ಅಡಿಲೇಡ್‌: ಸಚಿನ್, ಸುನೀಲ್ ಗವಾಸ್ಕರ್ ದಾಖಲೆ ಪುಡಿ-ಪುಡಿ ಮಾಡಿದ ಇಂಗ್ಲೆಂಡ್ ಟೆಸ್ಟ್ ನಾಯಕ ಜೋ ರೂಟ್!

ಅಡಿಲೇಡ್‌: ಇಂಗ್ಲೆಂಡ್  ಟೆಸ್ಟ್ ನಾಯಕ ಜೋ ರೂಟ್  ತಮ್ಮ ವೃತ್ತಿ ಜೀವನದಲ್ಲಿ ಮತ್ತೊಂದು ದಾಖಲೆ ನಿರ್ಮಿಸಿದ್ದಾರೆ. ಪ್ರಸಕ್ತ ವರ್ಷದ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಅತ್ಯುತ್ತಮ ಬ್ಯಾಟಿಂಗ್ ಮುಂದುವರಿಸಿರುವ ಇಂಗ್ಲೆಂಡ್‌ ತಂಡದ ನಾಯಕ ಜೋ ರೂಟ್‌ ಭಾರತೀಯ ಬ್ಯಾಟಿಂಗ್ ದಿಗ್ಗಜರಾದ ಸಚಿನ್‌ ತೆಂಡೂಲ್ಕರ್‌ ಹಾಗೂ ಸುನೀಲ್‌ ಗವಾಸ್ಕರ್‌ ಅವರ ದಾಖಲೆಯನ್ನು ಮುರಿದಿದ್ದಾರೆ.

ಕ್ಯಾಲೆಂಡರ್ ವರ್ಷದಲ್ಲಿ ಟೆಸ್ಟ್‌ ಪಂದ್ಯಗಳಲ್ಲಿ ಅತ್ಯಧಿಕ ರನ್‌ ಗಳಿಸಿದ ಐದನೇ  ಆಟಗಾರರಾಗಿದ್ದಾರೆ. ಈ ಮೂಲಕ ಟೀಂ ಇಂಡಿಯಾ ದಿಗ್ಗಜ ಸಚಿನ್ ತೆಂಡೂಲ್ಕರ್ ದಾಖಲೆ ಮುರಿದಿದ್ದಾರೆ.  ಪ್ರತಿಷ್ಠಿತ ಆಶಸ್ ಸರಣಿಯ ಭಾಗವಾಗಿ ಆಸ್ಟ್ರೇಲಿಯಾ  ವಿರುದ್ಧದ ಎರಡನೇ ಟೆಸ್ಟ್‌ನಲ್ಲಿ ಅವರು 1563 ರನ್‌  ಪೂರ್ಣಗೊಳಿಸಿ ದಾಖಲೆ ನಿರ್ಮಿಸಿದ್ದಾರೆ.

ಅಡಿಲೇಡ್ ಟೆಸ್ಟ್‌ನಲ್ಲಿ ಆಸ್ಟ್ರೇಲಿಯಾ  9 ವಿಕೆಟ್‌ಗೆ 473 ರನ್ ಗಳಿಸಿ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ ಡಿಕ್ಲೇರ್ ಮಾಡಿಕೊಂಡಿತು. ಈ ಅನುಕ್ರಮದಲ್ಲಿ ಮೈದಾನಕ್ಕಿಳಿದ ಜೋ ರೂಟ್ ತಂಡ   ದಿಟ್ಟ ಉತ್ತರ ನೀಡುತ್ತಿದೆ. ಆರಂಭಿಕರಾದ ಹಸೀಬ್ ಹಮೀದ್ (6), ರೋರಿ ಬರ್ನ್ಸ್ (4) ವಿಫಲವಾದರೂ ಡೇವಿಡ್ ಮಲಾನ್, ಜೋ ರೂಟ್ ಶತಕದ ಜೊತೆಯಾಟ ನಡೆಸಿ ಇನ್ನಿಂಗ್ಸ್ ಕಟ್ಟಿದರು.

