್ವೇಷಿಗಳು ತಮ್ಮ ಒಳಿತಿಗೆ ತಕ್ಕಂತೆ ಪ್ರಯತ್ನಿಸಿದ್ದಾರೆ. ಆದರೆ ನಂಬಿಕೆ ಅತ್ಯಂತ ಪ್ರಬಲವಾದದ್ದು ಎಂದು ಪರೋಕ್ಷವಾಗಿ ಹೇಳಿದ್ದಾರೆ.

ಬಯೋಗಳಿಗೆ ಒಂದೇ 'ನಜರ್' ಎಮೋಜಿ

ಸ್ಮೃತಿ ಮಂಧಾನ ಮತ್ತು ಪಲಾಶ್ ಮುಚ್ಚಲ್ ಇಬ್ಬರೂ ತಮ್ಮ ಇನ್‌ಸ್ಟಾಗ್ರಾಮ್ ಬಯೋಗಳಿಗೆ ಒಂದೇ 'ನಜರ್' ಎಮೋಜಿ (🧿) ಪೋಸ್ಟ್ ಹೊಸ ಸಂಚಲನವನ್ನುಂಟು ಮಾಡಿದೆ. ಅವರ ವಿವಾಹ ರದ್ದುಗೊಳಿಸಲಾಗಿದೆ ಎಂಬ ವರದಿಗಳ ನಡುವೆ ಈ ರೀತಿಯ ಪೋಸ್ಟ್ ಸಾಮಾಜಿಕ ಮಾಧ್ಯಮದಲ್ಲಿ ಹೊಸ ಚರ್ಚೆ ಹುಟ್ಟು ಹಾಕಿದೆ. ತುರ್ತು ಆರೋಗ್ಯ ಪರಿಸ್ಥಿತಿಗಳಿಂದಾಗಿ ಮದುವೆ ಮುಂದೂಡಿರುವುದಾಗಿ ಎರಡೂ ಕುಟುಂಬಗಳ ಸದಸ್ಯರು ಸ್ಪಷ್ಟಪಡಿಸಿದ್ದಾರೆ.