ಪಾಕ್‌ಗೆ ತಿರುಗುಬಾಣವಾಯ್ತು ತಂತ್ರ; ಆಸ್ಟ್ರೇಲಿಯಾ-ಪಾಕ್ ನಡುವಿನ ಟೆಸ್ಟ್ ಪಂದ್ಯದ ಕೊನೆಯ ಓವರ್ ಬಲು ರೋಚಕ!

ದುಬೈ: ಆಸ್ಟ್ರೇಲಿಯಾ ಹಾಗೂ ಪಾಕಿಸ್ತಾನ ನಡುವಿನ ಮೊದಲ ಟೆಸ್ಟ್ ಪಂದ್ಯ ಡ್ರಾನಲ್ಲಿ ಅಂತ್ಯವಾಗಿದೆ. ಆದರೆ ಪಾಕಿಸ್ತಾನ ಈ ಪಂದ್ಯವನ್ನು ಸುಲಭವಾಗಿ ಗೆಲ್ಲಬಹುದಿತ್ತು ಆದರೆ ತಾನು ತೆಗೆದುಕೊಂಡ ಒಂದು ತಪ್ಪು ನಿರ್ಧಾರದಿಂದ ದೊಡ್ಡ ಹೊಡೆತ ಬಿದ್ದಿದೆ. 

ಪಾಕಿಸ್ತಾನ ನೀಡಿದ 462 ರನ್ ಗಳ ಬೃಹತ್ ಮೊತ್ತ ಬೆನ್ನಟ್ಟಿದ ಆಸ್ಟ್ರೇಲಿಯಾ ನಾಲ್ಕನೇ ದಿನದಂತ್ಯಕ್ಕೆ 87 ರನ್ ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಐದನೇ ದಿನ ಬರೋಬ್ಬರಿ 90 ಓವರ್ ಗಳನ್ನು ಪೂರ್ಣಗೊಳಿಸಿದ ಆಸ್ಟ್ರೇಲಿಯಾ ಸೋಲುವ ಪಂದ್ಯವನ್ನು ಡ್ರಾನಲ್ಲಿ ಅಂತ್ಯಗೊಳಿಸಿತು. 

ಆದರೆ ಇನ್ನೇನು ಕೊನೆಯ ಓವರ್ ನಲ್ಲಿ ಪಾಕಿಸ್ತಾನ ಗೆಲುವಿಗೆ 2 ವಿಕೆಟ್ ಬಾಕಿಯಿತ್ತು. ಆಸ್ಟ್ರೇಲಿಯಾ 8 ವಿಕೆಟ್ ನಷ್ಟಕ್ಕೆ 360 ರನ್ ಬಾರಿಸಿತ್ತು. ಕೊನೆಯ ಓವರ್ ನಲ್ಲಿ ಎರಡು ವಿಕೆಟ್ ಪಡೆಯುವ ಸಲುವಾಗಿ ಪಾಕ್ ಪಂದ್ಯದ ಎಡನೇ ಇನ್ನಿಂಗ್ಸ್ ನಲ್ಲಿ ನಾಲ್ಕು ವಿಕೆಟ್ ಪಡೆದಿದ್ದ ಯಾಸೀರ್ ಗೆ ಕೊನೆಯ ಓವರ್ ನೀಡಿತ್ತು. ಈ ವೇಳೆ ಪೈನ್ 59 ರನ್ ಗಳಿಸಿ ಉತ್ತಮ ಆಟ ಪ್ರದರ್ಶಿಸುತ್ತಿದ್ದರು. ಮತ್ತೊಂದೆಡೆ ಲಿಯಾನ್ 5 ರನ್ ಗಳಿಸಿದ್ದರು. ಯಾಸೀರ್ ಕೊನೆಯ ಎಸೆತದಲ್ಲಿ ಎಷ್ಟೇ ಪ್ರಯತ್ನ ಪಟ್ಟರು ವಿಕೆಟ್ ಪಡೆಯಲು ವಿಫಲವಾಗಿದ್ದು ಪಂದ್ಯ ಡ್ರಾನಲ್ಲಿ ಅಂತ್ಯಕಂಡಿತು. ಆದರೆ ಕೊನೆಯ ಓವರ್ ರೋಚಕವಾಗಿದ್ದು ಮೈದಾನದಲ್ಲಿ ನೆರೆದಿದ್ದ ಉಭಯ ತಂಡದ ಅಭಿಮಾನಿಗಳು ದೇವರನ್ನು ಪ್ರಾರ್ಥಿಸುತ್ತಿದ್ದದ್ದು ಸಾಮಾನ್ಯವಾಗಿತ್ತು. 

ಮೊದಲ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ್ದ ಪಾಕಿಸ್ತಾನ ಮೊದಲ ಇನ್ನಿಂಗ್ಸ್ ನಲ್ಲಿ 482 ರನ್ ಪೇರಿಸಿತ್ತು. ನಂತರ ಬ್ಯಾಟಿಂಗ್ ಮಾಡಿದ್ದ ಆಸ್ಟ್ರೇಲಿಯಾ ತಂಡವನ್ನು 202 ರನ್ ಗಳಿಗೆ ಕಟ್ಟಿಹಾಕಿದ್ದರು. 280 ರನ್ ಗಳ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ್ದ ಪಾಕಿಸ್ತಾನ 6 ವಿಕೆಟ್ ಕಳೆದುಕೊಂಡು 181 ರನ್ ಗಳಿಸಿದ್ದಾಗ ಡಿಕ್ಲೇರ್ ಮಾಡಿಕೊಂಡಿತು. ಕೊನೆಗೆ ಆಸ್ಟ್ರೇಲಿಯಾ 462 ರನ್ ಗಳ ಗುರಿ ನೀಡಿತು. 

ಐದನೇ ದಿನ ಉಸ್ಮಾನ್ ಖಾವಾಜ ಹಾಗೂ ಟ್ರಾವಿಸ್ ಹೆಡ್ ಜೋಡಿ ಬರೋಬ್ಬರಿ 50 ಓವರ್ ಗಳ ಜೊತೆಯಾಟ ನೀಡಿ 137 ರನ್ ಗಳಿಸಿದರು. ಹೆಡ್ 72 ರನ್ ಗಳಿಸಿ ನಿರ್ಗಮಿಸಿದರೇ ಖವಾಜಾ 141 ರನ್ ಬಾರಿಸಿ ಪಂದ್ಯ ಡ್ರಾ ಆಗುವಲ್ಲಿ ಸಹಕಾರಿಯಾದರು. 

ಇನ್ನು ಪಾಕಿಸ್ತಾನ ಆಲೋ ಆನ್ ನೀಡಿದ್ದರೆ ಪಂದ್ಯವನ್ನು ಸುಲಭವಾಗಿ ಗೆಲ್ಲಬಹುದಿತ್ತು. ಆದರೆ ತಾನು ತೆಗೆದುಕೊಂಡ ಒಂದು ತಪ್ಪು ನಿರ್ಧಾರದಿಂದಾಗಿ ಗೆಲ್ಲುವ ಪಂದ್ಯ ಡ್ರಾ ಆಗಿದೆ.