ಇದನ್ನೂ ಓದಿ: ಇಂಥವರಿಂದಲೇ ಜಗತ್ತು ಸುಂದರವಾಗಿದೆ: ಫ್ರೆಂಡ್ ಜೀವ ಉಳಿಸಿದ ಟ್ರಾಫಿಕ್ ಪೊಲೀಸ್ ಗೆ ಸಚಿನ್ ಭಾವನಾತ್ಮಕ ಸಂದೇಶ

2002ರಲ್ಲಿ ಇಂಗ್ಲೆಂಡ್‌ ಮಾಜಿ ನಾಯಕ ಮೈಕಲ್‌ ವಾನ್ 1,481 ರನ್‌ ಗಳಿಸಿದ್ದರು. ಇದೀಗ ವಾನ್‌ ದಾಖಲೆಯನ್ನು ಮುರಿದಿರುವ ಜೋ ರೂಟ್‌, ಭಾರತೀಯ ಕ್ರಿಕೆಟ್‌ನ ಧೃವ ತಾರೆ ಸುನೀಲ್ ಗವಾಸ್ಕರ್‌(1,555 ರನ್‌, 1979ರ ವರ್ಷ) ಹಾಗೂ 2010ರ ವರ್ಷದಲ್ಲಿ 1,562 ರನ್‌ ಗಳಿಸಿದ್ದ ಸಚಿನ್‌ ತೆಂಡೂಲ್ಕರ್‌ ಅವರನ್ನು ಹಿಂದಿಕ್ಕಿದ್ದಾರೆ.

ಏಕೈಕ ಕ್ಯಾಲೆಂಡರ್‌ ವರ್ಷದಲ್ಲಿ ಅತಿ ಹೆಚ್ಚು ಅಂತಾರಾಷ್ಟ್ರೀಯ ಟೆಸ್ಟ್ ರನ್‌ ಗಳಿಸಿದ ಬ್ಯಾಟ್ಸ್‌ಮನ್‌ಗಳ ಪಟ್ಟಿಯಲ್ಲಿ ಇದೀಗ ಜೋ ರೂಟ್‌ ಐದನೇ ಸ್ಥಾನದಲ್ಲಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ಆರಂಭಿಕ ಟೆಸ್ಟ್‌ ದ್ವಿತೀಯ ಇನಿಂಗ್ಸ್‌ನಲ್ಲಿ ರೂಟ್‌, ರಿಕ್ಕಿ ಪಾಂಟಿಂಗ್‌, ಶ್ರೀಲಂಕಾ ಮಾಜಿ ನಾಯಕ ಕುಮಾರ ಸಂಗಕ್ಕಾರ ಹಾಗೂ ಜಸ್ಟಿನ್‌ ಲ್ಯಾಂಗರ್ ಅವರ ದಾಖಲೆಯನ್ನು ಮುರಿದಿದ್ದರು.

ಕ್ಯಾಲೆಂಡರ್ ವರ್ಷದಲ್ಲಿ ಟೆಸ್ಟ್‌ನಲ್ಲಿ ಅತಿ ಹೆಚ್ಚು ರನ್:
ಮೊಹಮ್ಮದ್ ಯೂಸುಫ್ (2006) – 1788 ರನ್
ವಿವಿಯನ್ ರಿಚರ್ಡ್ಸ್ (1976) – 1710 ರನ್
ಗ್ರೇಮ್ ಸ್ಮಿತ್ (2008) – 1656
ಮೈಕೆಲ್ ಕ್ಲಾರ್ಕ್ (2012) – 1595
ಜೋ ರೂಟ್ (2021) – 1563 (ಔಟಾಗದೆ)
ಸಚಿನ್ ತೆಂಡೂಲ್ಕರ್ (2010) – 1562 ರನ್
ಸುನಿಲ್ ಗವಾಸ್ಕರ್ (1979) – 1555 ರನ್