ನಾಯಕ ಕೊಹ್ಲಿ ಆಕರ್ಷಕ ಶತಕ, ಜಾಧವ್ ಉತ್ತಮ ಸಾಥ್

ಪುಣೆ: ಪುಣೆಯ ಮಹಾರಾಷ್ಟ್ರ ಕ್ರಿಕೆಟ್ ಮೈದಾನದಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಮೊದಲ ಏಕದಿನ ಪಂದ್ಯದಲ್ಲಿ ನಾಯಕ ವಿರಾಟ್ ಕೊಹ್ಲಿ ಆಕರ್ಷಕ ಶತಕ ಸಿಡಿಸಿದ್ದಾರೆ.

ಇಂಗ್ಲೆಂಡ್ ತಂಡ ನೀಡಿದ್ದ 350 ರನ್ ಗಳ ಗುರಿ ಬೆನ್ನು ಹತ್ತಿರುವ ಭಾರತ ತಂಡಕ್ಕೆ ನಾಯಕ ವಿರಾಟ್ ಕೊಹ್ಲಿ ಅವರ ಉತ್ತಮ ಬ್ಯಾಟಿಂಗ್ ನೆರವಾಗಿದ್ದು, ಕೊಹ್ಲಿಗೆ ಮಧ್ಯಮ ಕ್ರಮಾಂಕದ ಆಟಗಾರ ಜಾಧವ್ ಉತ್ತಮ ಸಾಥ್  ನೀಡುತ್ತಿದ್ದಾರೆ. ಆರಂಭಿಕ ಆಘಾತದ ಹೊರತಾಗಿಯೂ ಭಾರತಕ್ಕೆ ಬೆನ್ನೆಲುಬಾಗಿ ನಿಂತಿರುವ ಕೊಹ್ಲಿ ಆಕರ್ಷಕ ಶತಕ ಸಿಡಿಸಿದ್ದಾರೆ. ಒಟ್ಟು 93 ಎಸೆತಗಳನ್ನು ಎದುರಿಸಿರುವ ಕೊಹ್ಲಿ 105 ರನ್ ಸಿಡಿಸಿದ್ದು, ಅವರ ಇನ್ನಿಂಗ್ಸ್ ನಲ್ಲಿ 4  ಭರ್ಜರಿ ಸಿಕ್ಸರ್ ಗಳು ಹಾಗೂ 7 ಭರ್ಜರಿ ಬೌಂಡರಿಗಳನ್ನು ಸಿಡಿಸಿದ್ದಾರೆ.

ಕೊಹ್ಲಿಗೆ ಉತ್ತಮ ಸಾಥ್ ನೀಡಿರುವ ಜಾಧವ್ ಕೂಡ ಶತಕದ ಅಂಚಿನಲ್ಲಿದ್ದು, 52 ಎಸೆತಗಳನ್ನು ಎದುರಿಸಿರುವ ಜಾಧವ್ 86 ರನ್ ಗಳನ್ನು ಕಲೆಹಾಕಿ ಶತಕದತ್ತ ಮುನ್ನುಗ್ಗಿದ್ದಾರೆ. ಅವರ ಇನ್ನಿಂಗ್ಸ್ ನಲ್ಲಿ ಎರಡು ಭರ್ಜರಿ ಸಿಕ್ಸರ್ ಗಳು  ಹಾಗೂ 9 ಬೌಂಡರಿಗಳು ಸೇರಿತ್ತು. ಇತ್ತೀಚಿಗಿನ ವರದಿಗಳು ಬಂದಾಗ ಭಾರತ ತಂಡ 32 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 229 ರನ್ ಗಳಿಸಿದೆ. ಭಾರತ ಗೆಲ್ಲಲು 18 ಓವರ್ ಗಳಲ್ಲಿ 122 ರನ್ ಗಳನ್ನು ಕಲೆ ಹಾಕಬೇಕಿದೆ. ಅಜೇಯ 105  ರನ್ ಗಳಿಸಿರುವ ಕೊಹ್ಲಿ ಮತ್ತು 86 ರನ್ ಗಳಿಸಿ ಶತಕದ ಅಂಚಿನಲ್ಲಿರುವ ಜಾಧವ್ ಕ್ರೀಸ್ ನಲ್ಲಿದ್ದಾರೆ.