2018 ಐಪಿಎಲ್ ಹರಾಜು: ಡೇರ್ ಡೆವಿಲ್ಸ್ ಗೆ ಪೃಥ್ವಿ ಶಾ, ಶುಭ್ಮನ್ ಗಿಲ್, ಕುಲ್ದೀಪ್ ಯಾದವ್ ಕೆಕೆಆರ್ ಪಾಲು

ಬೆಂಗಳೂರು: ಐಪಿಎಲ್ 2018 ರ ಹರಾಜು ಪ್ರಕ್ರಿಯೆಯಲ್ಲಿ ಅಂಡರ್ 19 ಆಟಗಾರರು ಡೆಲ್ಲಿ ಡೇರ್ ಡೆವಿಲ್ಸ್, ಕೆಕೆಆರ್ ತಂಡದ ಪಾಲಾಗಿದ್ದಾರೆ. 

ಜ.27 ರಂದು ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಅಂಡರ್ 19 ತಂಡದ ಆಟಗಾರ, ಭಾರತ ತಂಡದ ನಾಯಕ ಪೃಥ್ವಿ ಶಾ, 1.2 ಕೋಟಿ ರೂಪಾಯಿಗೆ ದೆಹಲಿ ಡೇರ್ ಡೆವಿಲ್ಸ್ ತಂಡ ಸೇರಿದ್ದರೆ, ಅಂಡರ್-19 ನ ಮತ್ತೋರ್ವ ಆಟಗಾರ ಕಮಲೇಶ್ ನಾಗರ್ಕೋಟಿಯನ್ನು ತಂಡಕ್ಕೆ ಸೇರಿಸಿಕೊಳ್ಳಲು ಸನ್ ರೈಸರ್ಸ್ ಹಾಗೂ ಪಂಜಾಬ್ ನಡುವೆ ಪೈಪೋಟಿ ನಡೆದು ಕೊನೆಗೆ ಕೆಕೆಆರ್ ತಂಡ ಕಮಲೇಶ್ ನಾಗರ್ಕೋಟಿಯನ್ನು ಖರೀದಿಸಿದೆ. ಮತ್ತೋರ್ವ ಅಂಡರ್-19 ತಂಡದ ಸ್ಫೋಟಕ ಆಟಗಾರ ಶುಭ್ಮನ್ ಗಿಲ್ ನ್ನು 1.8 ಕೋಟಿಗೆ ಕೆಕೆಆರ್ ತಂಡ ಖರೀದಿಸಿದೆ.   

ಇನ್ನು ಇದೇ ವೇಳೆ ಕರ್ನಾಟಕ ತಂಡದ ಪ್ರಾರಂಭಿಕ ಆಟಗಾರ ಮಯಾಂಕ್ ಅಗರ್ವಾಲ್ ಒಂದು ಕೋಟಿ ರೂಪಾಯಿಗೆ ಮುಂಬೈ ತಂಡದ ಪಾಲಾಗಿದ್ದು, ರಿಕಿ ಭುಯಿ 20 ಲಕ್ಷಕ್ಕೆ ಸನ್ ರೈಸರ್ಸ್ ತಂಡದ ಪಾಲಾಗಿದ್ದರೆ ಕುಲ್ದೀಪ್ ಯಾದವ್ 5.8 ಕೋಟಿಗೆ ಕೆಕೆಆರ್ ತಂಡದಲ್ಲೇ ಉಳಿದಿದ್ದಾರೆ. 

ಕರ್ನಾಟಕದ ಆಟಗಾರರಾದ ಕಎಲ್ ರಾಹುಲ್ ಮತ್ತು ಕರುಣ್ ನಾಯರ್ ದುಬಾರಿ ಮೊತ್ತಕ್ಕೆ ಸೇಲಾಗಿದ್ದಾರೆ. ಕೆಎಲ್ ರಾಹುಲ್ ಅವರಿಗೆ 11 ಕೋಟಿ ಹಾಗೂ ಕರುಣ್ ನಾಯರ್ ಅವರಿಗೆ 5.6 ಕೋಟಿ ನೀಡಿ ಪಂಜಾಬ್ ಖರೀದಿಸಿದೆ. 

ಜಗತ್ತಿನ ಶ್ರೀಮಂತ ಕ್ರಿಕೆಟ್ ಲೀಗ್ ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್) 11ನೇ ಆವೃತ್ತಿಯ ಹರಾಜು ಪ್ರಕ್ರಿಯೆ ಬೆಂಗಳೂರಿನ ಖಾಸಗಿ ಹೋಟೆಲ್ ನಲ್ಲಿ ಪ್ರಾರಂಭವಾಗಿದೆ. 

2008ರ ಐಪಿಎಲ್ ಬಳಿಕ ಇಷ್ಟು ದೊಡ್ಡಮಟ್ಟದ ಐಪಿಎಲ್ ಹರಾಜು ನಡೆಯುತ್ತಿರುವುದು ಇದೇ ಮೊದಲು. ಹರಾಜಿನಲ್ಲಿ ಇಂಗ್ಲೆಂಡ್ ತಂಡದ ಆಲ್ ರೌಂಡರ್ ಬೆನ್ ಸ್ಟೋಕ್ಸ್ ದುಬಾರಿ ಮೊತ್ತಕ್ಕೆ ಸೇಲಾಗಿದ್ದಾರೆ. ರಾಜಸ್ತಾನ ತಂಡ ಸ್ಟೋಕ್ಸ್ ಗೆ ಬರೋಬ್ಬರಿ 12.5 ಕೋಟಿ ರುಪಾಯಿ ಹರಾಜು ಕೋರಿ ತಂಡಕ್ಕೆ ಸೇರಿಸಿಕೊಂಡಿದೆ. ಇನ್ನು ಟೀಂ ಇಂಡಿಯಾದ ಸ್ಫೋಟಕ ಬ್ಯಾಟ್ಸ್ ಮನ್ ಶಿಖರ್ ಧವನ್ 5.2 ಕೋಟಿಗೆ ಪಂಜಾಬ್ ತಂಡದ ಪಾಲಾಗಿದ್ದಾರೆ.