ರೋಹಿತ್ ಶರ್ಮಾ ಬ್ಯಾಟಿಂಗ್ ಪ್ರದರ್ಶನಕ್ಕೆ 'ಶಹಬಾಸ್' ಎಂದ ಕೊಹ್ಲಿ!

ಗುವಾಹಟಿ: ಬರ್ಸಾಪರ ಕ್ರಿಕೆಟ್ ಮೈದಾನದಲ್ಲಿ ನಡೆದ ವೆಸ್ಟ್ ಇಂಡೀಸ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಉಪನಾಯಕ ರೋಹಿತ್ ಶರ್ಮಾ ಅವರ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನಕ್ಕೆ ನಾಯಕ ವಿರಾಟ್ ಕೊಹ್ಲಿ ಶಹಬಾಸ್ ಎಂದಿದ್ದಾರೆ.

ವೆಸ್ಟ್ ಇಂಡೀಸ್ ನೀಡಿದ 323 ರನ್ ಗಳ ಗುರಿ ತಲುಪವಲ್ಲಿ ಎರಡನೇ ವಿಕೆಟ್ ನಲ್ಲಿ ಜೊತೆಯಾದ ನಾಯಕ ವಿರಾಟ್ ಕೊಹ್ಲಿ (140 ) ಹಾಗೂ ರೋಹಿತ್ ಶರ್ಮಾ ಅವರ (152) ರನ್ ಗಳಿಕೆಯೊಂದಿಗೆ ಈ ಜೋಡಿಯಿಂದ 246 ರನ್ ಗಳು ಹರಿದುಬಂದಿತ್ತು.

ವೆಸ್ಟ್ ಇಂಡೀಸ್  ಉತ್ತಮ 323 ರನ್ ಗಳ ಗುರಿ ನೀಡಿದ್ದರೂ ದೊಡ್ಡ ಆಟಗಾರರ ಸಹಭಾಗಿತ್ವದಲ್ಲಿ ಆ ಗುರಿ ತಲುಪುವ ವಿಶ್ವಾಸವಿತ್ತು. ರೋಹಿತ್ ಶರ್ಮಾ ಉತ್ತಮ ಬ್ಯಾಟಿಂಗ್ ಪ್ರದರ್ಶನದಲ್ಲಿ  ಗುರಿ ತಲುಪುವುದು ಕಷ್ಟವಾಗಲೇ ಇಲ್ಲ ಎಂದು ವಿರಾಟ್ ಕೊಹ್ಲಿ ಹೇಳಿದ್ದಾರೆ.

ರೋಹಿತ್ ಶರ್ಮಾ ಹಾಗೂ ಶಿಖರ್ ಧವನ್ ಉತ್ತಮ ಆರಂಭಿಕ ಆಟಗಾರರು, ನಿನ್ನೆ ನಡೆದ ಪಂದ್ಯದಲ್ಲಿ ತಮ್ಮ ಬ್ಯಾಟಿಂಗ್ ಬಗ್ಗೆ ಖುಷಿಯಾಗಿದೆ. ರೋಹಿತ್ ಶರ್ಮಾ ಇದೇ ರೀತಿಯ ಬ್ಯಾಟಿಂಗ್ ಪ್ರದರ್ಶನ ಮುಂದುವರೆಸುವಂತೆ ಹೇಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಏಕದಿನ ಪಂದ್ಯಗಳಲ್ಲಿ ಉತ್ತಮ ಜೊತೆಯಾಟ ಹಾಗೂ ಸಂವಹನ ಮೂಲಕ  ಗೆಲುವು ಸಾಧಿಸಬಹುದು ಎಂದು ಕೊಹ್ಲಿ ಅಭಿಪ್ರಾಯಪಟ್ಟಿದ್ದಾರೆ.

ಇದು ಐದು ಅಥವಾ ಆರನೇ ದ್ವಿಶತಕದ ಜೊತೆಯಾಟದ ಪಂದ್ಯವಾಗಿದ್ದು, ರೋಹಿತ್  ಅವರಿಂದ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ಕಂಡುಬಂದಿತ್ತು. ಅವರ ಬ್ಯಾಟಿಂಗ್ ನೆರವಿನಿಂದ ಹೆಚ್ಚಿನ ರನ್ ಹರಿದುಬಂದಿತ್ತು. ಟೀಂ ಇಂಡಿಯಾ ಗೆಲುವು ಸಾಧಿಸಲು ನೆರವಾಯಿತು ಎಂದು ಕೊಹ್ಲಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.