ಇಂಗ್ಲೆಂಡ್ ವಿರುದ್ಧ ಭರ್ಜರಿ ಜಯ: ಕೇದಾರ್ ಜಾದವ್‌ರನ್ನು ಪ್ರಶಂಸಿಸಿದ ವಿರಾಟ್ ಕೊಹ್ಲಿ

ಪುಣೆ: ಇಂಗ್ಲೆಂಡ್ ವಿರುದ್ಧದ ಏಕದಿನ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ಮಾಡಿದ ಕೇದಾರ್ ಜಾದವ್‌ರನ್ನು ಟೀಂ ಇಂಡಿಯಾ ತಂಡದ ನಾಯಕ ವಿರಾಟ್ ಕೊಹ್ಲಿ ಪ್ರಶಂಸಿಸಿದ್ದಾರೆ. 

ಸ್ಫೋಟಕ ಬ್ಯಾಟಿಂಗ್ ಮಾಡಿದ ಕೇದಾರ್ ಜಾದವ್ 75 ಎಸೆತಗಳಲ್ಲಿ 120 ರನ್ ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದಾರೆ. ಇನ್ನು ಇದೊಂದು ಅದ್ಭುತ ಇನ್ನಿಂಗ್ಸ್ ಆಗಿತ್ತು. ನೀವು ನೋಡಬೇಕು ಕೇದಾರ್ ಜಾದವ್ ಮೈದಾನದ ಎಲ್ಲಾ ಕಡೆಯು ಸಿಕ್ಸರ್ ಮತ್ತು ಬೌಂಡರಿಗಳನ್ನು ಸಿಡಿಸಿದ್ದಾರೆ. ಅವರೊಬ್ಬ ಅದ್ಭುತ ಆಟಗಾರ ಅವರೊಂದಿಗೆ ನಾನು ಆಟವಾಡಿದ್ದು ರೋಮಾಂಚನಕರವಾಗಿತ್ತು. ಪಂದ್ಯ ಗೆಲ್ಲುವಲ್ಲಿ ಎಲ್ಲರ ಪರಿಶ್ರಮವಿತ್ತು. ಆದರೆ ಅದರಲ್ಲಿ ಒಬ್ಬರನ್ನು ಪ್ರಶಂಸಿಬೇಕಾದರೇ ಅದು ಕೇದಾರ್ ಜಾದವ್ ಎಂದು ಹೇಳಿದ್ದಾರೆ. 

ಕಳೆದ ವರ್ಷದ ಜನವರಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯವೊಂದರಲ್ಲಿ ಕಠಿಣ ರನ್ ಗುರಿ ಬೆನ್ನಟ್ಟಿದ್ದ ವೇಳೆ ಮನೀಶ್ ಪಾಂಡ್ಯೆ ಶತಕ ಸಿಡಿಸಿ ಪಂದ್ಯದ ಗೆಲುವಿಗೆ ಕಾರಣರಾಗಿದ್ದರು. ಅದೇ ರೀತಿ ಇಂದು ಕೇದಾರ್ ಜಾದವ್ ಆಡಿದ್ದಾರೆ. ಅಂದು ಮನೀಶ್ ಪಾಂಡ್ಯೆ 4 ಅಥವಾ 5ನೇ ಕ್ರಮಾಂಕದಲ್ಲಿ ಆಡಿದ್ದರು. ಆದರೆ ಕೇದಾರ್ ಜಾದವ್ 6ನೇ ಕ್ರಮಾಂಕದಲ್ಲಿ ಆಡಿ ಅಂತಹ ಒತ್ತಡದ ಸ್ಥಿತಿಯಲ್ಲೂ ತಂಡವನ್ನು ಗೆಲ್ಲಿಸಿರುವುದು ಅವರ ಸಾಮರ್ಥ್ಯವನ್ನು ತೋರಿಸುತ್ತದೆ ಎಂದರು. 

ಪುಣೆಯಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ ಇಂಗ್ಲೆಂಡ್ 351 ರನ್ ಬೃಹತ್ ಮೊತ್ತದ ಗುರಿಯನ್ನು ನೀಡಿದ್ದರು. ಈ ಬೃಹತ್ ಮೊತ್ತ ಬೆನ್ನಟ್ಟಿದ ಟೀಂ ಇಂಡಿಯಾ 49ನೇ ಓವರ್ ನಲ್ಲಿ ಗುರಿ ಬೆನ್ನಟ್ಟಿ ಭರ್ಜರಿ ಜಯ ದಾಖಲಿಸಿತ್ತು.